“Mahimo ba Ako nga Usa sa mga Pinili sa Dios,” Liahona, Okt. 2023.
Mga Young Adult
Mahimo ba Ako nga Usa sa mga Pinili sa Dios?
Nagdako, nagtuo ko nga ang Dios adunay usa ka lista sa paborito nga mga anak, ug wala ko nagtuo nga anaa ko niana nga lista.
Litrato nga giposingan sa modelo
Gipili ka ba?
Nagdako, dili kaayo ko ingon niana ka relihiyoso. Nahibalo ko sa mga sukaranan sa Kristiyanismo, apan kanunay kong adunay mas daghang pangutana kay sa hugot nga pagtuo ug wala kaayo maghunahuna niini. Apan kanunay kong nakadungog sa akong diosnon, relihiyoso nga iyaan nga nagsubli sa Mateo 22:14:
“Kay daghan ang gidapit, apan diyutay ra ang gipili.”
“Gipili alang sa unsa?” Maghunahuna ko.
Wala gayod ko nakasabot kon unsay tinud-anay nga gipasabot niini nga bersikulo, ug wala ko nanumbaling sa pagpangutana kaniya. Nagsugod ko sa pagpangagpas nga kini nga bersikulo sa kasulatan nagpasabot nga ang Dios aduna gayoy lista sa Iyang paborito nga mga anak kinsa mopuno sa mga lingkoranan sa langit—Iyang diyotay nga gipili.
Wala ko nagtuo nga usa ako niadto nga mga paborito.
Mas nagkatigulang ko ug mas nagtan-aw ko sa paagi nga ang uban nagpakabuhi, ingon og bisan unsay akong buhaton sa akong kinabuhi, maayo nga mga butang man o daotan nga mga butang, dili ako mahinungdanon kon dili ako usa sa Iyang “gipili.”
Wala gani ko nakahibalo kon unsaon pagkab-ot niana nga kahimtang!
Nasayod niini, misugod ako sa pagtuo nga wala gayod kaayo koy bili sa panan-aw sa Dios. Dili ako makapanunod sa Iyang mga panalangin o mga saad tungod kay ako wala matawo nga usa ka paborito.
Giihap isip Usa sa Iyang Pinili
Kini nga mga hunahuna kanunayng mipuno kanako sa kabalaka. Nagtinguha gayod ako og maayo nga makat-on pa mahitungod kon unsay gipasabot nga mahimong usa sa gipili nga katawhan sa Dios ug unsay gikinahanglan aron makadawat sa Iyang mga panalangin.
Usa ka adlaw, samtang nag-scroll ko sa social media nakasugat ko og usa ka pahinumdom alang sa Dali, Sunod Kanako. Sa dihang akong giklik ang pahinumdom, nakakita ko og usa ka paagi sa pakigkonektar sa mga misyonaryo gikan sa Ang Simbahan ni Jesukristo sa mga Santos sa Ulahing mga Adlaw. Ang akong kaandam nga makakaplag og mga tubag ug paglaom alang sa akong kinabuhi migiya kanako nga mouyon sa pagpakigkita kanila.
Pinaagi sa ilang mga leksiyon ug daghang pag-ampo, nakakat-on gayod ko og daghan mahitungod sa ebanghelyo ni Jesukristo, sa akong katuyoan sa kinabuhi, ug, labing importante, sa hingpit nga gugma nga ang Langitnong Amahan aduna alang kanako—Iyang balaan nga anak.
Nabunyagan ko ug mibati og dako kaayo nga kalipay ug pagsabot nga abundang misulod sa akong kinabuhi. Apan wala pa gihapon kaayo ko mibati sa kasegurohan nga akong gitinguha. Ang akong mabalak-on nga mga hunahuna sa wala pa mipasakop sa Simbahan namenosan, apan wala pa gihapon ko nasayod kon usa ba ako sa diyutay nga gipili sa Dios kinsa makapanunod sa tanan nga anaa Kaniya. Dili ako segurado kon unsa pa ang akong mabuhat aron mahimong usa niadtong espesyal nga katawhan.
Kanang tanan nausab pipila ka bulan ang milabay samtang nagtan-aw ko sa kinatibuk-ang komperensiya. Malaomon ko nga akong makaplagan ang pipila ka tubag sa mga pangutana nga mabati gihapon nga makapabalaka sa dihang si Elder David A. Bednar sa Korum sa Napulog Duha ka Apostoles misugod sa pagpamulong. Nakuratan ko sa dihang nadunggan nako siya nga naghisgot sa mismong bersikulo gayod nga nakapalibog kanako sa akong tibuok kinabuhi.
Kalit kong mibati nga malaomon.
Si Elder Bednar mipasabot nga “[Ang Langitnong Amahan] wala naglimita ‘sa mga pinili’ ngadto sa pipila lamang. Hinuon, ang atong mga kasingkasing, ang atong mga tinguha, ang atong pagtahod sa sagrado nga mga pakigsaad ug mga ordinansa sa ebanghelyo, ang atong pagkamasulundon ngadto sa mga sugo, ug, labing importante, ang matubsanon nga grasya ug kaluoy sa Manluluwas maoy basehan kon kita maihap ba nga usa sa mga pinili sa Dios.”1
Ug niana nga higayon, ako nasayod—ako usa ka pinili.
Ang mga pulong ni Elder Bednar mihatag kanako og halawom nga pagbati sa pasalamat nga mibuntog kanako. Gibati nako nga mas bulahan gayod nga nakaplagan Ang Simbahan ni Jesukristo sa mga Santos sa Ulahing mga Adlaw.
Pagpili Usab Kaniya
Ang Dios walay mga paborito—gihigugma Niya ang tanan sa Iyang mga anak uban ang hingpit nga gugma—apan ang pagkahimong pinili nagpasabot nga pilion usab nato Siya.
Pinili kita tungod kay gipili nato nga ipatigbabaw Siya sa atong mga kinabuhi labaw sa tanan.
Si Elder Bednar nakapadasig kanako nga matinud-anong magpabilin diha sa dalan sa pakigsaad samtang molahutay ko hangtod sa kataposan. Gibati usab ko nga nadasig sa mensahe ni Presidente Russell M. Nelson nga hatagan og prayoridad ang akong relasyon sa Langitnong Amahan ug maningkamot nga isalikway ug buntogon ang kalibotan2 aron makabalik ako ngadto Kaniya!
Ako magpamatuod nga dili igsapayan sa inyong kaagi, dili igsapayan sa inyong mga sala, dili igsapayan sa inyong mga kakulang o pagduhaduha sa kaugalingon, tungod ni Jesukristo kitang tanan mahimong “pinili” sa Dios. Kita makapuyo usab uban sa atong Langitong Amahan ug makapanunod sa “tanan nga [Iya]” (Doktrina ug mga Pakigsaad 84:38). Kon kita moduol ngadto kang Kristo, mohimo ug motuman sa mga pakigsaad, modawat sa kahingpitan sa Iyang ebanghelyo, ug maningkamot nga mahimong sama Kaniya, ang pagkahimong usa sa Iyang pinili mahimong usa ka reyalidad. Kana nindot kaayo nga gasa gikan sa atong mahigugmaon nga Langitnong Amahan.