Kinatibuk-ang Komperensiya: Ang Mana sa Atong Panahon Karon

Ni Maddie Bowen Hoyt

Pinaagi sa mga propeta ug apostoles sa panahon karon, ang Dios naghatag nato og paagi nga makaplagan ang espirituwal nga pangpabaskog nga atong gipangita.

Maskin sa kamingawan nga hilabihan kainit ug puno sa mga balas o sa apostasiya sa kalibog ug pagduhaduha, adunay kagutom human sa Exodo sa Ehipto ug kagutom human sa kamatayon ni Jesukristo.

Ang usa nga kagutom pisikal, ang lain, espirituwal.

Aron matagbaw ang pisikal nga panginahanglan sa Iyang mga anak, ang Dios nagpadala og mana. Ngadto niadtong mga tawo human sa dakong apostasiya, nagpadala Siya og susama niini nga espirituhanong pagkaon nga makapalahutay: ang pulong sa Dios nga gihatag pinaagi sa usa ka buhi nga propeta aron mogiya nato ngadto sa mana, si Jesukristo.

Ingon nga ang mga Israelita gitudloan sa pagpaabot og pisikal nga mana, kita makapaabot usab og espirituwal nga mana karon.

Atong Espirituwal nga Mana gikan sa Dios

Samtang ang mga Israelita naglatagaw sa kamingawan, kadtong mga tawo atol sa dakong apostasiya naglatagaw “gikan sa amihanan paingon sa habagatan ug gikan sa silangan paingon sa kasadpan … aron pagpangita sa mensahe sa Ginoo apan [wala] sila makakaplag niini” (Amos 8:12).

Kini nga paglatagaw sa kaulahian misangpot sa pagpahiuli ni Jesukristo sa Iyang ebanghelyo pinaagi ni Propeta Joseph Smith.

Ingon nga ang Ginoo mipadayag kon asa makaplagan sa katawhan sa Israel ang ilang pisikal nga mana, Siya usab mipadayag kanato kon asa nato makaplagan ang tinuod nga espirituwal nga pangpabaskog: gikan sa mga kasulatan ug sa mga pulong sa atong mga propeta karon nga panahon kinsa nagtudlo nato sa tinod nga mana—si Jesukristo, ang Pan sa Kinabuhi—ug sa Iyang gipahiuli nga ebanghelyo ug kamatuoran.

Dili na kita kinahanglan nga maglatagaw aron mangita sa kamatuoran, tungod kay gihatagan kita og saad nga “sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta” (Amos 3:7).

Si Presidente Russell M. Nelson mitudlo, “Mas labaw nga makakapoy ang pagpangita og kalipay diin kamo dili gayod makakita niini!”¹ Ang tambag sa Ginoo, nga gitudlo sa mga propeta ug apostoles diha sa mga kasulatan ug diha sa kinatibuk-ang komperensiya, magdala nato og malungtarong kalipay ug tinuoray nga pagkaon nga makapalahutay. Ingon nga ang mga anak sa Israel gikapoy ug nasagmuyo sa pagpaningkamot sa pagpangita og pagkaon aron mabuhi, kita usab kapoyon ug masagmuyo kon kita modangop ngadto sa laing mga tinubdan aron mangita sa kamatuoran.

Pagpangita og Mana pinaagi sa Pagkamasulondon

Ingon nga ang mga Israelita kinahanglan nga mosunod sa Dios aron mapakaon sa pisikal nga paagi, kita kinahanglan nga mosunod Kaniya aron mapakaon sa espirituwal nga paagi.

“Ang Ginoo miingon kang Moises, “Magpaulan akog pagkaon alang kaninyong tanan. Adlaw-adlaw kinahanglan manggawas ang mga tawo aron pagpanigom ug igo lamang nianang adlawa, niining paagiha kasulayan ko sila, kon motuman ba sila sa kasugoan nga akong gihatag kanila” (Exodo 16:4).

Ang Ginoo migamit sa mana isip usa ka oportunidad sa pagdiskobre kon ang mga Israelita magmasulondon ba sa tanan Niya nga mga sugo. Ingon man usab, ang kinatibuk-ang komperensiya usa ka oportunidad alang nato aron mapamatud-an ang atong pagkamasulondon ngadto Kaniya pinaagi sa atong kaandam sa pagpaminaw sa Iyang mga propeta. Ug sama sa mga Israelita nga dili mahimong mokuha ug mopili kon unsa lamang ang sundon ug kon unsa ang ibaliwala ug magpaabot gihapon sa gisaad nga mga panalangin, ni kita usab.

Ang katawhan sa Israel nakakat-on dayon nga ang mana makasustiner nila kon motigom sila niini sumala sa mga instruksiyon sa Dios—adlaw-adlaw kini nga tigomon. Kita usab nakakat-on nga ang pagpaminaw sa pinili nga mga sulogoon sa Dios espirituhanong makasustiner nato kon kita mopatalinghog sa unsay gitudlo. Ang mana sa mga pulong ni Jesukristo nga ihatag atol sa kinatibuk-ang komperensiya dili hutdon sa usa lang ka semana. Samtang padayon kita nga maghisgot og balik sa mga pakigpulong sa komperensiya, mohiusa sa ilang bililhong mga kamatuoran ngari sa atong inadlaw nga mga pagtuon, atong makaplagan nga kita padayon nga nagpabaskog.

Ang Tinuod nga Mana nga Atong Gipangita

Ang mga anak sa Israel nasayod nga kining milagroso nga mana naggikan sa Dios. Ug kita mahimong masayod uban sa kaseguroan nga ang mga mensahe sa kinatibuk-ang komperensiya naggikan sa Dios kon kita moduol Kaniya pinaagi sa pag-ampo ug pagdapit sa Espiritu ngari sa atong kinabuhi sa matag adlaw. Sama sa gitudlo ni Moroni, “Pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang” (Moroni 10:5).

Kita makahibalo niini tungod sa unsay gitudlo sa mga propeta ug apostoles, kang kinsa sila kanunay nga nagtudlo ug nagpamatuod, ug alang kang kinsa sila sa kataposan morepresentar ug mobarog—si Jesukristo.

Ingon nga ang Dios nagpadala og mana, Siya nagpadala og buhi nga mga propeta.

Parehong nagrepresentar sa Iyang Anak, si Jesukristo.

Si Jesukristo mao ang mana nga gipangita sa mga Israelita ug kinsa mao usab ang atong gipangita karon.

“Ang among mga katigulangan nangaon ug mana didto sa kamingawan, sumala gayod sa giingon sa kasulatan: ‘Gihatagan niya silag pan gikan sa langit.

“Si Jesus miingon, “Sultihan ko kamo: dili si Moises ang naghatag kaninyo ug pan gikan sa langit; ang akong Amahan mao ang naghatag kaninyo sa matuod nga pan gikan sa langit.

`“Kay ang pan nga gihatag sa Dios mao siya nga nanaog gikan sa langit ug naghatag ug kinabuhi sa kalibotan.

“Sila miingon kaniya, “Sir, hatagi kami kanunay niining maong pan.

“Si Jesus miingon kanila, “Ako mao ang pan nga naghatag sa kinabuhi. Ang moari kanako dili na gayod gutomon ug ang motuo kanako dili na gayod uhawon” (Juan 6:31–35).

Ang mga propeta motabang nato sa pag-ambit sa Pan sa Kinabuhi—sa pag-ambit sa atong Manluluwas nga si Jesukristo ug sa Iyang gipahiuli nga ebanghelyo. Kon kita makanunayon sa pagpaminaw ug pagpatalinghog sa iyang mga pagtulon-an, kita mapakaon sa espirituwal nga paagi, ug mabusog, ug malig-on.

Manghinaot ko nga kitang tanan maminaw sa kinatibuk-ang komperensiya.