Gikan sa Kawalay Pagbati ngadto sa Pagkaadunay Katuyoan

Ni Xóchitl Bott Rivera, Mga Magasin sa Simbahan

Gitabangan ko sa Dios nga makakita kon sa unsang paagi akong magamit ang akong pagsulay aron sa pagtabang sa uban nga adunay susamang kasakit.

Usa ka komon nga sintoma nga mabati sa mga tawo kon makigbisog sa depresyon ug ubang mga sakit sa kahimsog sa pangisip mao ang kawalay pagbati sa Espiritu Santo. Kasagaran manglimbasog sila sa pagbati nianang makapalamdag, mainiton nga pagbati sa sulod.

Isip usa ka tawo nga adunay hilabihan nga makaguol nga [major depressive] nga sakit ug makabuang nga pamugos [obsessive-compulsive] nga sakit, nakasinati ko niini nga reyalidad sulod sa daghang katuigan. Wala ko kahibalo kon unsang paagi mabati ang Espiritu. Sa dihang ang akong mga sintoma migrabe atol sa kolehiyo, naospital ko sulod sa usa ka semana.

Atol niadtong malisod nga panahon sa sulod sa akong hunahuna, naghunahuna ko kon sa unsang paagi kini nga mga sakit makatabang kanako ugma damlag. Unsaon kaha sa Dios sa paggamit niining makasamok nga kasinatian alang sa akong kaayohan? Unsa ang katuyoan Niya kanako sa paghatag nako niini nga pagsulay?

Nangayo ko og mga panalangin sa pagkapari atol niining panahona, ug kanunay nga adunay usa ka kapahayag nga balik-balik nakong madunggan: “Ang Dios mihatag kanimo og mga kapanguhaan sa pagbuntog niini nga pagsulay.” Nagbaton og hugot nga pagtuo nga Siya mogiya kanako sa unsay akong gikinahanglan aron mamaayo, midesisyon ko nga mosalig sa akong mga doktor. Anam-anam, nakakuha ko sa tabang nga akong gikinahanglan. Paglabay sa panahon, akong gipakigbahin sa online ang akong panaw sa kahimsog sa pangisip.

Wala madugay human niana, nagsugod ko og pagdawat og mga mensahe gikan sa akong mga higala nga lalaki, nangutana mahitungod sa akong kahimsog sa pangisip ug nagpakigbahin sa ilang susama nga mga hunahuna ug mga pagbati. Nangayo sila kanako og tabang aron mahibalo kon unsaon sa pakigbisog sa ilang kawalay pagbati. Sa sinugdanan nasorpresa ko.

Sa daghang kultura, ang mga lalaki gilaoman nga kanunayng makita nga lig-on ug dili gayod mopakita sa ilang mga emosyon. Kana ang nakapahimong lisod kanila sa pag-angkon nga nagkinahanglan sila og tabang, ug sila kasagaran nag-antos sa hilom.

Sa dihang nahitabo kini sa ikatulong higayon, akong naamgohan nga ang akong mga pagsulay miandam kanako sa pagtabang. Tanan niadtong malisod nga mga higayon, tanan niadtong therapy nga mga sesyon, tanan nakong mga pag-ampo, ug tanan nakong mga paningkamot sa pagpakita og hugot nga pagtuo samtang nagtinguha ko og langitnon nga tabang mitudlo kanako sa pag-ila kon ang uban nagsinati sa susama nga mga pagsulay ug unsaon sa pagpunting kanila ngadto sa tabang.

Akong nakat-onan ang kamatuoran niini nga mga pulong gikan ni Elder Jeffrey R. Holland sa Korum sa Napulog Duha ka Apostoles: “Kon kamo may appendicitis, ang Dios nagpaabot nga kamo mangayo og panalangin sa [pagkapari] ug magpa-check up sa [labing maayo nga] doktor. Mao usab sa mga problema sa emosyon. Ang atong Amahan sa Langit naglaom nga kita mogamit sa tanang talagsaong gasa nga Iyang gihatag niining mahimayaong dispensasyon.”¹