“Pagpakaon sa Karnero sa Ginoo sa Temporal ug Espirituhanon nga Paagi,” Liahona, Okt. 2023.
Pagpakaon sa Karnero sa Ginoo sa Temporal ug Espirituhanon nga Paagi
Isip mga disipulo ni Jesukristo, atong ipahayag ang atong gugma alang Kaniya pinaagi sa pagpakita kon sa unsang paagi nga atong gipakaon ang Iyang mga karnero.
Pagpangita sa Usa, ni Matt Warren
Sa usa ka okasyon, ang nabanhaw nga Ginoong Jesukristo nangutana ni Pedro, “Gihigugma mo ba ako?” Mitubag si Pedro, “Oo, Ginoo; nasayod ka nga gihigugma ko ikaw.” Si Jesus nangutana pa kaniya og duha pa ka higayon, “Gihigugma mo ba ako?” Sa matag higayon, si Pedro mitubag og oo. Ug sa matag higayon si Jesus mitubag sa pagsulti og, “Pakan-a ang akong mga nating karnero” o “Pakan-a ang akong karnero” (Juan 21:15–17).
Sa akong opisina sa punoang buhatan sa Simbahan, pipila ka imahe diha sa bungbong nagpakita sa Ginoo nga nagserbisyo, nagpanalangin, ug nag-alim sa Iyang karnero. Kini nagpahinumdom nako kon unsa ka lawom ang Iyang pagpakabana sa kaayohan sa tanang anak sa Iyang Amahan. Siya ang Maayong Magbalantay. Siya nakaila ug nahigugma sa Iyang karnero. Mao kana nganong Siya mihatag og mando kang Pedro sa pagpakaon sa Iyang karnero.
Isip mga miyembro sa Ang Simbahan ni Jesukristo sa mga Santos sa Ulahing mga Adlaw ug mga disipulo ni Ginoong Jesukristo, kita gidapit usab nga mahimong kabahin sa buhat sa Ginoo alang sa pag-amuma ug pag-alima sa uban. Kita gitawag sa pagpakaon sa karnero sa Ginoo sa temporal ug espirituhanon nga paagi.
Temporal nga mga Panginahanglan, Espirituhanon nga mga Panginahanglan
“Ako mao ang kahayag sa kalibotan” (Juan 8:12). Kon ang mga indibidwal ug mga pamilya adunay mahinungdanon nga temporal nga mga panginahanglan, bisan pa man, kini makapahimong lisod alang kanila nga makakita sa Iyang kahayag ug mobati sa Iyang Espiritu. Sila mahimong mobati nga daw sila nagpuyo diha sa kangitngit.
Ang Simbahan adunay daghan nga kapanguhaan sa pagtabang sa karnero sa Ginoo nga molambo ang ilang pisikal ug emosyonal nga kahimsog, mopadayon sa pag-eskwela ug panarbaho, ug mahimong andam sa temporal nga paagi.1 Sa kasagaran kadtong anaa sa panginahanglan wala masayod kon asa modangop o unsa nga kapanguhaan ang anaa. Usahay sila mahimong maulawon kaayo o maulaw nga mohangyo og tabang. Sa pagtuman sa kasugoan sa Ginoo sa pagpakaon sa Iyang mga karnero, kita makatabang sa mga tawo sa pagpangita niining mga kapanguhaan.
Ang tanan nga mga kapanguhaan sa Simbahan gibase sa mga baroganan sa ebanghelyo. Kon ang mga indibidwal mogamit niining espirituhanon nga mga baroganan ngadto sa ilang temporal nga mga panginahanglan, kini makapalig-on sa ilang pagtuo ni Jesukristo. Niining paagiha ilang mabati ang kahayag sa Manluluwas diha sa ilang mga kinabuhi, molambo diha sa espirituhanong kalig-on, ug mopadayon subay sa dalan sa pakigsaad nga mopadulong balik ngadto sa Langitnong Amahan ug sa Iyang Anak, si Jesukristo.
Panaghiusa pinaagi sa Pagpuasa, mga Ikapulo, ug mga Halad
Ang duha ka importanteng mga paagi nga gihatag sa Ginoo kanato sa pagtabang sa pagpakaon sa Iyang karnero mao ang pagpuasa ug pagbayad sa ikapulo ug mga halad.
Kon gibuhat diha sa husto nga diwa, ang pagpuasa labaw pa gayod kay sa dili mokaon ug pag-inom. Kabahin kini sa pagsimba nga naglig-on sa atong mga relasyon uban sa atong mga pamilya, mga higala ug mga silingan, ug sa kataposan sa Ginoo. Ako nasayod nga kon ako anaa sa usa ka diwa sa pagpuasa, ako mas sensitibo ngadto sa mga panginahanglan sa uban. Mas masabtan nako kon sa unsang paagi ako makatabang kanila.
Ang pagbayad og ikapulo nagkinahanglan og dakong pagtuo, apan kini usab makapausbaw sa hugot nga pagtuo. Samtang ang atong hugot nga pagtuo molambo, ang Espiritu moaghat kanato sa paghatag og madagayaon nga halad sa puasa. Ang mga halad sa puasa mosangkap og usa ka oportunidad nga dili magpaila nga mohatag sa atong mga tabang aron sa pagpanalangin sa atong mga kaigsoonan diha sa espirituhanon ug temporal nga panginahanglan. Ang pagpuasa ug pagbayad sa ikapulo ug mga halad magdala kanato og panaghiusa uban sa Ginoo, sa atong mga pamilya, ug niadtong atong giserbisyohan diha sa Simbahan.
Pagpangalagad sa Pagpangita sa Usa
Si Jesukristo nangalagad ngadto sa tanan nga naglibot Kaniya. Espesyal Niyang gipangita ang usa kinsa nagkinahanglan kaayo Kaniya. Kon kita mogawas isip mga tigpangalagad nga mga kaigsoonan, kita makakaplag ug makapangalagad niadtong nanginahanglan. Ug kon kadtong inyong gipangalagaran masayod nga kamo nagpakabana gayod kanila, sila mobati sa kahayag sa ebanghelyo ug sa gugma nga naggikan kaninyo ug sa Ginoo. Sila usab may dakong kalagmitan nga mohangyo og suporta gikan kaninyo ug sa Simbahan kon sila nagkinahanglan niini.
Kon gusto ninyo nga moatiman sa karnero sa Ginoo, ang usa ka maanindot nga dapit nga mosugod mao ang pagserbisyo sa uban, mopakigbahin sa kahayag sa Ginoo ngadto kanila, ug, kon gikinahanglan, itudlo kanila ang gikinahanglan nga mga kapanguhaan atol sa inyong mga pagbisita sa pagpangalagad.
Pagmahimong Bukas ngadto sa Pagdasig
Usa ka Domingo samtang nagserbisyo isip bishop didto sa Mexico, ako milingkod sa atubangan sa wala pa ang miting sa sakramento ug nakamatngon sa usa ka sister nga miabot sa chapel. Bag-o lang siya nga nakabig ug ingon og kanunayng manggiulawon. Ang Espiritu miaghat kanako sa pagsuta kon unsaon sa konseho sa ward sa pagtabang kaniya nga mobati nga mas komportable sa simbahan. Akong gihangyo ang presidente sa Relief Society sa pagtabang niini nga sister.
Sa paglabay sa pipila ka higayon, ang presidente sa Relief Society misulti kanako, “Bishop, kini nga sister nagkinahanglan kaayo nga mapulihan ang iyang ngipon.”
Mao kini ang usa sa mga rason nga kini nga sister ingon og maulawon kaayo. Dili siya makig-istorya o mopahiyom tungod kay dili siya gusto makit-an ni bisan kinsa ang iyang ngipon. Ang presidente sa Relief Society nangutana kon unsa ang among buhaton. Mihukom ko sa pakigsabot og dentista aron susihon siya ug masuta kon unsa ang gikinahanglan nga buhaton.
“Sigurado ka?” nangutana ang presidente sa Relief Society. “Basin og mahal kini.”
Gisultihan nako siya nga mahimo kami nga mopadayon. Isip usa ka ward, kami nakakita og usa ka paagi sa pagtabang niini nga sister. Sa dihang nakita nako siya pag-usab, siya nakig-istorya ug nagpahiyom na. Wala pa gayod ko sukad nakakita niya nga mipahiyom!
Gikan nianang puntoha, ang kinabuhi niini nga sister nausab. Nahimo siya nga mas aktibo nga miyembro sa ward ug sa kataposan miadto sa templo. Karon usa na siya ka ordinance worker sa templo. Sigurado ko nga kon moadto ko sa templo diin siya nagserbisyo, akong makit-an siya nga magpahiyom.
Akong nakaplagan nga kon atong obserbaran ang mga panginahanglan sa uban, kita makapalig-on kanila, makatabang kanila nga mabuntog ang ilang mga hagit, moamuma kanila, ug motabang sa pagdala kanila ngadto ni Jesukristo. Kita kinahanglan dili gayod mopakaingon kon unsa ang mahimo o dili mahimo. Uban sa tabang sa Ginoo, kita makakaplag og daghang oportunidad sa pagserbisyo ug pagpanalangin sa Iyang karnero.
Tan-aw ngadto ni Jesukristo
Diha sa Bag-ong Tugon, atong mabasa ang bahin sa usa ka babaye nga nag-antos sulod sa 12 ka taas nga katuigan sa pagsige og dugo. Siya mipakita og dakong pagtuo diha sa Ginoo sa dihang siya miduol Kaniya diha sa dakong pundok sa katawhan. Siya mituo sa tibuok niyang kasingkasing nga kon siya makahikap lang sa Iyang sinina, siya mamaayo. Sa dihang siya nakahikap sa sidsid sa sinina sa Ginoo, siya dihadiha dayon naayo. (Tan-awa sa Lucas 8:43–44.) Si Jesus miingon ngadto kaniya, “Anak, ang imong pagsalig nag-ayo kanimo; pauli nga malinawon” (Luke 8:48).
Kon kamo nagkinahanglan og temporal o espirituhanon nga tabang, sunda ang ehemplo niining matinud-anon nga babaye ug motan-aw ngadto ni Jesukristo. Ituyhad ang imong kaugalingon sa espirituhanon nga paagi ug magpaduol og maayo ngadto sa Ginoo kaysa imong nahimo kaniadto. Pinaagi sa inyong kaugalingong mga paningkamot ug sa gahom ni Jesukristo, kamo makabuhat alang sa inyong espirituhanon ug temporal nga kaayohan. Ang Ginoo mosangkap sa mga milagro nga inyong gikinahanglan aron makab-ot ang espirituhanon ug praktikal nga panginahanglan sa kinabuhi sumala sa Iyang kaugalingon nga kabubut-on, paagi, ug panahon.
Gihigugma ba Nato Siya?
Ang pangutana sa Ginoo ngadto ni Pedro mao ang Iyang ikapangutana sa matag usa kanato: “Gihigugma mo ba ako?” Kon ang atong tubag oo, nan kita kinahanglan gayod mobutang sa atong pulong ngadto sa buhat. Isip mga disipulo ni Jesukristo, atong ipahayag ang atong gugma alang Kaniya pinaagi sa pagpakita kon sa unsang paagi nga atong gipakaon ang Iyang mga karnero.
Mahitabo man kini dinhi o sa pikas habig sa tabil, ang Ginoo mobubo sa Iyang mga panalangin ngari kanato kon kita mogamit sa Iyang mga pagtulon-an ug moserbisyo sa uban sumala sa paggiya sa Espiritu. Kadaghanan niadtong mga panalangin makaplagan sulod sa Iyang Simbahan karon. Kon kita matinud-anon, Siya nagsaad nga “ang tanan nga iya sa akong Amahan ihatag ngadto [kaninyo]” (Doktrina ug mga Pakigsaad 84:38).
Inyong mabati ang gugma sa Ginoo alang kaninyo ug makakaplag og hingpit nga kalipay sa inyong kinabuhi samtang kamo mogahin sa inyong mga adlaw sa pag-atiman sa Iyang karnero sa paagi nga Siya moatiman kon Siya nagpuyo pa uban kanato karon.