Mensahe sa Area

Kini Nga Simbahan Gitukod Diha Sa Apostoles Ug Mga Propeta, Uban Ni Kristo Isip Ang Ulohang Bato Sa Pamag-Ang

Elder Norman Insong

Area Seventy

Diha sa pag-ampo sa Ginoo nga gihalad atol sa Wali sa Bukid, ang ‘Moabot ang Imong gingharian’ (Mateo 6:10), nagpasabot nga ang gingharian sa Dios sa yuta o Iyang simbahan, nga Iyang giorganisar, ug ang apostoles mipadayon human sa Iyang kamatayon. Sa dihang ang mga tumutuo mipasakop sa Simbahan, ang Mga Buhat 2:47 mipahayag nga “…ang Dios nagdugang ug mga linuwas sa ilang gidaghanon matag adlaw.” Ako kanunayng nakadungog gikan sa mga higala nga walay simbahan nga makaluwas sa tawo. Apan, gikan sa bersikulo sa ibabaw atong masabtan nga ang Iyang simbahan makatabang sa pagluwas sa tawo. Ang gingharian sa Dios dinhi sa yuta (Iyang simbahan) nag-andam sa tawo aron makapuyo sa Iyang gingharian sa kalangitan.

Namulong kabahin sa pagtulon-an sa iyang amahan nga si Mormon, miingon si Moroni, “…Kay tan-awa, ang Espiritu ni Kristo gihatag ngadto sa matag tawo…” (Moroni 7:16). Kining Espiritu ni Kristo naggiya ug nag-agni sa matag tawo dili lang aron makahibalo sa maayo gikan sa daotan, apan sa paggiya usab kaniya aron makaplagan ang Iyang simbahan. Ang usa ka mas masusihon nga pagtuon sa gipadayag nga mga pulong, ang mga kasulatan, nagtudlo kanato nga si Pablo mihulagway sa simbahan ni Kristo isip “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Ang usa ka bato sa pamag-ang sa usa ka gambalay, mao ang nag-unang pundasyon niini, nagkonektar sa duha ka bungbong ug mopabarog sa estraktura uban sa tabang sa tanan nga pundasyon. Si Kristo mao ang ulohang bato sa pamag-ang alang sa mga ordinansa, mga doktrina ug mga baroganan sa Iyang simbahan, nagkonektar sa pundasyon sa mga propeta ug apostoles.

Ang mga propeta nagsilbi nga mga mensahero sa Dios ug mobutyag sa Iyang kabubut-on (Amos 3:7). Ang mga kasulatan mao ang mga saksi nga ang Dios namulong ngadto sa mga propeta sa karaan. Mao kini ang pagpahayag sa Iyang gugma alang kanila. Apan, ang Dios dili gayod manghilabot ni dili mopugong sa ilang moral nga kabubut-on. Gawasnon sila sa pagpaminaw o pagbaliwala sa tingog sa propeta. Karon, kita nagpuyo sa usa ka panahon nga walay sama. Ang modernong mga problema ug mga isyu nagkinahanglan og modernong paggiya gikan sa Dios. Dayag lang, kita nagkinahanglan og moderno nga buhi nga mga propeta sa atong panahon aron sa pagtabang kanato nga makahibalo sa Iyang balaan nga kabubut-on.

Ang usa ka apostol mao ang “usa nga gipadala” (Lucas 6:13) ug mao ang usa ka espesyal nga saksi sa ngalan ni Jesukristo ngadto sa tibuok kalibotan, ilabi na sa Iyang pagkabalaan ug sa Iyang linawas nga pagkabanhaw gikan sa patay (Mga Buhat 1:22; D&P 107:23). Human sa pagsaka ni Kristo ngadto sa kalangitan, ang apostoles nagpundok aron maghunahuna kon kinsa ang ipuli ni Judas Iscariote diha sa korum, ug sila mitawag ni Matias aron mopuli kaniya (Mga Buhat 1:23-26). Diha sa samang proseso si Pablo ginganlan nga usa ka apostol sa dihang nahitabo ang pagbakante pinaagi sa kamatayon. Sa pagkahibalo kon giunsa kini sa paghimo, kita magsugod sa pagkasabot nga ang apostoles ug mga propeta mao ang pundasyon sa Iyang tinuod nga simbahan. Tungod niini, ang matag usa sa apostoles tagsa-tagsang gipamatay. Sa hinay-hinay apan sigurado, ang apostasiya sumala sa ilang gipanagna misugod sa pagkahitabo hangtod sa kataposan ang dakong apostasiya o ang pagkawala sa kamatuoran ug sa Iyang Simbahan miabot.

Si Pablo misulti didto sa Mga Taga-Efeso 4:11-14, “Ang mga gasa niya mao nga ang uban iyang gihimong mga apostoles, ang uban mga propeta, ang uban mga tigsangyaw sa Maayong Balita, ang uban mga pastor ug mga magtutudlo. Gihimo niya kini aron sa pag-andam sa tibuok katawhan sa Dios alang sa buluhaton sa Kristohanong pag-alagad aron motubo ang lawas ni Kristo: Hangtod magkahiusa kitang tanan diha sa pagtuo ug sa atong kahibalo mahitungod sa Anak sa Dios. Unya mahingkod kita sama sa kahingkod ni Kristo: Dili na unya kita sama sa mga bata nga maanod-anod sa mga balod ug mapadpad ngadto-nganhi sa nagbalibali nga hangin sa pagtulon-an sa malimbongong mga tawo nga magpasalaag sa uban pinaagi sa mga tanghaga nga ilang binuhat.” Ang mga santos dili hingpit nga mga katawhan, apan ordinaryo nga mga miyembro sa Iyang simbahan. Kon walay mga propeta ug buhi nga mga apostoles, ang imbitasyon ni Kristo nga mamahimong hingpit (Mateo 5:48; 3 Nephi 12:48) sama Kaniya dili mahimong matinuod. Bisan og si Kristo mitapos sa Iyang talagsaon nga maulaon nga sakripisyo aron kitang tanan makadawat og kapasayloan sa mga sala, kon wala ang Iyang tinuod nga simbahan uban sa mga propeta ug apostoles isip Iyang awtorisado nga mga representante, ang makaluwas nga mga ordinansa sa ebanghelyo nga mobugkos kanato ngadto Kaniya pinaagi sa mga pakigsaad dili mahimong mapahigayon.

Ang Dios miandam og usa ka paagi alang sa Iyang simbahan nga mapahiuli (Mga Buhat 3:21). Kini adunay pundasyon sa mga propeta ug apostoles, ug si Kristo ang ulohang bato sa pamag-ang. Karon kana nga simbahan mao ang Simbahan ni Jesukristo sa mga Santos sa Ulahing mga Adlaw. Kini solemning nagdala sa iyang balaan nga ngalan, ug kini adunay buhi nga mga propeta ug buhi nga apostoles. Gikan sa panahon nga ang simbahan gipahiuli niadtong 1830 pinaagi ni propeta Joseph Smith, Jr., ang simbahan kanunayng gigiyahan pinaagi sa mga propeta ug apostoles.

Karon ang atong buhi nga propeta mao si Presidente Russell M. Nelson, ug siya nagdapit sa tanan sa Pagduol ngadto ni Kristo ug mahimong hingpit diha Kaniya, pinaagi sa paghimo ug pagtuman og Sagrado nga mga Pakigsaad pinaagi sa mga ordinansa sa ebanghelyo.¹ Ang mga pakigsaad nga atong gihimo pinaagi sa ordinansa sa bunyag ug sa mga ordinansa diha sa balaan nga mga templo nagbugkos kanato ngadto ni Kristo, ug Siya miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10). Isip natural nga mga tawo, kita kanunay nga molapas sa atong mga pakigsaad ug busa mahimong dili sarang gikan sa pagdawat sa gisaad nga mga panalangin, nga mahimong maglakip sa mga panalangin sa kinabuhing dayon uban sa Dios. Apan, ang Dios nag-andam og usa ka paagi nga kita makagamit sa makapabag-o nga ordinansa sa sakramento diha sa Iyang balaan nga adlaw (D&P 59:9). Kini makapahimo kanato sa pagtugyan sa mga sala nga atong gihinulsolan, sa ingon nag-andam kanato aron mahimong mabalaan pinaagi sa Iyang Espiritu aron makadawat og kapasayloan sa tanan natong mga sala ug mobag-o sa tanan natong mga pakigsaad uban Kaniya ug mahimong sarang alang sa kinabuing dayon. Ang buhi nga mga propeta ug apostoles nagpahinumdom kanato sa pagpabilin diha sa Dalan sa Pakigsaad.

PAGPANGANDAM ALANG SA MISYON PINAAGI SA PAMILYA

Alang sa pamilyang Negrido, ang pagtabang sa 13 anyos nga si Yushin nga maandam alang sa iyang misyon mao ang usa ka kalihokan sa pamilya. Kami nakig-istorya sa batan-ong lalaki gikan sa Siyudad sa Quezon, ug siya misaysay kon giunsa sa iyang pamilya sa pagtabang kaniya sa nagkalain-laing mga aspeto sa pagpangandam sa misyon.

Pisikal

“Magbisikleta ko labing minos kausa sa usa ka semana aron kon madistino ko sa usa ka area diin magsakay og besikleta ang mga misyonaryo, dili nako mabag-ohan. Ang akong mga ginikanan mipalista usab nako sa usa ka akademiya sa basketbol diin ang akong kalagsik ug kalig-on mapalambo, ug ako makakat-on og teamwork ug pakigsabot uban sa akong mga kauban sa team. Kami usab usa ka pamilya sa mga diver ug mga mountaineer mao nga kami mokatkat ug molangoy, usa ka kahanas sa paglahutay nga tingali mahimong gamit kaayo kay ang atong nasod gilangkoban man sa daghang mga isla.”

Pangisip

“Usa sa mga prayoridad sa among pamilya mao ang tumong sa paghuman sa among mga pagtuon. Ang akong mga ginikanan mipalista kanamo sa usa ka eskwelahan nga tingali dili usa sa kinamaayohan nga mga eskwelahan, apan taas gihapon ang akademikanhong sumbanan nga makatabang nako nga makaangkon og dugang nga kahibalo. Salamat sa maayong pamatasan sa pagtrabaho nga gisilsil ngari kanamo sa among mga ginikanan, kaming duha ni Ate Macel ug ako nakadawat og mga ganti sa akademikanhong merito.”

Sosyal

“Ang akong mga ginikanan nag-awhag usab kanamo sa paghimo og sirkulo sa mga higala gawas sa simbahan aron mabansay sa pagpaapil. Mao kini usa sa mga aspeto nga ang umaabot nga mga misyonaryo kinahanglan maugmad: aron makamao kon unsaon makigdait sa ubang tawo. Nahisakop usab ako sa mga organisasyon sama sa Rescue Recon Youth Organization ug sa Boy Scouts of the Philippines. Isip napanalanginan uban sa oportunidad sa pagbiyahe sa tibuok ug gawas sa nasod, akong nakat-onan ang pagdayeg sa lainlaing mga tinuohan ug mga kultura.”

Pinansiyal

“Sa miagi nga tuig nakadawat ko og usa ka alkansiya nga kawayan aron matabangan ko nga makatigom alang sa akong misyon. Sa miaging Disyembre, miadto kami sa bangko ug miabli og account aron ako makabayad alang sa akong misyon gamit ang akong tinigom. Magpadayon ko sa pagtigom, apan kon ang akong mga tinigom dili igo, ako sigurado nga ang akong mga ginikanan mopuno sa kulang.”

Emosyon

“Tungod sa daghan kaayong mga problema sa pangisip nga mitumaw karong panahona, ang umaabot nga misyonaryo kinahanglan nga malig-on ang emosyon. Usa sa mga naandan nga buhat nga kami anaa isip usa ka pamilya mao ang kanunayng adunay bukas nga komunikasyon. Ang tingpanihapon mao ang labing maayo nga panahon alang kanamo nga maghisgot sa tanang nahitabo. Kini mura og magreport sa usag usa kon kumusta ang among adlaw. Among hisgotan ang tanang butang lakip ang politika. Kami mahimong adunay lain laing pagtuo sa politika apan ang among panaghisgotan kanunayng matinahoron.”

Espirituwal

“Ang labing importanteng butang mao ang maandam sa espirituwal nga paagi, ug ania ang pipila sa mga butang nga among gibuhat aron matabangan nga mapalig-on ang akong espirituwalidad:

1. Mag-ampo kanunay isip indibiduwal ug pamilya

2. Mohimo og indibidwal ug pamilya nga pagtuon sa kasulatan, ilabi na sa Basahon ni Mormon

3. Mopahigayon og Family Home Evening sa kanunay.

4. Mopalambo sa among mga calling.

5. Motambong sa mga miting ug mga kalihokan sa simbahan.

6. Mohimo og Family History.

7. Mohimo og buhat sa templo: puli nga mga bunyag alang kanako.

8. Motambong og mga klase sa seminary ug institute ug mga kalihokan.

9. Magsulat sa inyong journal

10. Moserbisyo.”

Si Yushin mapasalamaton nga ang iyang mga ginikanan nga si Pete ug Michelle mga returned missionaries. Siya nagtubo nga nakadungog og mga istorya sa maanindot nga mga kasinatian sa misyon sa iyang mga ginikanan ug iyang gipalambo ang tinguha sa pagserbisyo og misyon sa sayo nga edad.

Namulong sa Oktubre 2002 nga kinatibuk-ang komperensiya, si Elder M. Russell Ballard sa Korum sa Napulog Duha ka Apostoles miingon: “Unsa ang atong gikinahanglan karon mao ang labing talagsaong henerasyon sa mga misyonaryo sa kasaysayan sa Simbahan. Kita nagkinahanglan og takos, sarang, maabtik sa espirituhanong paagi nga mga misyonaryo nga, sama sa 2,000 ka batan-ong manggugubat ni Helaman, ‘hilabihan ka walay kahadlok tungod sa pagkaisog, ug usab sa pagkakusgan ug pagkaabtik’ ug kinsa ‘matinud-anon sa tanan nga mga panahon sa bisan unsa nga butang nga gisalig kanila’ (Alma 53:20).” Ang gugma ug supporta sa mga ginikanan ug mga lider sa Simbahan mosiguro nga daghan sa atong nagtubo nga henerasyon, sama ni Yushin, makatuman niini nga tumong.

Mga nota

1. “Samtang Dungan Kita nga Magpadayon sa Unahan,” Liahona, Abr. 2018, 7.