#Bff: Importanteng mga Panghitabo sa 2023 nga Pagsaulog sa Semana sa Pamilya

Ang Nasodnong Semana sa Pamilya usa ka tinuig nga pagsaulog sa Pilipinas nga gimando pinaagi sa Presidensyal Proklamasyon 60 nga gipagawas niadtong Septiyembre 28, 1992 ni kanhi Presidente Fidel V. Ramos. Isip usa sa nag-una nga mga tigpasiugda niini, Ang Simbahan ni Jesukristo sa mga Santos sa Ulahing mga Adlaw nanguna sa Semana sa Pamilya sukad sa sinugdanan niini.

Ania ang pipila ka importante nga mga panghitabo sa pagsaulog niining tuiga:

Sa unang higayon sukad, usa ka pagsugod nga kalihokan uban sa Kapangulohan sa Area ang gipahigayon niadtong Septiyembre 2 didto sa Urdaneta Stake Center sa Pangasinan. Si Elder Steven R. Bangerter ug ang iyang asawa, si Sister Susan Bangerter gikuyogan nila ni Elder Yoon Hwan Choi ug sa iyang asawa nga si Sister Bon Choi, ingon man usab ni Elder Carlos G. Revillo ug sa iyang asawa si Sister Marie Revillo. Kini mao ang unang higayon nga ang Kapangulohan sa Area nakaapil sa usa ka face-to-face nga kalihokan sa Semana sa Pamilya tungod kay kasagaran anaa sila sa Punoang Buhatan sa Simbahan nagtambong og mga miting sa Pagpangulo sa Kinatibuk-ang Awtoridad ug Kinatibuk-ang Opisyales atol sa kataposang semana sa Septiyembre.

“Ang among mga kasingkasing napuno sa pagpasalamat nga moapil uban sa liboan ka miyembro sa Simbahan, ug sa mga dili miyembro usab kinsa miapil sa online nga sibya sa sayong bahin sa Septiyembre,” mipakigbahin si Elder Bangerter. “Ang tinuod nga gitutokan sa atong panagpundok mao ang pagbati sa hingpit nga kalipay nga moabot pinaagi sa dakong Plano sa Kalipay sa atong Langitnong Amahan. Ang Iyang Plano makaphimo sa mga pamilya nga makabaton og paglaom nga ang ilang mahigugmaon nga mga relasyon molungtad latas sa kahangtoran.”

Usa ka #BFF nga Paindigay sa Pagsulat og Awit ug Pagkuha og Litrato ang gipahigayon usab aron sa paghatag og gibug-aton sa tema sa Simbahan nga “Kita makaugmad og mahangtorong mga pamilya pinaagi kang Kristo.” Ang mananaog nga awit gisulat ni Heber Nathaniel Martinez, usa ka Pilipino nga young single adult gikan sa Abu Dhabi. Giulohan og “F.A.M. (Forevers are Made)” ang awit girekord ni Caleb Costales, Daday Baluyot, ug Xia Vigor ug gigamit sa pagtuboy sa Semana sa Pamilya.

Ang mananaog nga litrato, giulohan og “Gibugkos sa Gugma: Yano nga mga Kalipay sa Panaghiusa sa Pamilya luyo sa mga Anino sa Kabukiran” gillitratohan ni Zia Louise Mariano sa Rosario Ward, Agoo Philippines Stake. Ang litrato mihulagway unsaon nato nga makakaplag sa kahayag ni Kristo ug mag-ugmad og mahangtoron nga mga pamilya dili igsapayan sa atong temporal nga mga kahimtang. “…Sa mahagiton nga mga kahimtang ug sa ginagmay nga mga kalamposan, ang tinuod nga debosyon ug gugma mahimong molambo, nagdan-ag gani sa kinangitngitan ug kinahayagan nga mga bahin sa atong mga kinabuhi isip mga indibidwal ug isip usa ka pamilya,” gipasabot sa litratista.

Si Elder Choi mipahalipay sa mga mananaog ug miila kon sa unsang paagi ang pagtutok sa mahangtoron nga pamilya midasig ug mihatag og kaayohan sa tanan. “Salamat sa tanan kinsa miapil ug mitabang kanato nga mobati sa espiritu pinaagi sa ilang mga buhat,” siya midugang.

Ang mga stake ug mga district sa tibuok nasod miorganisar og nagkadaiya nga mga kalihokan sa pakigtambayayong sa kauban nga mga organisasyon sa komunidad. Sa Metro Manila, usa ka #BFF nga Dalan sa Pakigsaad nga Panimpalad sa Pamilya nga panapos nga kalihokan ang gipahigayon sa mga nataran sa konsiyerto sa Mall of Asia niadtong Septiyembre 30.

Liboan ka miyembro gikan sa 30 ka stake sa Metro Manila ug sa naglibot nga mga dapit ang nalingaw sa gitema sa ebanghelyo nga mga dula ug makalingaw nga mga kalihokan. Si Eric “Eruption” Tai kinsa nangulo sa progama uban sa iyang asawa nga si Rona mipakigbahin, “Makatagbaw gayod kaayo nga mahimong kabahin sa Semana sa Pamilya nga mga proyekto sa Simbahan tungod kay makasaulog ko sa duha ka butang nga nagdasig kanako ug naghatag og kahulogan sa akong kinabuhi: akong hugot nga pagtuo ug akong pamilya.”