Bae Oli Stap Laef long Dei Ia
Jisas Kraes i mekem i posibol long yumi blong “stap laef long dei ia.”
Hem i wan dei we i fulap long ol tok stret we i abaot ol parabol, ol defdefren kwestin, mo ol bigfala doktrin. Afta lo wan strong woning we i go long olgeta we oli olsem ol “gref blong dedman we man i pentem i waet i naes, be insaed i fulap long bun blong dedman, wetem bodi blong hem we i roten i stap”1 Jisas i bin tokbaot tri moa parabol abaot fasin blong stap rere long saed blong spirit mo stap wan disaepol. Wan long olgeta hem i parabol blong ol ten yang gel.
“God bambae i tekem niufala wol i kamtru olsem ten yang gel we oli tekem laet blong olgeta, oli go blong mitim man we i jes mared we bambae i kam hom.
“Faef long olgeta oli no waes, be ol narafala faef oli waes.
“Ol faef ya we oli no waes, oli tekem laet blong olgeta, be oli no tekem sam moa karsin wetem olgeta.
“Be olgeta faef ia we oli waes, oli tekem sam botel karsin wetem laet blong olgeta.
“Nao man ya we i jes mared, hem i tektaem tumas, nao ol gel ya oli foldaon mo slip.
“Be long medel naet, wan man i singaot se, ‘!Man ya we i jes mared, bambae i kamtru naoia! !Yufala i kam mitim hem!’
“Nao ol ten gel ya oli wekap, oli klinim ol laet blong olgeta.
“Nao olgeta ya we oli no waes, oli talem long olgeta se, ‘Plis yufala i givim sam karsin long mifala, from we ol laet blong mifala oli emti, klosap oli ded.
“Be olgeta ya we oli waes oli se, ‘No. Karsin ya i no naf blong yumi evriwan. Yufala i mas go long stoa blong pem blong yufala.
“Nao oli go pem karsin blong olgeta. Be taem oli stap longwe yet, man ia we i jes mared i kamtru. Hem i go insaed long haos blong hem, mo ol faef gel ia we oli rere, oli go wetem hem oli joen long kakae blong mared. Nao ol man oli satem doa.
“Biaen ol narafala gel ya oli kambak bakegen, oli singaot se, ‘!Masta, Masta! !Plis yu letem mifala i kam insaed!.2
“Be man we i jes mared, i se, ‘Tru mi talem long yufala, mi mi no save yufala.3
“From hemia, yufala i mas lukaot gud, from we yufala i no save dei blong samting ya mo aoa blong hem.”4
Presiden Dallin H. Oaks i givim wan tingting blong stopem ol kwestin we i go wetem taem we Man blong Mared bae i stap kam:5 “Wanem bae i hapen sapos Hem i stap kam tumoro? Sapos yumi stap save finis se bae Lod i kam tumoro—tru long wan eli ded blong yumi, o tru dei ia blong Hem we yumi stap wet from—?bae yumi mekem wanem tedei?”6
Mi bin lanem long eksperiens blong miwan se, fasin blong rere long saed blong spirit from dei we Lod bae i kam i no impoten nomo, be hem i wei ia nomo blong faenem tru pis mo glad.
Hem i wan dei we ples i kolkol mo san i saen gud we fastaem mi harem toktok ia “Yu gat kansa.” !Mi mo hasban blong mi i sek bigwan! Taem mitufala i stap draev i go hom, ples i kwaet from nius ia i stap raonraon long tingting blong mitufala, hat blong mi i tanem i go long ol trifala pikinini boe blong mitufala.
Long maen blong mi, mi askem Papa long Heven, “?Bae mi mi ded ia?”
Tabu Spirit i talem kwaet long mi, “Evri samting bae i Oraet.”
Afta mi askem, “?Bae mi mi gohed blong stap laef?”
Ansa i kam bakegen, “Evri samting bae i Oraet.”
Tingting blong mi i fasfas. ?From mi wanem mi kasem semmak ansa ia nomo nomata bae mi laef o ded?
Sot taem afta, evri pat blong mi insaed i fulap wetem pis we i fulwan olsem we oli rimaenem mi: Mitufala i no nid blong go ariap long haos mo tijim ol pikinini blong mitufala olsem wanem blong prea. Oli bin save olsem wanem blong kasem ol ansa mo kamfot tru long prea. Mitufala i no nid blong go hariap long haos blong tijim olgeta abaot ol skripja o ol toktok blong ol profet we oli stap laef. Ol toktok oli bin stap mo save finis olsem wan ples we oli save kasem paoa mo andasting. Mitufala i no nid blong go hariap long haos blong tijim olgeta abaot fasin blong sakem sin, Laef Bakegen long Ded, Restoresen, plan ia blong sevem man, ol famli we i no save finis o stret doktrin blong Jisas Kraes.
Long taem ia, evri famli haos naet lesen, skripja stadi sesen, prea we oli givim, blesing we oli givim, testemoni we oli serem, kavenan we oli mekem mo kipim, ol taem we oli go long haos blong Lod, mo fasin blong kipim Sabat dei oli impoten—!O, hamas oli impoten tumas! Hem i let tumas blong putum oel insaed long laet blong mifala. !Mifala i nidim evri wanwan long ol drop, mo mifala i nidim naoia!
Tru long Jisas Kraes mo restoresen blong gospel blong Hem, sapos mi ded, famli blong mi bae oli gat kamfot, paoa mo wan dei bae oli kam tugeta. Sapos mi stap laef, bae mi save kasem bigfala paoa long wol ia blong givhan, sapotem mo mekem mi kam oraet. Long en, from tru long Jisas Kraes, evri samting bae i oraet.
Mifala i lanem long wan gudfala stadi blong Doktrin mo Ol Kavenan, wanem “Oraet” i minim:
“Mo long dei ia, taem bae mi kam long glori blong mi, parabol ia bae i hapen, we mi bin talem long saed blong ol ten yangfala gel ia we oli neva go wetem man yet.
“From olgeta we oli waes mo oli bin akseptem trutok, mo oli bin tekem Tabu Spirit olsem gaed blong olgeta, mo oli no bin folem ol giaman toktok—i tru, mi talem long yufala, bambae mi no katemdaon olgeta mo no sakem olgeta i go long faea, be bae oli stap laef long dei ia.”7
Jisas Kraes i mekem i posibol long yumi blong “stap laef long dei ia.” Blong stap laef long dei ia i no minim blong stap ademap wan long wan lis ol samting blong mekem we i stap go antap nomo. Tingting long wan glas we i save luk klia ol smol samting. Stamba wok blong hem i no simpol nomo we i blong luk ol samting i kam bigwan. Hem i save karem i kam tugeta mo lukluk nomo tu long laet blong mekem i gat moa paoa. Yumi nid blong mekem i kam simpol, luk nomo long ol efot, mo stap ol man o woman blong karem i kam tugeta Laet blong Jisas Kraes. Yumi nidim moa eksperiens we oli tabu mo tru long revelesen.
Long not wes Isrel, i gat wan naesfala bigfala hil we i stap wetem ol narafala hil we oli singaotem “Bigfala hil blong Eva Grin.” Bigfala hil ia Kamel8 i stap grin truaot long evri yia, speseli long pat we i stap wetwet oltaem. Evri dei oli gat kaekae mo stap gro. Semmak olsem “ol wetwet ples blong Bigfala Hil Kamel,”9 taem yumi lukaotem blong fidim sol blong yumi “wetem ol samting long saed blong stret mo gud fasin,”10 ol smol mo simpol samting,”11 ol testemoni mo ol testemoni blong ol pikinini blong yumi bae oli laef i stap!
Naoia bae yu stap tingting se, “Be Sista Wright, yu save famli blong mi. Mifala i stap traehad mo no luk eni samting olsem.” Yu talem tru. Mi no save famli blong yu. Be wan God we i gat lav we i no gat en, sore, paoa, save, mo glori, Hem i save.
Ol kwestin we yu save stap askem hem i ol kwestin we i kam long hat we i soa dip insaed long sol blong yu. Semmak kwestin ia oli stap insaed long ol tabu skripja:
“!Masta,!Bambae yumi lus nao, ?be yu yu no wari nating [long famli blong mi]!?”12
“?Weples nao mi save putum tingting blong mi i stap long hem?”13
“Wanem nao bae [mi] mas mekem blong mekem se klaod blong tudak ia i save kamaot blong i nomo kavremap [mi]?”14
“?Be weples nao bambae yumi save faenem waestok long hem?”15
“?Hao nao i save hapen se [mi] i save holemtaet evri gud samting?”16
“Lod, ?Wanem samting we Yu wantem [mi] mas mekem?”17
Mo afta, evri swit ansa i kam se:
“?Yu biliv long paoa blong Kraes, blong kasem fasin blong sevem man?”18
“Luk, ?Lod i givim oda o no, long eni man se oli no mas tekem pat blong gud fasin blong hem?”19
“[Yufala] i bilif se [Mi] save mekem samting ya?”20
“?Yu yu bilif long ol tok blong ol profet?”21
“?Yufala i stap praktisim fet long fasin blong pemaot man, we i kam long hem we i bin mekem yufala?”22
“?Yu yu man blong jajem olgeta man blong wol?”23
Ol dia fren blong mi, yumi no save serem oel blong yumi, be yumi save serem laet blong Hem Oel long laet blong yumi bae i no helpem yumi nomo blong “stap laef long dei ia” be i save stap olsem ol samting blong kliarem rod we i lid i go long olgeta we yumi lavem, oli go long Sevya, we i stanap rere wetem ol han blong hem “we oli open rere blong akseptem” olgeta.24
“Nao mi mi talem long hem se yu no moa krae, yu waepemgud wota blong ae blong yu, from we bambae yu gat pei from ol wok blong yu we yu mekem Ol pikinini ya blong yu bambae oli aot long ples blong ol enemi blong olgeta.
“Yu mas putum tingting blong yu i stap strong long ol samting ya we bambae i kamtrufrom we ol pikinini blong yu bambae oli mas kambak bakegen long stret ples blong olgeta.”25
Jisas Kraes hem i “hop ia long en.” I no gat samting we yumi gat o no bin mekem, i moa o i kasem mak blong sakrifaes blong Hem we i no gat en mo i no save finis. Hem nao i risen ia se from wanem i neva gat en blong stori blong yumi.26 “From hemia, yufala i mas wokbaot i go fored wetem strong bilif long Kraes, wetem wan stret mo klin hop,mo wan lav blong God mo blong evri man. From samting ia, sapos [yumi] gohed strong, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae [yumi] kasem laef we i no save finis.”27
Laef we i no save finis hem i glad we i no save finis. Glad blong laef ia, naoia—nomata ol jalenj blong dei blong yumi, be from help blong Lod blong lanem samting aot long olgeta mo long en winim olgeta—mo glad we i no gat en bae i kam long laef we i stap kam. Ol wota blong ae bae oli drae, ol hat we i brok bae oli joenem, wanem we i lus bae oli faenem, ol wari bae oli stretem, ol famli bae oli kambak tugeta bakegen, mo evri samting we Papa i gat, bae oli blong yumi.28
Lukluk long Jisas mo stap laef29 hemia i testemoni blong mi long tabu nem blong Hem we God i lavem tumas, “Man blong lukaot long Sipsip mo Bisop blong sol blong [yumi],”30 long nem blongJisas Kraes, amen.