2023
Trutok we I No Save Finis
Novemba 2023
10:40

Trutok we I No Save Finis

I Kam long Elda Jon C. Pingree Jr.

Blong Olgeta Seventi

!Nid ia blong luksave trutok i impoten tumas naoia bitim bifo!

Ol brata mo sista, tangkyu blong fetful long God Papa mo long Pikinini blong Hem, Jisas Kraes, mo tangkyu from lav blong yufala mo seves we yufala stap givim long wanwan long yufala. !I tru se yufala i naes tumas!

Fas Toktok

Afta we waef blong mi, Anne mo mi i kasem wan koling blong givim seves olsem wan fultaem misin lida, famli blong mifala oli tingting blong lanem nem blong wanwan misinari bifo oli kasem ples blong go. Mifala i karem ol foto, mekem ol smosmol kad mo stat blong stadi long ol fes mo lanem baehat ol nem.

Taem mifala i kasem ples ia, mifala i mekem ol konfrens blong introdiusum ol misinari. Taem mifala i stap toktok wetem ol narawan, mi save harem boe blong mitufala we i gat naen yia i stap talem:

“!Sam, !i gud tumas blong luk yu!”

“Rachel, ?Yu blong wea?”

“!Wao, David, yu longfala we!”

From mi wari, mi go long pikinini blong mitufala mo talem slo long hem, “eh, bae yumi tingbaot blong singaotem ol misinari olsem Elda o Sista.”

Hem i lukluk long mi mo konfius mo talem, “Papa mi ting se yumi bin lanem baehat ol nemblong olgeta.” Pikinini boe blong mitufala i mekem folem wanem hem i ting se i stret long wanem hem i andastanem.

So, ?Wanem nao yumi andastanem abaot trutok long wol tedei? Yumi gohed blong stap fesem ol atak, tru long ol strong bilif blong man, talem nogud narafala man, mo ol tritmen we i no stret. Long semtaem, ol buk mo ol ples blong ol infomesen i stap kam antap kwiktaem. !Nid ia blong luksave trutok i impoten tumas naoia bitim bifo!

Trutok i wan had samting long yumi blong bildimap mo mekem rilsensip blong yumi wetem God i kam strong moa, faenem pis mo glad, mo kasem tabu paoa blong yumi. Tedei bae yumi tokbaot ol kwestin ia:

  • ?Wanem i trutok, mo from wanem hem i impoten?

  • ?Olsem wanem nao yumi faenem trutok?

  • Taem yumi faenem trutok, ?olsem wanem nao yumi save serem?

Trutok We I No Save Finis

Lod i bin tijim yumi insaed long ol skripja se “trutok i save long ol samting olsem we oli stap, mo olsem we oli bin stap, mo olsem we bambae oli kam blong stap” (Doktrin mo Ol Kavenan 93:24). Trutok, i no gat wan i krietem o mekem,” (Doktrin mo Ol Kavenan 93:29) mo i “no gat en” (Doktrin mo Ol Kavenan 88:66).1 Trutok i stret gud, i no save jenis, mo oli no save mekem jenis long hem. Long narafala toktok, trutok i no save finis.2

Trutok i helpem yumi blong winim giaman,3 luksave samting we i gud mo wanem we i ivel,4 kasem proteksen,5 mo faenem kamfot mo hiling.6 Trutok i save lidim ol aksen blong yu tu,7 mekem yumi fri,8 mekem yumi tabu,9 mo lidim yumi blong kasem laef we i no save finis.10

God I Taltalemaot Trutok we I No Save Finis

God i talemaot trutok we stadi no save finis tru long wan netwok blong ol revelesen rilesensip we i gat tu Hemwan, Jisas Kraes, Tabu Spirit, ol profet mo yumi. Letem yumi toktok raon long ol rol blong wanwan long olgeta we oli pat, we nomata oli defdefren long ol wok we oli mekem long rod ia.

Faswan, God, Hem i stamba blong evri trutok we i no save finis.11 Hem mo Pikinini blong Hem Jisas Kraes, Tufala i wan12 long save blong Tufala we i stret evriwan long trutok mo oltaem tekem aksen folem ol tru prinsipol mo loa we oli wok tugeta.13 Paoa ia i letem Olgeta blong krietem mo rulum ol wol14 mo tu, blong lavem, lidim mo givhan long wanwan long yumi i stret evri wan.15 Tufala i wantem yumi blong andastanem mo yusum trutok, mekem se yumi save stap glad long ol blesing blong Tufala.16 Olgeta oli save givim trutok long wan o oltaem, tru long ol mesenja olsem Tabu Spirit, ol enjel, ol ol profet we oli stap laef.

Nambatu, Tabu Spirit i testifae abaot evri trutok.17 Hem i talemaot stret long yumi ol trutok mo i witnesem trutok we oli narawan oli tijim. Long plante wei, ol tingting mo ol filing we Spirit i givim oli kam olsem ol tingting long maen blong yumi mo ol filing we stadi kam long hat blong yumi.18

Nambatri, ol profet oli kasem trutok i kam long God mo serem trutok ia wetem yumi.19 Yumi lanem trutok long ol profet blong bifo insaed long ol skripja20 mo tru long ol profet we oli stap laef long jeneral konfrens mo tru ol narafala ofisol janel.

Laswan, yu mo mi i mekem wan pat we i impoten tumas long rod ia. God i wantem yumi blong stap lukaotem, luksave mo tekem aksen folem trutok. Janis blong yumi blong kasem mo yusum trutok i dipen long paoa blong rilesensip blong yumi wetem Papa mo Pikinini blong Hem, olsem wanem yumi akseptem Tabu Spirit, mo ol profet blong yumi blong Ol las dei.

Yumi nid blong tingabaot se Setan i stap wok blong mekem yumi no luksave trutok. Hem i save se sapos i no gat trutok, yumi no save kasem laef we i no save finis. Hem i tantanem trutok wetem ol tingting blong man long wol blong mekem yumi konfius mo pulum tingting blong yumi i go longwe long wanem we God i wantem talem long yumi.21

Stap Lukaotem, Luksave mo Stap Yusum Trutok we I No Save Finis

Taem yumi lukaotem trutok we i no save finis,21 tufala kwestin ia i save helpem yumi blong luksave se wan aedia ia i kam long God o long wan narafala ples:

  • ?Aedia ia, ol skripja oli tijim oltaem o tru ol profet we oli stap laef?

  • ?Tabu Spirit i witnesem mo konfemem aedia ia?

God i talemaot ol trutok blong doktin tru ol profet, mo Tabu Spirit i konfemem ol trutok ia long yumi mo helpem yumi blong yusum olgeta.21 Yumi mas lukaotem mo stap rere blong kasem ol tingting mo filing ia long saed blong spirit taem oli kam.24 Taem yumi putum tingting i stap daon, plante taem bae yumi save luksave witnes blong Spirit,19 prea wetem tru tingting mo stadi long toktok blong God,20 mo obei ol komanmen blong Hem.21

Long taem ia we Tabu Spirit i konfemem wan spesel trutok long yumi, save blong yumi i kam bigwan taem yumi praktisim prinsibol ia. Oltaem taem yumi stap laef folem prinsipol ia, yumi kasem wan tru save abaot trutok we i stap insaed.28

Eksampol, mi bin mekem ol mistek mo filim se mi rigret from ol pua joes we mi mekem. Be tru long prea, stadi mo fet long Jisas Kraes, mi kasem wan witnes abaot prinsipol blong fasin blong sakem sin.29 Taem mi gohed blong sakem sin, save blong mi blong andastanem gospel i kam antap moa strong. Mi filim moa kolosap long God mo Pikinini blong Hem. Naoia mi save fogvines blong sin, i kam tru long Jisas Kraes, from se mi kasem eksperiens blong ol blesing blong fasin blong sakem sin evri dei.24

Blong Stap Trastem God Taem Oli No Taltalemaot Trutok Yet

So, ?wanem nao yumi mas mekem sapos yumi lukaotem trutok wetem tru hat we oli no talemaot yet? Mi andastanem filing blong sam long yumi we oli wet longtaem tumas from ol ansa we oli no stap kam nomo.

Long Josef Smit, Lod i kaonsel, “stap kwaet kasem taem we mi luk we i stret blong yu mekem evri samting i kamaot … long saed blong wok ia” (Doktrin mo Ol Kavenan 10:37).

Mo long Ema, Hem eskplenem, “No komplen from ol samting we yu yu no luk yet, from we mi haedem olgeta long yu mo long wol, we bae mi luk se i waes long mi long wan taem we bambae i kam yet.” (Doktrin mo Ol Kavenan 25:4).

Mi tu mi bin lukaotem ol ansa blong kwestin we i kam stap insaed long hat blong mi. Plante ansa oli bin kam, be sam no yet.31 Taem yumi stap kwaet—stap trastem waes tingting blong God mo lav, obei ol komanmen blong Hem, mo stap dipen long wanem we yumi save—Hem i helpem yumi blong faenem pis kasem Hem i talemaot trutok blong evri samting.31

Stap Andastanem Doktrin mo Polisi

Taem yumi stap lukaotem trutok, i help blong andastanem wanem we i diferen bitwin doktrin mo polisi. Doktrin i minim Trutok we I No Save Finis, olsem fasin blong Gohed, plan ia blong fasin blong sevem man, atonmen mo sakrifaes blong Jisas Kraes. Polisi hem i olsem wanem yumi yusum doktrin folem ol situesen blong taem tedei. Polisi i stap helpem yumi blong givhan long Jos long wei we i folem oda.

From se doktrin oli neva jenis, ol polisi oli save jenis samtaem. Lod i wok tru ol profet blong Hem blong sapotem doktrin blong Hem mo blong mekem ol smosmol jenis folem ol nid blong ol pikinini blong Hem.

Be, samtaem yumi stap konfiusum polisi wetem doktrin. Sapos yumi no andastanem wanem we i defren long tufala, yumi stap long denja we i mekem se taem ol polisi i jenis, mo bae oli save stat askem kwestin long saed blong waes tingting blong God o wok blong revelesen we ol profet oli kasem.33

Stap Tijim Trutok we I No Save Finis

Taem yumi kasem trutok we i kam long God, Hem i leftemap tingting blong yumi blong serem save ia wetem ol narawan.34 Yumi mekem hemia taem yumi tijim wan klas, lidim wan pikinini, o tokbaot ol trutok blong gospel wetem wan fren.

Gol blong yumi i blong tijim trutok long wan wei we i stap invaetem paoa blong jenisim man we i kam tru long Tabu Spirit blong jenisim wan35 Bae mi serem sam simpol invitesen we i kam long Lod mo ol profet blong Hem we bae i save help.36

  1. Long medel blong Papa long Heven, Jisas Kraes mo stamba doktrin blong Tufala.36

  2. Stanap strong strong mo folem ol skripja mo ol tijing blong ol profet blong ol las dei.38

  3. Dipen long doktrin we oli putum tru long plante witnes we oli gat atoriti.39

  4. Stap longwe long ol tingting we i no gat pruf, ol tingting blong yuwan, o ol aedia blong wol.40

  5. Tijim wan stamba tingting blong doktrin we i stap insaed long ol toktok we i go wetem ol trutok blong gospel.41

  6. Yusum ol wei blong tijing we i invaetem paaoa blong Spirit.42

  7. Taem yu toktok, mekem i klia blong stopem tingting we i no klia.43

Stap Toktbaot Trutok wetem Lav

Olsem wanem yumi tijim trutok, hem i impoten tumas. Pol i leftemap tingting blong yumi blong tokboat “trutok wetem lav” (luk long Efesas 4:14–15). Trutok hem i bes janis blong blesem wan narawan taem yumi givim wetem lav olsem hemia blong Kraes.44

Trutok we oli no tijim wetem lav, i save krietem ol filing blong jajem man, tingting i kam slak mo filim se yu stap yuwan. Oltaem hemia i lid i go long ol filing blong harem nogud tumas mo seraot—iven raorao. Wanem we i defren i we, sapos lav i no gat long trutok, i no gat valiu mo i no gat promes se man i save kam antap.

Tugeta trutok mo lav, tufala i impoten blong yumi kam antap long saed blong spirit.45 Trutok i givim doktrin, ol prinsipol mo ol loa we i yumi nidim blong kasem laef we i no save finis, mo lav i mekem yumi filim paoa ia we yumi nidim blong holemtaet mo tekem aksen folem wanem we i tru.

Bae mi oltaem talem tangkyu long olgeta we oli gat fasin blong stap wet longtaem blong save tijim mi abaot Trutok we I No Save Finis wetem lav.

Las Toktok

Blong endem toktok blong mi, bae mi serem Trutok we I No Save Finis we i bin kam wan angka long sol blong mi. Mi bin kam blong save ol trutok ia taem mi stap folem ol prinsipol we ol tokbaot tedei.

Mi save se God i Papa blong yumi long Heven.46 Hem i fulap long save,47 evri paoa,48 mo i gat lav we i stret evriwan.49 Hem i krietem wan plan blong yumi blong save kasem laef we i no save finis mo kam olsem Hem.50

Olsem pat blong plan ia, Hem i sendem Pikinini blong Hem, Jisas Kraes, blong helpem yumi.51 Jisas i tijim yumi blong mekem tingting blong Papa51 mo blong lavem wanwan long yumi.53 Hem i ded long kros from ol sin blong yumi53 mo akseptem blong givim laef blong Hem long kros from yumi.54 Hem i girap bakegen long ded afta long tri dei.56 Tru long Kraes mo gladhat blong Hem, bae yumi laef bakegen long ded,57 yumi save kasem fogivnes,58 mo yumi save faenem paoalong hadtaem.59

Long taem blong seves blong Hem long wol, Jisas i stanemap jos blong Hem.60 Afta sam taem i pas,Jos ia i jenis, mo ol trutok oli lus.61 Jisas Kraes i putumabk Jos blong Hem mo ol trutok blong gospel tru long profet Josef Smit.62 Mo tedei, Kraes i gohed blong lidim Jos blong Hem tru ol profet we oli stap laef mo ol aposol.63

Mi save se taem yumi kam long Kraes long en bae yumi save “kam stret evriwan tru hem” (Moronae 10:32), kasem “wan glad we i fulwan” (Doktrin mo Ol Kavenan 93:33), mo kasem “evri samting we Papa i gat” (Doktrin mo Ol Kavenan 84:38). From ol trutok ia we i no save finis, mi talem witnes long tabu nem blong Jisas Kraes, amen.

Ol Not

  1. Luk tu long Ol Sam 117:2; Doktrin mo Ol Kavenan 1:39.

  2. Wanem we i defren long sam long tingting we oli fasfas ia i we, i tru i gat sam we i save raet mo rong. I rili gat wan trutok we i tru evriwan—trutok we i no save finis. Wan long ol bigfala sik blong tedei, i we, i no gat inaf pipol we oli save weaples blong tanem olgeta blong faenem trutok” (Russell M. Nelson, “Trutok we I Stret Gud, Doktrin we I Stret Gud, mo Revelesen we I Stret Gud,” Liahona, Novemba 2021, 6).

  3. Luk long Joseph Smith—Matiu 1:37.

  4. Luk long Moronae 7:19

  5. Luk long 2 Nifae 1:9; Doktrin mo Ol Kavenan 17:8.

  6. Luk long Jekob 2:8.

  7. Luk long Ol Sam 119:105; 2 Nifae 32:3.

  8. Luk long Jon 8:32; Doktrin mo Ol Kavenan 98:8.

  9. Luk long Jon 17:17.

  10. Luk long 2 Nifae 31:20.

  11. Luk long Doktrin mo Ol Kavena 88:11–13; 93:36.

  12. Luk long Jon 5:19–20; 7:16; 8:26; 18:37; Moses 1:6.

  13. Luk long Alma 42:12–26; Doktrin mo Ol Kavenan 88:41.

  14. Luk long Moses 1:30–39.

  15. Luk long 2 Nifae 26:24.

  16. Luk long Doktrin mo Ol Kavenan 82:8–9.

  17. Luk long Jon 16:13; Jekob 4:13; Moronae 10:5; Doktrin mo Ol Kavenan 50:14; 75:10; 76:12; 91:4; 124:97.

  18. Luk long Doktrin mo Ol Kavenan 6:22–23; 8:2–3.

  19. Luk long Jeremaea 1:5, 7; Amos 3:7; Matiu 28:16–20; Moronae 7:31; Doktrin mo Ol Kavenan 1:38; 21:4–6; 43:1–7. Wan profet hem i wan “man we God i singaotem mo hem i toktok long bihaf blong God. Olsem wan mesenja blong God, wan profet i kasem ol komanmen, ol profesi, mo ol revelesen we i kam long God. Responsabiliti blong hem i blong hem i talemaot tingting blong God mo fasin blong God long evri man mo blong soem mining blong ol samting we Hem i stap mekem wetem olgeta. Wan profet i talemaot wanem i sin, mo i talemaot fastaem wanem nao risal blong hem. Hem i wan man blong prijim stret mo gud fasin. Long sam taem, ol profet i save kasem toktok blong talemaot wanem bae i tekem ples long fiuja blong mekem se ol man oli save stap gud. Be, fas responsabiliti blong Hem, i blong stap olsem wan witnes blong Kraes. Presiden blong Jos Ia blong Jisas Kraes blong Ol Lata-dei Sent i profet blong God long wol tedei. Ol memba blong Fas Presidensi mo Olgeta Twelef Aposol olisastenem olgeta olsem ol profet, ol sia, mo ol reveleta” (Gaed long Ol Skripja, “Profet,” Gospel Laebri). Ol eksampol blong hemia oli stap long ol laef blong Adam (Luk long Moses 6:51–62), Inok (Luk long Moses 6:26–36), Noah (Luk long Moses 8:19, 23–24), Ebraham (Luk long Jenesis 12:1–3; Ebraham 2:8–9), Moses (Luk long Exodus 3:1–15; Moses 1:1–6, 25–26), Pita (Luk long Matiu 16:13–19), mo Joseph Smith (Luk long Doktrin mo Ol Kavenan 5:6–10; 20:2; 21:4–6).

  20. Luk long 2 Timoti 3:16.

  21. Luk long Jon 8:44; 2 Nifae 2:18; Doktrin mo Ol Kavenan 93:39; Moses 4:4.

  22. Luk long 1 Nifae 10:19. Presiden Dallin H. Oaksi givim intraksen: “Yumi nid blong yumi mas lukaotgud taem yumi stap lukaotem trutok blong [God] mo jusum ol ples we yumi go lukaotem infomesen ia. Yumi no mas tekem se fasin blong kam popula o gat atoriti, ol wan stret ples. Taem yumi lukaotem trutok abaot relijin, yumi mas yusum ol wei long saed blong spirit blong lukaotem hemia: prea, witnes blong Tabu Spirit, mo stadi long ol skripja mo ol toktok blong ol profet blong tedei” (“Truth mo the Plan,” Liahona, Nov. 2018, 25).

  23. Elda D. Todd Christofferson i bin tijim: “Ol Aposol mo ol profet … oli talemaot toktok blong God, be blong ademap long hemia, long nomol wei, yumi bilivim se ol man mo ol woman, iven ol pikinini oli save lanem long mo stap kasem Tabu Spirit blong lidim olgeta tru tabu insperesen we i kam olsem ansa blong prea mo blong stap stadi long ol skripja Ol memba blong Jos Ia blong Jisas blong Ol Lata-dei Sent oli kasem presen ia we i Tabu Spirit, we wok blong Hem i blong stap toktok wetem Papa blong Olgeta long Heven we i gogohed blong hapen Hemia i no blong talem se evr memba oli stap toktok blong Jos o save talem mining blong ol doktrin be, se evri wan oli save kasem tabu spirit i lidim olgeta long taem oli stap fesem ol jalenj mo ol janis we i kam long laef blong olgeta” (“The Doctrine of Christ,” Liahona, May 2012, 89–90, note 2).

  24. Luk long 2 Nifae 33:1–2.

  25. Luk long Doktrin mo Ol Kavenan 1:28.

  26. Luk long Moronae 10:3–5; Doktrin mo Ol Kavenan 9:7–9; 84:85.

  27. Luk long Doktrin mo Ol Kavenan 5:35; 63:23; 93:27–28. Nomata ol strong efot blong yumi, sam long yumi oli stap traehad yet blong filim Spirit from tingting mo helt blong bodi we i no strong. Filing blong harem nogud mo wari, ol narafala situesen blong sik long tingting i save ademap ol samting we i mekem se yu no save luksave Tabu Spirit. Long ol kaen situesen olsem, Lod i stap invaetem yumi blong gohed blong laef folem gospel, mo Hem bae i blesem yumi (Luk long Mosaea 2:41). Yumi save lukaotem sam moa aktiviti—olsem blong stap lisin long ol tabu miusik, stap bisi wetem ol wok blong seves, o spenem taem wetem ol samting we oli gat laef we oli stap raonem yumi—we oli helpem yumi blong filim ol blesing we oli kam tru long Sprit (luk long Galesia 5:22–23) mo mekem koneksen blong yumi long God i kam moa strong.

    Elda Jeffrey R. Hollmo givim tingting se: “So, ?olsem wanem nao yumi akseptem ol jalenj we oli kam tru long sik long tingting o long ol filing we oli kam long yu o olgeta we yu lavem? Wanem we i moa impoten long evri samting i we, neva lusum fet long Papa blong yu long Heven, we i lavem yu moa bitim we yu save Gohed blong stap fetful long taem we oli testem fet blong yu we i tekem Spirit blong Lod i kam long laef blong yu. Lukaotem kaonsel we i kam long olgeta we oli holem ol ki blong helpem laef blong yu long saed blog spirit. Askem mo stap glad long ol blesing blong prishud. Tekem sakramen evri wik, mo stanap strong blong stap stret gud evri wan from ol blesing blong Atonmen blong Jisas Kraes. Bilivim ol merikel. Mi bin luk plante long olgeta oli kam taem we evri narafala samting bae oli soem se hop i lus. Hope is never lost” (“Like a Broken Vessel,” Liahona, Nov. 2013, 40–41).

  28. Luk long Jon 7:17; Alma 32:26–34. Long en, God i wantem yumi blong kasem trutok “tijing folem tijing, rul folem rul,” kasem yumi andastanem evri samting (luk long Ol Proveb 28:5; 2 Nifae 28:30; Doktrin mo Ol Kavenan 88:67; 93:28).

  29. Luk long 1 Jon 1:9–10; 2:1–2.

  30. Olsem we Presiden Russell M. Nelson i bin eksplenem: “Blong save progres, i no gat wan samting we i mekem yumi moa fri, gat moa gud fasin, o i moa impoten bitim blong stap lukluk evri dei long fasin blong sakem sin. Blong sakem sin, i no wan spesel taem; hem i wan rod blong folfolem. Hem i ki blong hapines mo pis long maen. Taem yumi yusum wetem fet, fasin blong sakem sin i openem doa blong yumi kasem paoa blong Atonmen blong Jisas Kraes” (“Yumi Save Mekem Gud Moa mo Stap Gud Moa,” Liahona, Mei 2019, 67).

  31. Mi no save evri risen from wanem God i holembak sam trutok we i no save finis long yumi, be Elda Orson F. Whitney i givim wan niu tingting we bae yumi intres long hem: “Hem i wan blesing blong bilivim samting we yu no luk, from tru long taem yu praktisim fet, bae yu kam antap long saed blong spirit, wan long ol bigfala wok blong wan man o woman we i save laef long wol; be olsem save i stap solemdaon fet, i stopem blong man i stap yusum, from hemia, i stap stopem wan blong kam antap. ‘Save hem i paoa;’ mo evri samting, man i mas kam blong save long stret taem. Be save we i kam bifo taem blong hem—blong stap save samting long rong taem—i save kilim tugeta progres mo hapines blong man” (“The Divinity of Jesus Christ,” Improvement Era, Jan. 1926, 222; luk tu long Liahona, Dec. 2003, 14–15).

  32. Luk long Doktrin mo Ol Kavenan 76:5–10. Lod i givim kaonsel long Hyrum Smith “No lukaot blong talemaot toktok blong mi, be festaem, lukaot blong kasem toktok blong mi. Stap kwaet [mo] stadi long toktok blong mi” (Doktrin mo Ol Kavenan 11:21–22). Profet Alma i givim wan eksampol blong olsem wanem yumi save stap kwaet long taem we yumi no kasem ol ansa blong ol kwestin blong yumi: “Ol sikret ia, oli no soemaot fulwan long mi yet; from hemia bae mi nomo tokbaot samting ia” (Alma 37:11). Mo tu, hem i eksplenem long pikinini boe blong hem Korianton se “i gat plante sikret we oli kipim i stap, mekem se i no gat wan man i save ol samting ia, be God nomo.” (Alma 40:3 Mo tu, mi bin faenem paoa long ansa blong Nifae taem oli askem wan kwestin long hem we hem i no save ansarem: Mi save se [God] i lavem ol pikinini blong hem; be, mi no save mining blong evri samting” (1 Nifae 11:17

  33. I semmak olsem we ol kalja tredisen oli no doktrin o polisi. Oli save help bigwan sapos oli helpem yumi folem doktrin mo polisi, mo tu, oli save mekem progres blong yumi i slo long saed blong spirit sapos oli no folem ol tru prinsipol. Yumi mas stap longwe long ol tredisen we oli no bildimap fet long Jisas Kraes blong yumi o helpem yumi blong progres i go kasem laef we i no save finis.

  34. Luk long Doktrin mo Ol Kavenan 15:5; 88:77–78.

  35. Luk long Doktrin mo Ol Kavenan 50:21–23.

  36. Oli kareamot long pepa blong “Principles for Ensuring Doctrinal Purity,” we Fas Presidensi mo Kworom blong Olgeta Twelef Aposol oli apruvum long Febware 2023.

  37. Luk long 1 Nifae 15:14. Lod i givim daereksen long ol wokman blong Hem blong stop blong stap lukluk nomo long ol tenet o ol aedia we oli no stmaba long gospel blong Hem: “Mo long ol tenet, bae yu no tokbaot, be yu mas talemaot fasin blong sakem sin mo fet long Sevya, mo fasin blong kam klin aot long ol sin tru long baptaes, mo tru long faea, yes, we i Tabu Spirit” (Doktrin mo Ol Kavenan 19:31).

    Elda Niel L. moersen i eksplenem: “Bae yumi lukluk nomo long Sevya, Jisas Kraes, mo presen ia we i sakrifaes we i pem praes blong sin. Hemia i no minim se yumi no save talemaot eksperiens blong laef blong yumi, o serem ol tingting we i kam long wan narawan. Ol topik blong yumi, maet i abaot ol famli, o ol seves, o ol tempol, o wan misin we i jes pas, evri samting mas poenem rod long Lod Jisas Kraes(““Yumi Toktok abaot Kraes,” Liahona, Novemba 2020, 89–90).

  38. Luk long Doktrin mo Ol Kavenan 28:2–3, 8. Profet Alama i wonem olgeta we oli apoenem blong go prijim gospel blong “oli no mas tijim eni samting be ol samting nomo we hem i bin tijim, mo we oli bin kamaot long maot blong ol tabu profet” (Mosaea 18:19).

    Presiden Henry B. Eyring i talemaot, “Yumi mas tijim ol stamba doktrin blong Jos olsem we oli stap insaed long ol stmoed wok mo ol tijing blong ol profet we responsabiliti blong olgeta i blong talemaot doktrin” (“The Lord Will Multiply the Harvest” evening with a General Authority, Feb. 6, 1998], in Teaching Seminary: Preservice Readings [2004], 96).

    Elda D. Todd Christofferson i testifae “insaed long Jos tedei, semmak nomo olsem long taem bifo, oli stap stanemap doktrin blong Kraes o oli stap stretem ol doktrin we i stap lus tru long tabu revelesen we i kam long olgeta we Lod i givim atoriti blong aposol long olgeta” (“The Doctrine of Christ,” 86).

  39. Luk long 2 Korin 13:1; 2 Nifae 11:3; Ita 5:4; Doktrin mo Ol Kavenan 6:28. Elda Neil L. moersen i faenemaot se: “sam man oli askem kwestin abaot bilif blong olgeta taem oli faenem wan stetmen we Jos i bin mekem tru long wan lida hmored yia i pas we i defren long doktrin blong yumi. I gat wan impoten prinsipol we i kontrolem doktrin blong Jos. Doktrin ia, evri 15 memba blong Fas Presidensi mo Kworom blong Olgeta Twelef Aposol oli stap tijim. Hemia i no haed long wan paragraf blong wan toktok. Plante taem plante man oli stap tijim ol tru prinsipol. Doktrin blong yumi i no had blong faenem” (“Trial of Your Faith,” Liahona, Nov. 2012, 41).

    Elda D. Todd Christofferson i tijim semmak: “Yumi mas tingbaot se i no evri toktok we wan lida blong Jos i talem, blong bifo o tedei, we i minim se hemia nao doktrin. Yumi evriwan i andastanem moa se, insaed long Jos, se wan toktok we wan lida i bin talem long wan taem nomo, plante taem, i stap olsem wan tingting blong hemwan, be i no minim se i ofisol o ful Jos i mas folem” (“The Doctrine of Christ,” 88).

  40. Luk long 3 Nifae 11:32, 40. Presiden Gordon B. Hinckley said: “Mi bin tokbaot bifo abaot hamas taem yumi kipim ol doktrin blong Jos wetem klin fasin, i impoten tumas Mi wari abaot hemia. Smol samting we i defren insaed long tijing blong doktrin i save lid i go long bigfala mo ivel fasin blong giaman” (lTeachings of Gordon B. Hinckley [1997], 620).

    Presiden Dallin H. Oaks i wonem yumi se i gat sam “we oli bin jusumaot sam sentens long ol tijing blong wan profet mo yusum hemia blong sapotem ajenda blong olgeta long saed blong politik o ol narafala tingting blong olgetawan Blong putum ol toktok blong wan profet blong sapotem wan praevet ajenda, ol politik o infomesen long saed blong faenens o long nara wei, hem i blong traem blong kontrolem profet blong i no folem hem (“Our Strengths Can Become Our Downfall” [Brigham Young University fireside, June 7, 1992], 7, speeches.byu.edu).

    President Henry B. Eyring i wonem abaot: “Doktrin i kasem paoa taem Tabu Spirit i talem se hem i tru From se yumi nidim Tabu Spirit, yumi mas tingting gud blong no go ova long taem blong tijim tru doktrin. Tabu Spirit, Hem i Spirit blong Trutok Yumi invaetem konfemesen blong Hem i kam taem yumi stap mekem tingting blong yumiwan nomo o talem mining long tingting blong yumi wan nomo. Hem i save kam had tumas blong mekem Hem i wan temtemsen oltaem blong traem wan niu samting o gud tumas. Be yumi invaetem Tabu Spirit olsem kompanion blong yumi taem yumi traem bes blong tijim nomo trutok. Wan long ol wei we i stret gud i blong stopem blong kam kolosap long ol giaman doktrin i blong jusum blong stap tij i simpol nomo. Proteksen i kam tru long simpol samting mo smol i lus” (“The Power of Teaching Doctrine,” Liahona, July 1999, 86).

    Elda Dale G. Renlund taught: “Blong stap lukaot blong andastanem moa ol samting, i wan impoten pat blong kam antap long spirit, be plis, yufala i mas lukaot. Gud wei blong tingting i no save tekem ples blong revelesen. Blong mekemap tingting i save lidim man i go long moa save long spirit, be i save lidim yumi i go long giaman, o tanem tingting i kamaot long wanem i kam finis tru long revelesen” (“Tabu Fasin mo Fiuja blong Yu we I No Save Finis,” Liahona, Mei 2022, 70).

  41. Luk long Matiu23:23. Presiden Joseph F. Smith i wonem: “Hem i no waes naating blong tekem wan pat blong trutok mo tritim olsem se hem i ful trutok ia nao. Evri prinsipol blong gospel we oli talemaot blong gospel blong Kraes oli impoten mo oli nid blong stap insead long plan ia blong sevem man.” Hem i eksplenem moa se: “Hem i olsem gud o no gud polisi o doktrin we oli mekem saon blong hem nomo blong tekem eniwan long olgeta samting ia, faenemaot insaed long plan ia blong fasin blong sevem man blong trutok blong gospel, mekem i kam wan spesel evri dei fasin, mo dipen long hem nomo blong oli sevem yumi mo progres. Evri wan oli impoten” (Gospel Doctrine, 5th edition [1939], 122).

    Elda Neal A. Maxwell i eksplenem: “ol prinsipol blong gospel … i nidim jenis. Taem oli pulumaot olgeta i kamkamot long wanwan long olgeta o putum oli stap olgetawan, ol man oli talem mining blong ol doktrin ia bae i kam wael. Lav, sapos i no gat long seven komanmen, bae i save kam rabis samting. Namba faef komanmen i talemaot laod mo tokbaot bigwan abaot givim ona long ol papa mo mama, sapos no, yu no bin mekem fas komanmen, bae i kam risal blong fetful we i no gat en blong wok wetem papa mo mama bitim God. Iven fasin blong stap wet longtaem i ikwol tru long “Samtaem talemaot strong se yu no agri, wetem paoa blong Tabu Spirit, mo afta soemaot bigfala lav’ [Doktrin mo Ol Kavenan 121:43]” (“Behold, the Enemy Is Combined,” Ensign, May 1993, 78–79).

    Presiden Marion G. Romney i givim instraksen se, “blong stap luksaotem ol skripja from stamba tingting ia blong faenemaot wanem we oli tijim we i leftemap tingting tru long Jisas Kraes i wan krae we i kam longwe blong stap lukaotem tru long olgeta from stamba tingting blong stap faenem ol sentens we oli save prestem i kam long seves blong sapotem las toktok we oli no save jenisim” (“Records of Great Worth,” Ensign, Sept. 1980, 3).

  42. Luk long 1 Korin 2:4; Moronae 6:9. Elda Jeffrey R. Hollm i tokbaot bigwan nid blong talem gospel blong Jisas Kraes long wan wei we i stap lid i go long fasin blong kam antap long saed blong spirit tru long paoa blong Tabu Spirit: “Lod bae i neva givim moa kaonsel we strong long Jos bitim we blong yumi mas tij gospel ‘tru long Spirit, iven Spirit blong Givhan we oli sendem blong tijim trutok.’ ?Yumi stap tijim gospel ‘tru long Spirit blong trutok?’ Hem i askem. ?O bae yumi tijim long ‘sam narafala wei? Mo sapos hem i tru long sam narafala wei,’ Hem i givim woning se ‘hemia i no kam long God’ [Doktrin mo Ol Kavenan 50:14, 17–18]. … I no gat wan fasin blong lanem samting we i no save finis i save hapen sapos i no gat Spirit we i kam kwitaem long heven. … Hemia i wanem we ol memba oli wantem tumas. … Oli wantem se fet blong olgeta i kam strong, mo hop blong olgeta i kam niu bakegen. Long sot toktok, oli wantem blong gudfala toktok blong God i fidim olgeta, blong ol paoa blong heven i mekem olgeta oli kam strong moa” (“A Teacher Come from God,” Ensign, May 1998, 26).

  43. Luk long Alma 13:23. Taem yumi tokbaot Papa long Heven, Presiden Russell M. Nelson i testifae, “Hem i toktok long wan wei we i simpol, i kwaet, mo i klia gud evriwan, mekem se i no gat wan i no save andastanem Hem i rong” (“Lisin long Hem,” Liahona, Mei 2020, 89).

  44. Luk long Ol Sam 26:3; Rom 13:10; 1 Korin 13:1–8; 1 Jon 3:18.

  45. Luk long Ol Sam 40:11.

  46. Luk long Rom 8:16.

  47. Luk long 1 Samuel 2:3; Matiu 6:8; 2 Nifae 2:24; 9:20.

  48. Luk long Jenesis 17:1; Jeremaea 32:17; 1 Nifae 7:12; Alma 26:35.

  49. Luk long Jeremaea 31:3; 1 Jon 4:7–10; Alma 26:37.

  50. Luk long 2 Nifae 9; Doktrin mo Ol Kavenan 20:17–31; Moses 6:52–62.

  51. Luk long Jon 3:16; 1 Jon 4:9–10.

  52. Luk long Jon 8:29; 3 Nifae 27:13.

  53. Luk long Jon 15:12; 1 Jon 3:11.

  54. Luk long Luke 22:39–46.

  55. Luk long Jon 19:16–30.

  56. Luk long Jon 20:1–18.

  57. Luk long 1 Korin 15:20–22; Mosaea 15:20–24; 16:7–9; Doktrin mo Ol Kavenan 76:16–17.

  58. Luk long Ol Wok 11:17–18; 1 Timoti 1:14–16; Alma 34:8–10; Moronae 6:2–3, 8; Doktrin mo Ol Kavenan 19:13–19.

  59. Luk long Matiu 11:28–30; 2 Korin 12:7–10; Philippians 4:13; Alma 26:11–13.

  60. Luk long Matiu 16:18–19; Efesas 2:20.

  61. Luk long Matiu 24:24; Ol Wok 20:28–30.

  62. Luk long Doktrin mo Ol Kavenan 20:1–4; 21:1–7; 27:12; 110; 135:3; Josef Smit—Histri 1:1–20.

  63. Luk long Doktrin mo Ol Kavenan 1:14, 38; 43:1–7; 107:91–92.