Serem Witnes blong Jisas Kraes long Toktok mo Ol Aksen
Taem yumi stap traehad blong laef folem gospel blong Jisas Kraes wetem pis, ol fasin blong yumi bae i stap olsem wan laef testemoni blong Ridima blong yumi.
Long taem blong baptaes, wan long ol promes we yumi mekem hem i blong yumi tekem long yumi nem blong Jisas Kraes . Stamba tingting blong mi tedei, hem i blong rimaenem yumi se yumi save soem long God se yumi tekem long yumi nem blong Pikinini Boe blong Hem taem yumi stap serem testemoni blong yumi tru long toktok mo aksen oltaem we yumi save mekem, se Jisas hem i Kraes.
Taem Hem givhan mo tijim pipol long Amerika afta we Hem i girap bakegen long ded, Sevya i talem:
“?Oli no bin ridim ol skripja, we i talem se yufala i mas tekem long yufala nem blong Kraes, we i nem blong mi? Nem ia bae oli singaotem yufala long las dei;
“Mo huia we i tekem long hem nem blong mi, mo i stap strong kasem en, hem ia bae mi sevem hem long las dei.”2
Presiden Russell M. Nelson i bin tijim yumi se “blong tekem nem blong Sevya long yumi, i minim blong talemaot mo witnesem long ol narawan—tru long ol aksen mo toktok blong yumi—se Jisas, Hem i Kraes.”2
Olsem ol memba blong Jos Ia blong Jisas Kraes blong Ol Lata-dei Sent, yumi gat blesing ia mo raet ia blong stanap olsem ol witnes blong Lod mo long nem blong Hem long evri ples we yumi stap.3 Taem yumi stap traehad blong laef folem gospel blong Jisas Kraes wetem pis, ol fasin blong yumi bae i stap olsem wan laef testemoni blong Ridima blong yumi. Be, yumi witnes blong Kraes long toktok taem yumi serem wetem ol narawan wanem yumi bilivim, filim, o save abaot Jisas Kraes.
Taem we yumi serem testemoni blong yumi blong Lod wetem tingting i stap daon tru long ol toktok mo ol aksen, Tabu Spirit i konfemem4 long olgeta wetem tru tingting blong wantem save, ol hat we i open, mo maen we i wantem mekem samting, se Jisas Hem i Kraes.5
Mi wantem serem tu eksampol blong ol memba we i jes hapen nomo we oli soem long God se oli tekem nem blong Jisas Kraes long olgeta taem oli tokbaot Hem mo serem klin witnes blong Lod long ol Jos miting.
Fas eksampol: Taem waef blong mi, Elaine, mo mi i bin go long Spen long 2022, mifala i go long ol Sandei miting long wan smol yunit long Jos long ples ia. Taem mi stap sidaon long fored mo waef blong mi i sidaon long medel blong kongregesen, mi luksave se hem i sidaon kolosap long wan olfala woman. Taem sakramen i finis, mi wokbaot i go long Elaine mo askem hem blong presentem mi long niu fren blong hem. Hem i mekem mo i talem se woman ia, we i no wan memba blong Jos, i stap visitim Jos kolosap tu yia nao. Taem mi harem hemia, mi askem woman ia we i gat bigfala repek long God se wanem nao i mekem hem i stap kambak mo kam long ol miting blong mifala blong wan longfala taem. Wetem lav woman ia i ansa: “Mi laekem blong kam ia from se yufala i tokbaot Jisas Kraes long ol miting blong yufala.”
I klia nomo, se ol memba blong Jos long yunit ia long Spen oli toktok, tijim mo testifae long Kraes long ol miting blong olgeta.
Nambatu eksampol: Afta we mi givim seves long Brasil Eria, mi kasem wan niu asaenmen blong givim seves long hedkwota blong Jos. Taem we mifala i muv i go long Sol Lek Siti, long en blong Julae long yia ia, mifala i go long Sandei miting long niufala mo naesfala wod blong mitufala. Wan long ol miting ia hem i fas mo testemoni miting. Afta we mifala i tekem sakramen wetem kwaet fasin, ol memba i stanap mo serem ol testemoni we i kam long hat abaot Sevya wan afta wan. Miting ia Jisas Kraes i stap long medel blong hem, mo i klia nomo se mifala i filim Spirit. Mifala i lan mo fet blong mifala i kam strong moa. Sapos ol fren long Jos, we oli stap lukaotem trutok wetem ones fasin, oli bin stap long miting ia, bae oli luksave se hemia i Jos blong Jisas Kraes.
Hemia i wan blesing blong luk se ol Jos miting blong yumi oli ol gudfalajanis blong yumi blong testifae abaot Kraes mo i wan saen long God se yumi glad blong tekem long yumi nem blong Pikinini blong Hem.
Naoia letem mi talem wan eksampol we i gat paoa blong tekem long yumi nem blong Jisas Kraes taem yumi serem testemoni blong yumi abaot Hem tru long ol aksen.
Las Ogis, mi folem Elda Johnathan Schmitt long wan open haos blong Feta Riva Kalifonia Tempol long Yuba Siti. Long ples ia, mi gat blesing ia blong kam wan gaed blong ol grup long wan tempol tua . Wan long ol grup ia i gat wan memba blong Jos, Virgil Atkinson,mo seven fren blong blong narafala fet. Kolosap en blong visit, long tempol siling rum, Brata Atkinson i krae taem hem i stap talemaot lav blong hem long ol fren blong hem we oli kam long tempol long dei ia. Afta we hem i finis, wan woman long grup ia i stanap mo talem: “Mifala evriwan i lavem Virgil. Hem i neva fosem mifala blong folem bilif blong hem. Be hem i no fraet blong soem fet ia we hemi gat. Hem i laef folem wanem hem i bilif long hem.”
Plante yia afta, laef blong Brata Atkinson we i laef folem fasin blong Kraes i stap olsem wan testemoni we i gat paoa long ol fren blong hem. Eksampol blong hem i givim pruf se hem i tekem long hemwan nem blong Kraes.
Long en, letem mi serem lesen we mi lanem abaot olsem wanem blong tekem long yumi nem blong Kraes, mo testifae long Hem, taem yumi yusum stret nem blong Jos.
Presiden Nelson, profet blong God we i laef, long jeneral konfrens blong 2018 i tokbaot: “Stret Nem blong Jos,” hem i talem: “Hem i wan samting blong stretem. Hem i komanmen blong Lod. Josef Smit i no bin givim nem blong Jos we i kambak long nem blong hem; semmak long Momon. Sevya Hemwan i talem, ‘Bae olsem ia nao oli mas singaotem jos blong mi long ol las dei, we i Jos blong Jisas Kraes blong Ol Lata-dei Sent’ [Doktrin mo Ol Kavenan 115:4].”6
Yumi evriwan i bin lego jeneral konfrens long dei ia wetem strong tingting ia blong folem profet mo yusum nem we yumi kasem long dei ia blong Jos long taem ia i go. Oltaem mi mekemsua se mi yusum stret nem blong Jos. Long ol fastaem, mi mas tingting gud blong no letem mi gobak long olfala wei blong singaotem nem blong Jos. Afta we mi traem plante taem, mi kam blong filim moa gud blong yusum stret nem blong Jos we oli bin givim long taem ia. Mi save talem stret se plante taem mi talemaot nem blong Jos hariap tumas. Mi filim wari se ol pipol oli no stap lukluk gud ful nem blong Jos, mo oli ting se i longwan tumas.
Be, afta mi kam blong luk save se taem mi talem ful nem blong Jos wetem tru tingting, i givim mi wan impoten janis blong tokbaot nem blong Jisas Kraes mo tu serem testemoni blong mi abaot Sevya taem mi talemaot nem blong Hem long nem blong Jos. Mi luksave tu se taem mi talem stret nem blong Jos wetem ol narafala man, mi tingbaot Jisas Kraes oltaem mo filim paoa blong Hem long laef blong mi.
Blong stap folem profet, yumi evriwan i save lanem blong testifae moa abaot Jisas Kraes taem yumi yusum stret nem blong Jos, mo hemia i mekem se yumi stap tekem long yumi fulwan nem blong Lod.
Long sabat moning ia, wetem glad mi testifae se Presiden Nelson hem i profet blong God we i stap laef mo Jos Ia blong Jisas Kraes blong Ol Lata Dei Sent hem i Jos blong Kraes we i kambak. Wetem tingting i stap daon mi witnes long Pikinini blong God mo olsem wanem Hem i tabu. Hem i fasbon mo Hem i stret Pikinini Ia Nomo blong God we Hem i lavem, Sevya mo Ridima blong yumi, Imanuel.7 Long nem blong Jisas Kraes, amen.