Lavem Neba blong Yu
Lav mo Sore i wan fasin blong Kraes. Hem i kam tru long lav blong ol narafala man mo i nogat limit blong hem.
Long moning ia, mi invaetem yufala blong joen wetem mi long wan tua long Afrika. Bae yu no luk ol laeon, ol sibra, ol elefen, be ating, long en blong tua ia, bae yu luk olsem wanem taosen blong ol memba blong Jos Ia blong Jisas Kraes blong Ol Lata Dei Sent oli ansa long wan spesel wei long nambatu bigfala komanmen blong Kraes we hem i “lavem neba blong yu” (Mak 12:31).
Traem pikjarem blong wan smol taem, rurol, toti red rod blong Afrika. Yu save luk long drae graon se ren i no bin foldaon gud long hem blong plante yia. I gat sam grup blong ol buluk we yu luk bun bitim mit blong hem mo ol Karamojong man blong lukaotem buluk we oli kavremap olgeta long blangket, wetem sandel long leg, wetem hop blong faenem ples blong planem kaekae mo wota.
Taem yu stap gotru long rod we i raf mo i fulap wetem ston, yu luk grup blong ol naesfala pikinini mo stap tingting se from wanem oli no go long skul. Ol pikinini ia oli smael mo tata long yu, mo yu tata long olgeta wetem wota blong ae we i fulap mo smael. Naenti-tu pesen blong ol yang pikinini yu luk long tua ia oli laef long situesen we oltaem i nogat inaf kaekae mo hat blong yu i krae wetem harem nogud.
Long fored, yu stap luk wan mama i stap holem kolosap 19 lita blong wota antap long hed blong hem mo wan narawan long han blong hem. Hem i ripresentem tu haos long eria ia, we ol woman, yangfala mo olfala, oli wokbaot moa long teti minit long wan rod we i tekem 30 minit blong go mi 30minit blong kambak, evri dei, i go long ples blong kasem wota blong ol famli blong olgeta. Wan harem nogud i kavremap yu.
Tu aoa i pas mo yu kasem wan ples we i haed mo i gat sed long hem. Miting ples ia i no wan haos o iven wan tenet, be i ol bigfala tri we i givim selta aot long san we i hot tumas. Long ples ia, yu luk save se i nogat wota we i ron, nogat lektrisiti, nogat wota toelet. Yu lukluk raon mo save se yu stap long medel blong ol pipol we oli lavem God mo kwiktaem yu filim lav blong God long olgeta. Oli kam tugeta blong kasem help mo hop, mo yu kasem ples ia blong serem hop mo lav ia.
Hemia i tua blong Sista Ardern mo mi, wetem kampani blong Sista Camille Johnson, Jeneral Rilif Sosaeti Presiden wetem hasban blong hem Doug mo Sista Sharon Eubank, daerekta blong Jos Yumaniterian Seves, taem mifala i travel i go long Yuganda, we wan kantri blong 47 milian pipol long Sentrol Afrika Eria blong Jos. Long dei ia, andanit long sed blong ol tri, mifala i visitim wan komuniti helt projek we Ol Jos Yumaniterian Seves, UNICEF, mo Ministri blong Helt blong gavman blong Yuganda, oli joen tugeta blong givim fand blong hem. Ol oganaesesen ia oli trastem, oli jusum gud olgeta blong mekem sua oli yusum gud ol yumaniterian fand we ol memba blong Jos oli donetem.
Hat i fulap long sore blong luk ol pikinini we oli no kakae, mo tubakolosis, malaria, mo sitsit wota we i gogohed i spolem olgeta. Wanwan long mifala i kasem wan hop we i moa bigwan blong wan tumoro we i moa gud blong olgeta we mifala i mitim.
Hop ia i kam, long wan pat, tru long kaen fasin blong ol Jos memba raon long wol we oli givim taem mo mane i go long Jos yumaniterian efot. Taem we mi luk olgeta we i sik mo harem nogud oli helpem mo leftemap olgeta, mi benem hed blong mi wetem tingting i stap daon. Long taem ia mi andastanem wanem King blong ol king, i talem:
“Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem. Yufala i kam tekem ples ya blong yufala … :
“From we taem mi mi hanggri, yufala i givim kakae long mi, mo taem we mi mi tosta, yufala i givim wota long mi. Taem mi mi strenja, yufala i tekem mi mi go long haos blong yufala” (Matiu 25:34–35).
Krae blong Sevya blong yumi i blong “Yufala i mas letem laet ya i saenaot i kasem ol man, blong oli save luk ol gudgudfala wok we yufala i stap mekem … ” (Matiu 5:16; luk tu long ol ves ia 14–15). Long wan kona blong wol, ol gudgudfala wok blong yu i givim laet long ol laef mo i mekem ol hadwok blong ol pipol we i stap long nid i kam isi mo God i glad.
Long dei ia we i hot mo fulap long das, mi wantem tumas blong yufala i harem ol prea blong olgeta blong talem tangkyu i go long God. Bae oli talem long mi blong talem long yufala long lanwis Karamojong, “Alakara.” Tangkyu.
Tua blong mifala i rimaenem mi long parabol blong Gudfala man blong Sameria, we i tekem wan tua long wan rod we i drae, be i no olsem hemia we mi bin tokbaot, wan rod we i stat long Jerusalem kasem Jeriko. Man Sameria ia i tijim yumi wanem i minim blong “lavem neba blong yumi.”
Hem i luk “I gat wan man … sam man blong stil oli kam holem hem. Ol man ya oli stilim olgeta samting blong hem, mo oli kilim hem gogo i hafded” (Luk 10:30). Man Sameria ia “i gat sore long hem”. (Luk 10:33).
Lav mo Sore i wan fasin blong Kraes. Hem i kam tru long lav blong ol narafala man mo i nogat limit blong hem. Jisas, Sevya blong wol, i wan eksampol blong fasin blong gat sore. Taem yumi ridim se “Nao Jisas i Krae” (Jon 11:35) yumi ol witnes, olsem Meri mo Mata, long sore blong Hem we long fas ples Hem i harem nogud tumas we i stap pulum win blong hem from (luk long Jon 11:33). Long wan eksampol long Buk blong Momon abaot lav mo sore blong Kraes, Jisas i kamkamaot long ol pipol mo talem:
?Yufala i gat eniwan we bodi blong olgeta i nogud, o oli blaen, o … we sora blong olgeta i fas, o we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala. …
“… Mo Hem i hilim evriwan” (3 Nifae 17:7, 9).
Nomata long evri traehad long yumi, yu mo mi bae i no save hilim evriwan be wanwan long yumi i save mekem wan samting i defren blong gud long laef blong wan narawan. Hem i wan yangfala boe we i givim ol 5 pis bred mo tu fis we Jisas i yusum blong fidim ol faef taosen pipol. Bae yumi askem ofring blong yumi, olsem Andru we i disaepol i bin mekem long ol bred mo fis ia, “?Be bambae i no naf nating long olgeta man ya?” (Jon 6:9). Mi save talem long yu, hem i inaf blong givim o blong mekem wanem yu save givim mo afta letem Kraes i blesem ol wok blong yu.
Long poen ia, Elda Jeffrey R. Holland i givim advaes, “Yumi rij o yumi pua, yumi mas mekem wanem we yumi save mekem taem nara man i stap long nid.” Afta hem i testifae, olsem we mi mekem, se God, “bae i helpem yu mo lidim yu long ol aksen blong [yu] blong sore mo lav olsem wan disaepol ” (“Are We Not All Beggars?,” Liahona, Nov. 2014, 41).
Long kantri ia, long dei ia we mi no save fogetem, mi bin stanap long taem ia mo mi stanap naoia olsem wan witnes blong sol we i jenisim laef blong lav mo sore blong ol memba blong Jos, tugeta rij mo pua.
Parabol blong Gudfala man Sameria i gogohed taem hem “i wasem ol soa blong hem … nao i stap lukaot long hem long ples ya” (Luk 10:34 Jos yumaniterian blong yumi i luk se yumi ansa kwiktaem long taem blong ol disasta, stopem ol sik we i stap kam moa bigwan long wol, hanggri, ol pikinini oli ded, no kakae gud, rifuji, ol harem nogud blong tingting we i foldaon, no hapi, mo nogat hop we plante taem yumi no stap luksave.
Man Sameria ia “hem i tekem tu taosen vatu* i givim long man blong hotel ya, mo i talem long hem se, ‘Yu lukaot gud long man ya.” (Luk 10:35). Olsem wan jos, yumi glad blong wok tugeta wetem “ol man blong holem” o ol oganaesesen olsem Katolik Rilif Seves, UNICEF, mo Red Cross/Red Crescent, blong help long ol Yumaniterian rod blong yumi. Mifala i glad long “tu taosen vatu”, o tu yuro, tu peso, o tu siling blong yu, we oli mekem ol hadtaem we i plante raon long wol i kam isi. Bae yu no save huia bae i karem taem mo vatu blong yu, be fasin blong gat sore i no nidim blong yumi save olgeta, be i nidim blong yumi lavem olgeta.
Tangkyu Presiden Russell. Nelson blong rimaenem yumi se: “Taem yumi lavem God wetem ful hat blong yumi, Hem i tanem hat blong yumi long gudlaef blong ol narawan” (The Second Great Commandment, Liahona, Nov. 2019, 97). Mi testifae se wanwan long yumi bae i gat moa glad, pis, tingting i stap daon, mo lav taem yumi ansa long singaot blong Presiden Nelson blong tanem ol hat blong yumi i go long nid blong ol narafala mo Josef Smit blong “fidim olgeta we i hanggri, givim klos, lukluk long ol wido, helpem pikinini we i nogat papa mo mama, [mo] givim kamfot long olgeta we i harem nogud, iven long Jos ia, o long narafala jos, eni ples yumi save faenem [olgeta]” (“Editor’s Reply to a Letter from Richard Savary,” Times and SeasonsMar. 15, 1842, 732).
Long ol manis i pas, mifala i faenem olgeta we i hanggri, mo olgeta we i harem nogud long drae rod ia mo witnes long wan krae blong help. Long wei blong yumi, yumi harem nogud tumas mo stap pulum win blong yumi from (luk long Jon 11:33), be yet ol filing ia we yumi luk i sore blong ol Jos memba we oli wok blong fidim olgeta we i hanggri, oli provaedem blong olgeta wido,givim kamfot long olgeta we oli harem nogud mo mekem wota blong ae i drae.
Bae yumi stap gogohed blong helpem ol narawan mo soem long toktok mo aksen se “[yumi] glad blong karem ol hevi samting blong wanwan long [yumi]” (Mosaea 18:8), blong “mekem hat we i brok i harem gud bakegen” (Doktrin mo Ol Kavenan 138:42), mo blong obei namba tu loa ia blong Kraes we i talem se, ‘Yufala i mas lavem ol man we oli stap raonabaot long yufala” (Mak 12:31). Long nem blong Jisas Kraes, amen.