“Elda Alexander Dushku,” Liahona, Novemba. 2023.
Elda Alexander Dushku
Jeneral Atoriti Seventi
Papa mo mama long Elda Alexander Dushku i joenem Jos long Boston, Masajuset, YSA, afta we oli visitim World’s Fair long Niu Yok Siti long 1964. Spirit i tajem hat blong papa blong hem taem hem i lanem abaot gospel long wan naes haos we Jos i sponsarem, mo hem i invaetem ol misinari blong tijim hem mo woman blong hem we bae tufala i mared i no longtaem.
Papa mo mama long hem oli niu long Jos taem hem i bon i kam long wol, be Elda Dushku i talem se oltaem hem i bin save se bae hem i givim seves long wan misin.
“Afta we mi bin go long misin, nao mi stat blong rili andastanem glori blong misinari wok mo olsem wanem hem i gat fulap paoa,” Elda Dushku i talem, we hem i bin givim seves long Potugal Lisbon Misin stat long 1986 kasem 1988. “Hem i bin openem ol ae blong mi fulwan long kingdom blong God mo wanem kingdom ia i minim.”
Elda Dushku i biliv se blong gat membasip insaed long Jos, i gat bigfala paoa blong mekem samting i defren long wol.
“Nomata se maet ol namba blong yumi oli smol, oli gat mining mo oli gat fulap paoa,” hem i talem. “Yumi wokbaot wetem Kraes, han long han. Mo afta yumi wokbaot wetem wanwan long yumi. Yumiwan yumi kam ol han mo voes blong Lod blong stap leftemap mo mekem ol narawan oli kam strong.”
Alexander Dushku i bon long 17 Novemba, 1966, mo papa mo mama blong hem oli Nicholas mo Donna Lee Dushku long Fairfield, Kalifonia, USA. Elda Dushku i maredem Jennifer Burnham long 1988 long Sol Lek Tempol. Tufala i gat eit pikinini mo naen apupikinini.
Elda Dushku i kasem wan digri long ekonomi long Brigham Yang Yunivesiti long 1990. Hem i kasem dokteret blong hem long loa long BYU’s J. Reuben Clark Law School long 1993. Hem i bin wok blong wan nasonal pablik intres loa bisnis mo i stap olsem klak long US Court of Appeals for the Seventh Circuit bifo hem i bin wok long loa bisnis blong Kirton McConkie long Sol Lek Siti. Long ples ia, hem i lukluk moa long Fas Amenmen blong US Konstitusen mo fridom blong relijin.
Elda Dushku i bin stap olsem wan stek presiden long taem we oli singaotem hem. Hem i bin wok tu olsem wan bisop, hae kaonsela, kaonsela insaed long bisoprik mo presiden blong kworom blong ol elda.