!Tingting bakegen!

I Kam long Presiden Russell M. Nelson

Presiden blong Jos Ia blong Jisas Kraes blong Ol Lata-dei Sent

Ol joes blong yufala bae i talemaot wea nao bae yu laef long hem blong taem we i no save finis, wanem kaen bodi bae yu yu girap bakegen long hem aot long ded, mo huia olgeta we bae yu stap wetem olgeta foreva.

Ol dia brata mo sista. Mi talem tangkyu tumas blong toktok wetem yufala tedei. Wetem hamas yia we mi gat, evri dei i givim mi ol gud mo ol had sapraes. 3 wik i pas, mi kasem kil long ol masel blong bak blong mi. Mekem se from mi bin mekem moa long 100 jeneral konfrens toktok we mi stap stanap nomo, tedei mi tingting se bae mi sidaon mo givim toktok. Mi prea se bae Tabu Spirit i tekem ol toktok blong mi i go insaed long hat blong yufala tedei.

Mi bin selebretem 99 betdei blong mi i no longtaem i pas mo naoia mi statem blong laef long 100 yia blong mi blong stap laef. Plante taem oli askem mi abaot sikret we i mekem se mi stap laef longwan yet. Be wan kwestin we i moa gud hem i “?Wanem nao mi bin lanem taem mi stap laef blong kolosap wan handred yia?”

Taem we mi gat tedei i no letem mi blong ansa fulwan long kwestin ia, be bae mi serem wan long ol impoten lesen we mi bin lanem.

Mi bin lanem se plan blong Papa long Heven blong yumi i gud tumas, mo we wanem yumi mekem long laef ia i impoten, mo we Atonmen blong Sevya i wanem we i mekem se plan blong Papa blong yumi i save hapen.¹

Taem mi bin stap faet strong wetem soa blong bak blong mi ia, mi kam blong gat wan dip filing blong tangkyu long Jisas Kraes mo presen blong Atonmen blong Hem we i no isi blong andastanem. !Tingbaot hemia! Sevya i bin safa wetem “ol soa mo ol harem nogud mo ol defren kaen temtesen”² blong mekem se Hem i save kamfotem, hilim mo sevem yumi long ol taem blong nid.³ Jisas Kraes i tokbaot eksperiens blong Hem long Getsemane mo long Kalvari: “We safaring ia i mekem mi, we mi God, we mi hae long evriwan, mi seksek from soa long bodi, mo blad blong mi ronaot long evri hol blong skin blong mi.”⁴ Soa blong mi i bin mekem mi luklukbak bakegen mo bakegen long “ol bigfala samting blong Tabu Wan blong Isrel.”⁵ Long taem we mi stap kasem hiling, Lod i soemaot tabu paoa blong hem long ol wei we i gat pis mo no gat mistek.

From Atonmen blong Jisas Kraes we i no gat en, plan blong Papa blong yumi long Heven i wan plan we i stret gud evriwan! Blong andastanem gudfala plan blong God i karemaot ol samting we i sikret long laef mo ol samting we yumi no sua blong fiuja blong yumi. I letem yumi blong jusum hao bae yumi laef long wol ia mo wea bae yumi laef foreva. Wan toktok we plante oli stap talem se “kakae, dring, mo stap glad, from tumoro bae yumi ded; mo bae ol samting oli oraet wetem yumi”⁶ hemia i wan long ol bigfala giaman long laef.

Hemia wan gudfala nius abaot plan blong God: ol stret samting we bae i mekem laef blong yu long wol i moa gud olsem we i stap, oli ol stret semmak samting we bae i mekem laef blong yu truaot taem we i no save finis i moa gud olsem we i stap! Tedei, blong sapotem yu blong kwalifae from ol rij blesing we Papa long Heven i gat blong yu, mi invaetem yu blong adoptem praktis ia blong “!tingting selestial”!⁷ Tingting selestial i minim blong gat tingting we i folem fasin blong spirit. Yumi lanem long Buk blong Momon abaot profet Jekob se blong “gat tingting we i folem fasin blong spirit, hem i laef we i no save finis.”⁸

Laef long wol ia i wan masta klas blong stap lanem blong jusum ol gud samting we yumi save tekem we i no save finis. Plante pipol oli laef olsem se laef ia i las ples ia blong laef long hem. Be, ol joes blong yufala tedei i talemaot tri samting: wea nao bae yu laef long hem blong taem we i no save finis, wanem kaen bodi bae yu yu girap bakegen long hem aot long ded, mo huia olgeta we bae yu stap wetem olgeta blong oltaem. So, tingting selestial.

Long fas toktok blong mi olsem Presiden blong Jos, mi bin leftemap tingting blong yu blong stat wetem en long maen. Hemia i minim blong mekem selestial kingdom i kam gol blong yu we i no save finis mo afta wetem kea, tingting gud long wea wanwan desisen we yu mekem long laef ia bae i putum yu long hem long nekis wol.⁹

Lod i klia taem i tijim se olgeta man mo woman we oli bin go sil olsem ol hasban mo waef long tempol, mo we oli stap kipim ol kavenan blong olgeta, bae oli stap tugeta truaot ol taem we i no save finis. Hem i se: “Evri kavenan, kontrak, agrimen, diuti, promes, strong promes, wok, rilesen, yunion, o samting we oli wet blong oli kamtru, we oli no mekem o oli no tekem mo oli no silim tru long Tabu Spirit blong promes … oli finis nomo taem man i ded.”¹⁰

From hemia, sapos yumi no waes mo jusum blong laef folem ol telestial loa naoia, yumi stap jusum blong girap bakegen long ded wetem wan telestial bodi. Yumi stap jusum blong no laef wetem ol famli blong yumi blong oltaem.

So, ol dia brata mo sista blong mi, hao mo wea mo wetem huia nao yu wantem blong stap wetem blong oltaem? Yu nao yu jusum.¹¹

Taem yu mekem ol joes, mi invaetem yu blong tekem wan longfala lukluk—wan lukluk we i no save finis. Putum Jisas Kraes fastaem, from laef blong yu we i no save finis i dipen long fet blong yu long Hem mo long Atonmen blong Hem.¹² I dipen tu long fasin blong yu blong stap obei long ol loa blong Hem. Fasin blong stap obei i stap olsem wei ia nao blong gat wan hapi laef tedei mo wan bigfala presen we i no save finis tumoro.

Taem yu mas mekem wan had joes, !tingting selestial! Taem yu kasem temtesen, !tingting selestial! Taem laef o olgeta we yu lavem i putum yu daon, !tingting selestial! Taem wan bebi i ded from i no taem blong hem yet blong bon, tingting selestial. Taem wan i sik longtaem wetem wan rabis sik, tingting selestial. Taem ol wari blong laef i fulumap yu, !tingting selestial! Taem we yu stap kam oraet afta wan aksiden o kasem kil, olsem mi naoia, !tingting selestial!!

Taem yu stap lukluk moa blong tingting selestial, i gud blong rere tu blong fesem fasin blong stap agens.¹³ 10 yia i pas, wan wok fren blong mi i bin jajem mi se mi gat “tumas tempol” long mi, mo i bin gat moa long wan supavaesa we i bin putumaot mi long wok from fet blong mi. Be mi bin filim strong se tingting selestial ia i helpem mi wetem wok blong mi.

Taem yu tingting selestial, sloslo bae hat blong yu i jenis. Bae yu wantem blong prea moa oltaem mo wetem tru hat. Plis no mekem prea blong yu bae i saon olsem wan lis blong soping. Lukluk blong Lod i bitim waes blong yu long laef ia. Ol ansa blong Hem long ol prea blong yu i save mekem sapraes mo bae i helpem yu blong tingting selestial.

Tingting long ol ansa blong Lod long Josef Smit taem hem i stap askem blong oli karemaot hem long Libeti Kalabus. Lod i bin tijim Profet se evri samting ia bae i givim eksperiens long yu mo bae i blong gud blong yu.¹⁴ Mo afta, sapos yu mekem gud blong stap strong, God bae i leftemap nem blong yu long heven.”¹⁵ Lod i bin stap tijim Josef blong tingting selestial mo blong stap gat wan visen finis blong wan riwod we i no save finis bitim we blong lukluk long bigfala harem nogud blong dei ia. Ol prea blong yumi i save stap—mo i mas stap—wan laef storian wetem Papa blong yumi long Heven.

Taem yu tingting selestial, bae yu luk se yu stap longwe long eni samting we i traem blong karemaot fridom blong yu. Eni adiksen—i save ol gem, kasino, kaon, ol drag, alkohol, kros, ponografi, seks o iven kakae—God i no akseptem. ?From wanem? From ol samting we yu stap wantem bitim Mak, bae i kam god blong yu. Yu luk long hem moa bitim we yu luk long God blong kasem kamfot. Sapos yu traehad wetem wan adiksen, lukaotem help yu nidim long saed blong spirit mo profesonol help. Plis no letem wan samting we yu wantem bitim mak blong i karemaot fridom blong yu blong folem gudfala plan ia blong God.

Tingting selestial, bae i helpem yu tu blong obei loa blong jastiti. Sam samting bae i mekem laef blong yu i had kwik bitim we blong spolem nogud tabu loa ia. Blong olgeta we oli bin mekem ol kavenan wetem God, fasin blong nogat klin tingting i wan long ol kwik wei blong lusum testemoni blong yu.

Plante long ol nogud temtesen blong enemi i stap insaed fasin ia blong prapa spolem gud ol klin tingting. Paoa blong krietem laef hem i wan spesel janis blong stap olsem wan god we Papa long Heven i letem ol pikinini blong Hem long wol ia blong yusum. From samting ia, God i putum sam gaedlaen blong yusum tabu paoa ia. Fasin blong fasfas tugeta long saed blong bodi hem i blong wan man mo wan woman nomo we tufala i mared tugeta.

Plante long ol man long wol oli no bilivim hemia, be tingting blong pablik hem i no stamba blong trutok. Lod i talem se wan man we i no klin bae i no save kasem selestial kingdom. So taem yu mekem ol desisen long saed blong klin fasin, plis tingting selestial. Mo sapos yu no klin, mi askem strong long yu blong sakem sin. Kam long Kraes mo kasem promes blong Hem blong fasin blong fogiv fulwan taem yu sakem sin blong yu fulwan.¹⁶

Taem yu tingting selestial, bae yu luk ol hadtaem mo fasin blong agens long wan niu wei. Taem wan we yu lavem i agensem trutok, tingting selestial, mo no kwestinim testemoni blong yu. Aposol Pol i profesae se “bambae long taem ya we klosap wol i finis, sam man oli save lego fasin blong bilif long God. Bambae olgea ya oli obei long ol tok blong ol devel we oli blong giaman nomo, mo bambae oli biaen long ol toktok ya we ol devel nomo oli stap tijim olgeta long hem.”¹⁷

I no gat en long ol giaman blong enemi. Plis, yufala i rere. Neva tekem kaonsel we i kam long olgeta we oli no biliv. Lukaotem help long ol voes we yu save trastem—long ol profet, sia mo reveleta mo long ol kwaet voes blong Tabu Spirit, we “bae i soem long yufala evri samting we bae yufala i mas mekem.”¹⁸ Plis mekem ol wok long saed blong spirit blong yu save kasem moa revelesen blong yuwan.¹⁹

Taem yu tingting selestial, bae fet blong yu i kam antap. Taem mi bin wan studen mo wok, mane we mi kasem i bin 1,500vt long wan manis. Wan naet, waef blong mi Dantzel i askem sapos mi bin stap pem taeting long sapot mane ia. Mi no bin stap pem. Mi bin sakem sin kwiktaem mo stat blong pem 150vt long wan manis taeting.

?Jos i bin defren from yumi leftemap taeting blong yumi? No. Be, blong kam wan we i pem taeting fulwan i bin jenisim mi. Hemia hao mi bin lanem se blong stap pem taeting hem i abaot fet, be i no mane. Taem mi kam blong pem taeting fulwan, ol windo blong heven i stat blong open blong mi. Mi serem sam wok we bae i kam afta long olgeta we oli fetful mo stap pem taeting.²⁰

Blong stap pem taeting, i nidim fet mo tu i bildim fet long God mo Pikinini blong Hem we Hem i Lavem tumas.

Stap jusum blong laef long wan klin laef insaed long wol blong seks mo politik, i bildimap fet.

Stap spendem moa taem long tempol i bildimap fet. Mo seves mo wosip blong yu long tempol bae i helpem yu blong tingting selestial. Tempol hem i wan ples blong revelesen. Long ples ia, oli soem yufala hao blong progres i go long selestial laef. Long ples ia, yu kam moa kolosap long Sevya mo kasem moa paoa blong Hem. Long ples ia, yu kasem gaed blong stretem ol problem long laef blong yu, iven ol bigfala problem.

Ol odinens mo ol kavenan blong gospel blong tempol oli impoten mo oli no save finis. Yumi gohed blong bildim moa tempol blong mekem ol tabu wok ia blong oli kam ol tru samting long wanwan laef blong yufala. Tedei, mi mi glad blong anaonsem ol plan blong yumi blong bildim wan tempol long wanwan ples ia:

Savai’i, Samoa
Cancún, Mexico
Piura, Peru
Huancayo, Peru
Viña del Mar, Chile
Goiânia, Brazil
João Pessoa, Brazil
Calabar, Nigeria
Cape Coast, Ghana
Luanda, Angola
Mbuji-Mayi, Democratic Republic of the Congo
Laoag, Philippines
Osaka, Japan
Kahului, Maui, Hawaii
Fairbanks, Alaska
Vancouver, Washington
Colorado Springs, Colorado
Tulsa, Oklahoma
Roanoke, Virginia
Ulaanbaatar, Mongolia

Lod i stap lidim yumi blong bildim ol tempol ia blong helpem yumi blong tingting selestial. God i stap laef. Jisas Hem I Kraes. Jos ia blong Hem i bin kambak blong blesem evri pikinini blong God. Mi testifae olsem long tabu nem blong Jisas Kraes, amen.