Hiling Paoa Blong Sevya “long Ol Aelan blong Solwota”
Tru long ol blesing blong tempol, Sevya i hilim wanwan man mo woman, ol famli mo ol nesen.
Eli long 1960, papa blong mi i bin tij long Jos Kolej blong Hawae long Lae, long ples ia we mi bon long hem. Seven long ol bigfala sista blong mi oli stanap strong blong talem long papa mo mama blong mifala se oli mas putum nem blong mi “Kimo,” wan nem long Hawae. Mifala i stap kolosap long Lae Hawae Tempol we i gat plante Jos memba blong Esia Pasifik Eria, we i gat tu olgeta blong Japan.1 Long taem ia, ol grup blong Ol Sent blong Japan oli stat blong kam long Hawae blong kasem ol blesing blong tempol.
Wan long ol memba ia i wan sista we i kam long naesfala aelan blong Okinawa. Stori blong wokbaot blong hem i go long Tempol blong Hawae i naes tumas. Twante yia i pas, hem i bin mared folem tredisen blong olgeta we oli jusum patna blong hem mo we i folem rilijin blong Buda. Sam manis nomo i pas, Japan i atakem Pel Haba, Hawae, we i pusum Yunaeted Stet blong raorao wetem Japan. I hapen se ol faet olsem Midwei mo Iwo Kima, ol fos blong faet i pusum ol man Japan i go bak long soa long hom aelan blong hem, Okinawa, las ples blong stanap strong agensem ol man blong faet blong ol kantri we oli joen wetem Yunaeted Stet long ol impoten pat blong Japan.
Blong wan nogud tri manis long 1945, faet blong Okinawa i bin kam strong tumas. Wan grup blong 1300 sip blong faet blong Ol Man Amerika oli raonem mo bomem aelan. Plante man mo soldia oli bin ded. Tedei wan impoten ples long Okinawa i gat ol lis blong ova 240,000 nem blong ol pipol we oli save we oli bin ded long faet.1
Long wan taem blong traehad blong kamaot long ol faet mo atak , woman Okinawa ia, hasban blong hem mo tu smol pikinini blong tufala i lukaotem ples blong haed long wan hol blong ston antap long hil. Oli gohed strong nomata ol bigfala harem nogud tru long ol wik mo manis we i stap kam.
Wan naet we hop i lus long medel blong ol faet, semtaem famli blong hem oli nomo gat kaekae mo hasban blong hem ae blong hem i dak, hem i tingting blong endem harem nogud blong olgeta wetem wan bom we ol atoriti i bin givim long hem mo ol narawan from stamba tingting ia. Be, taem hem i stap rere blong mekem olsem, wan bigfala eksperiens long saed blong spirit i kam klia we i givim hem wan tru mining blong tru God mo lav blong Hem we i givim hem moa paoa blong stap gogohed. Afta sam dei, hem i mekem hasban blong hem i kam oraet bakegen mo i fidim famli blong hem wetem ol gras, wetem wael hani mo ol fis mo ol nara samting we oli stap laef lo wota. Wetem sapraes, oli bin gohed gud blong sikis manis insaed long hol blong ston, kasem taem we ol man long vilej i talemaot long olgeta se faet i finis.
Taem famli i gobak long hom mo stat blong bildimap ol laef blong olgeta, woman Japan ia i stat blong lukaotem ol ansa abaot God. Sloslo hem i stat blong bilif long Jisas Kraes mo nidim blong kasem baptaes. Be, hem i wari from olgeta we hem i lavem we oli ded mo nogat save ia abaot Jisas Kraes mo baptaes, we i gat tu, mama blong hem we i bin ded taem hem i bonem hem.
Pikjarem long maen glad blong hem taem tu sista misinari blong Jos Ia blong Jisas Kraes blong Ol Lata-dei Sent tufala i kam long haos blong hem wan dei mo tijim hem se ol pipol oli save lanem abaot Jisas Kraes insaed long spirit wol. Ol tijing blong papa mo mama blong hem i bin holem taet hem blong jusum blong folem Jisas Kraes afta long ded mo akseptem baptaes we hem i mekem long bihaf blong olgeta long ol tabu ples we yumi singaotem ol tempol. Hem mo famli blong hem oli jenisim laef i go long Sevya mo baptaes.
Famli blong hem i wokhad mo stat blong kam antap, ademap tri moa pikinini. Oli bin stap fetful mo aktiv insaed long Jos. Afta, wetem sapraes, hasban blong hem i kasem wan strok mo i ded, i pusum hem blong wok long ol longfala aoa long plante wok blong plante yia blong lukaotem faef pikinini blong hem.
Sam pipol long famli mo neba blong hem oli tokbaot nogud hem. Oli poenemaot se ol trabol i kam tru long rong desisen blong joenem Kristin jos. Nomata long wan bigfala rabis mo nogud fasin blong tokbaot nogud hem, hem i stap strong long fet blong hem long Jisas Kraes, gat strong tingting blong go fored, stap trastem se God i save hem mo se i gat ol gudfala dei yet we i stap kam.3
Sam yia i pas, folem ded blong hasban blong hem we i oli rere from, misin presiden long Japan i filim insperesen blong leftemap tingting blong ol memba blong Japan blong traehad blong stap go long tempol. Misin presiden i wan Man Amerika wetem plante eksperiens blong Faet long Okinawa, faet we i krietem bigfala harem nogud long famli blong hem.4 Be i nomata, sista wetem tingting i stap daon i talem long Man Amerika: “Hem i bin wan enemi we mifala i no laekem bifo, be naoia hem i stap ia wetem gospel blong lav mo pis. Hemia long mi, i wan merikel.”4
Taem hem i harem mesej blong misin presiden, sista wido ia i wantem tumas blong sil wetem famli blong hem insaed long tempol wan dei. Be, i no bin posibol long hem, from hem i gat hadtaem wetem faenens mo lanwis.
Afta sam niu wei blong fiksim ol problem i kam. Amaon blong mane i save kamdaon long haf sapos ol memba blong Japan oli jatarem wan ful plen blong flae i go long Hawae long taem we i nogat tumas turis.5 Ol memba oli rekodem mo salem ol sidi rekod wetem taetol Ol Japanis Sent Oli SingSing. Sam memba oli iven salem ol hom blong olgeta. Ol narawan i finis long wok blong olgeta blong mekem trip i hapen.6
Ol nara jalenj blong ol memba i we tempol presentesen i no gat long lanwis blong Japan. Ol Jos lida oli kolem wan brata blong Japan blong travel i go long Hawae tempol blong transletem endaomen seremoni.8 Hem i fas man Japan we i konvet afta long wo, ol soldia blong Amerika oli bin tijim mo baptaesem hem.7
Taem ol endao memba blong Japan we oli stap long Hawae oli harem translaesen blong fastaem, oli krae. Wan memba[man] i talem: “Mifala i bin go long tempol plante taem, plante taem. Mifala i harem ol seremoni long Inglis. [Be] mifala i neva filim spirit blong tempol i wok olsem we mifala i filim naoia [taem mifala i harem] stret lanwis blong mifalawan”8
Afta long semmak yia ia, 161 adalt mo pikinini oli aot long Tokio blong mekem wei blong olgeta i go long Hawae. Wan brata blong Japan i tingtingbak long wokbaot ia: “Taem mi lukluk aot long eaplen mo luk Pel Haba mo tingbaot wanem kantri blong mifala i bin mekem long ol pipol ia long 7 Disemba 1941, mi fraet long hat blong mi.” ?Bae oli akseptem mifala ia? Be long sapraes blong mi, oli soem bigfala lav mo kaen fasin bitim we mi neva luk long laef blong mi.”9
Taem mifala i go kasem, ol memba blong Hawae oli welkamem Ol Japanis Sent wetem fulap salusalu taem oli putum han raon long olgeta mo kisim olgeta long saed jik blong fes, wan kastom blong man nara kantri i go long kalja blong Man Japan. Afta we oli spenem 10 dei blong gro long saed blong spirit long Hawae, Ol Sent blong Japan oli talem tata taem wan singsing “Aloha Oe” we Ol Sent blong Hawae oli stap sing long hem.10
Oli oganaesem seken trip blong tempol blong ol memba blong Japan we i gat tu sista wido Okinawan. Hem i mekem 16,000 kilometa travel tangkyu i go long wan bigfala presen blong ol misinari we oli bin givim seves long branj blong hem. Taem hem i stap long tempol, wota blong ae blong hem i ron from bigfala glad taem hem i stap olsem wan proksi blong baptaes blong mama blong hem mo sil wetem ded hasban blong hem.
Tempol trip blong Japan i go long Hawae i gohed oltaem kasem Tokio Japan Tempol oli bin dediketem long 1980, we i bin kam 18 tempol long operesen. Long Novemba long yia ia, bae hemi 186 tempol we bae oli dediketem long Okinawa, Japan. Hem i stap i no longwe long hol blong ston long sentrol Okinawa ples we woman ia mo famli blong hem i bin haed long hem.13
Nomata se mi neva mitim naesfala sista ia blong Okinawa, stori blong hem i stap gohed blong laef tru long fetful jeneresen blong hem, plante long olgeta we mi save mo lavem.11
Papa blong mi, wan eksperiens man long Wol Wo II blong Pasifik, i bin glad tumas taem mi kasem koling blong mi blong givim seves olsem wan yang misinari long Japan. Mi kasem Japan sot taem afta we oli dediketem Tokio Tempol mo luk stret lav blong olgeta blong tempol.
Ol tempol kavenan oli ol presen we i kam long Papa blong yumi long Heven i go long ol fetful man blong folem Pikinini blong Hem, Jisas Kraes. Tru long tempol, Papa blong yumi long Heven i joenem wanwan man mo woman mo ol famli wetem Sevya mo wanwan long yumi.
Presiden Russell M. Nelson i talemaot las yia:
“Wanwan man mo woman we i mekem kavenan long ples blong baptaes mo insaed long ol tempol—mo i kipim olgeta—i kasem moa paoa blong Jisas Kraes.
“Presen blong kipim ol kavenan wetem God hem i paoa blong heven—paoa we i mekem yumi strong blong winim ol hadtaem blong yumi, ol temtesen, mo mekem harem nogud i kam moa gud. Paoa ia i mekem rod blong yumi i kam isi.”12
Tru ol tempol blesing, Sevya i hilim wanwan man mo woman, ol famli mo ol nesen—iven olgeta we oli bin wantaem stap olsem ol rabis enemi. Lod we i laef bakegen long ded i talemaot long wan sosaeti we i gat raorao, long olgeta we oli givim ona “bae Pikinini blong Stret mo Gud Fasin i girap wetem paoa blong hilim man long ol wing blong hem.”13
Mi glad tumas blong witnesem gogohed blong promes blong Lod we i stap fulfil se “taem bae i kam we save abaot wan Sevya bae i go aot olbaot long evri kantri, famli, lanwis, mo pipol,”17 we i tekem tu olgeta “long ol aelan blong solwota.”18
Mi testifae long Sevya Jisas Kraes mo profet blong Hem mo ol aposol long ol las dei ia. Wetem tru tingting mi talem witnes blong paoa blong heven blong joen long heven wanem i joen long wol.
Hemia i wok blong Sevya mo ol tempol oli ol tabu haos blong Hem.
Wetem bilif we i no muvmuv mi talemaot ol trutok ia long nem blong Jisas Kraes, amen.