Fren, Mifala I Wantem Luk Jisas

I Kam long Elder Robert M. Daines

Blong Olgeta Seventi

Yumi wantem blong luk Jisas olsem, huia Hem, mo blong filim lav blong Hem.

Blaen long Saed blong Spirit

Wan dei long spring blong 1945, wan yang man i wekap long wan hospital blong ol ami. Hem i laki se hem stap laef—oli bin sutum hem biaen long sora, be ol dokta oli operetem hem, mo naoia hem i save wokbaot mo toktok nomol.

Situesen blong hem i nogud, bolet i bin damejem pat blong bren blong hem we i mekem se hem i no save luksave ol fes. Naoia hem i lukluk long waef blong hem be i no gat pat we hem i save luksave, hem i no luksave mama blong hem. Iven fes long mira i olsem wan strenja long hem—hem i no save talem sapos i wan man o wan woman.¹

Hem i kam blaen blong no luksave ol fes—wan situesen we i afektem plante milian pipol.²

Ol pipol we oli traehad wetem sik ia blong blaen mo no luksave fes, oli traem blong luksave ol narawan taem oli stap lanem baehat—wan rul blong luksave wan pikinini gel tru ol braon spot long fes o wan fren blong hem from i stap pulpulum leg long graon taem i wokbaot.

Stap Groap

Hemia nambatu stori, kolosap long hom: olsem wan yang boe, oltaem mi lukluk mama blong mi olsem wan woman we i gat ol rul. Hem i jusum wetaem mi save pleiplei mo wetaem mi mas go long bed o, hemia we i moa nogud, blong pulumaot ol nogud gras long yad.

I klia se hem i lavem mi. Be oltaem nomo, mi sem blong talem, Mi luk hem olsem “hem We Oli Mas Obei long hem nomo.”

Sam yia nomo i pas mi kam blong luk hem olsem wan tru woman. Mi sem se, i tru tumas se mi neva luksave sakrifaes blong hem o stap tingting se from wanem evri yia hem i stap werem nomo tu semmak olfala sket (be mi gat ol niu klos blong skul) o from wanem long en blong dei, hem i taet tumas mo wantem tumas blong mi go long bed eli.

Yumi Save Blaen long Saed blong Spirit

Maet bae yu luksave se long tufala stori ia, i tru se i wan stori nomo—blong plante yia, mi bin stap olsem wan we i blaen blong luksave fes blong narawan. Mi bin stop blong luk mama blong mi olsem wan tru woman. Mi luk ol rul blong hem be insaed long olgeta, mi no luk lav blong hem.

Mi talem long yufala tufala stori ia blong mekem wan poen: mi save se yufala i save wan we (maet yu yu wan ia) i stap safa long wan kaen blaen olsem long saed blong spirit.

Maet yufala i stap traehad blong luk God olsem wan Papa we i lavem yufala. Maet yu save lukluk i go antap long heven mo luk, be i no fes blong lav mo sore, be sam grup blong ol rul we tru long olgeta yu mas tanem rod blong yu. Maet yu bilivim ol rul blong God long ol heven blong Hem, oli tokbaot tru ol profet blong Hem, mo lavem sista blong yu be long sikret, yu stap tingting se Hem i lavem yu o no.⁴ Maet yu bin tajem aean rel long han blong yu be yu no bin filim yet lav blong Sevya blong yu long weaples bae i lidim yu long hem.⁴

Mi stap tingting se yufala i mas save ol pipol olsem ia blong wan longfala taem, mi bin stap wan man olsem—mi bin blaen blong luksave fes long saed blong spirit.

Mi ting se laef blong mi i abaot blong stap folem ol rul mo stap traem blong skelem laef blong mi blong kasem ol standet. Mi save se God i lavem yu i stret evri wan be mi no filim hemia long miwan. Mi wari se mi tingting moa abaot rod blong mi blong go long heven bitim blong stap wetem Papa blong mi long Heven.

Sapos yu olsem mi, samtaem yumi save folem nomo long maot be no save singsing olgeta singsing blong bigfala lav,” we i pemaot man,”⁵ ?wanem nao yumi save mekem?

Ansa hem i, olsem we Presiden Nelson i stap rimaenem yumi, oltaem hem i, Jisas.⁶ Mo hemia i gudfala nius tumas.

Fren, Mifala I Wantem Luk Jisas

I gat wan sot ves long Jon we mi laekem tumas. Hem i tokbaot wan grup blong sam man aotsaed we oli kam long wan disaepol blong hem wetem wan impoten rikwes. “Fren,” oli talem, “mifala i [wantem blong] luk Jisas.”⁷

Hemia i wanem we yumi evri wan i wantem—yumi wantem blong luk Jisas olsem, huia Hem, mo filim lav blong Hem. Hemia i mas stap ol risen blong plante long ol samting we yumi mekem insaed long Jos mo stret risen blong evri sakramen miting. Sapos yu stap tingting long wanem kaen lesen blong tijim, wanem kaen miting blong mekem plan from, mo sapos bae yu givap long ol aktiviti blong ol dikon mo plei futbol nomo,maet yu save tekem ves ia olsem gaed blong yu: ?Yu yu ting se hemia bae i helpem ol pipol blong lukluk mo lavem Jisas Kraes? Sapos no, maet yu traem wan nara samting.

Taem mi luksave se mi blaen long saed blong spirit, se mi stap luk ol rul be i no fes blong bigfala sore blong Papa, mi save se i no rong blong Jos. Hem i no rong blong God, mo i no minim se evri samting i bin lus; hem i wan samting we yumi evri wan i mas lanem. Iven olgeta blong bifo we oli witnesem Laef Bakegen long Ded , oltaem i kam fes tu fes wetem Lod ia we i laef bakegen long ded be oli no luksave Hem; long Garen blong Tumb i go long so blong Galili, ol fas man blong folem Hem “oli bin luk Jisas i stap stanap long so, be ol man blong hem oli no save se Jisas.”⁹ Olgeta oli mas lanem blong luksave Hem, mo i semmak long yumi tu.¹⁰

Jareti

Taem mi luksave se mi blaen long saed blong spirit, mi stat blong folem kaonsel blong Momon blong prea “wetem evri paoa blong hat,” blong stap fulap wetem lav we Hem i promesem ol disaepol blong Hem—lav blong mi from Hem mo lav blong Hem from mi—mo blong “luk hem olsem we hem i stap mo gat hop ia.”¹¹ Mi prea blong plante yia blong blong save stap folem fas bigfala komanmen blong lavem God mo filim se “fasfala bigfala trutok se God i lavem yumi wetem evri hat blong Hem strong tingting, maen mo paoa blong Hem.”¹²

Gospel

Mo tu, mi ridim bakegen mo ridim bakegen fofala Gospel—mo long taem ia nao i no blong tekemaot ol rul be blong luk huia Hem mo wanem Hem i lavem. Mo long en, reva blong lav i bin wasem mi we i ron i kam tru long Hem.

Taem Jisas i anaonsem long stat se, Hem i bin kam “talemaot gud nius long ol puaman, talemaot ol man long kalabus se, ‘Yufala i go fri,’ talemaot long man we oli blaen se, ‘Ae blong yufala i save kam gud.”¹³

Hemia i no wan lis blong mekem samting o blong mekem gud PR; hem i sep blong lav blong Hem.

Openem Ol Gospel long eni ples; kolosap long evri pej yumi luk Hem i stap kea long pipol we oli safa—long olgeta we i stap raon, long saed blong spirit mo bodi. Hem i tajem ol pipol we man i tingting long olgeta se oli nogud mo oli no klin¹⁴ mo fidim olgeta we oli hanggri.¹⁵

Wanem nao fevret stori blong yu abaot Jisas? Mi gat tingting ia se bae hem i soem Pikinini blong God we i stap go aot mo givhan o givim hop long wan we sosaeti i no akseptem—man we i kasem leprosi,¹⁶ Man Sameria we ol man i no laekem hem,¹⁹ ol man we oli tok nogud long olgeta mo sem from sin,²⁰ o wan we i kam enemi long pablik.²² Kaen gladhat ia i naes tumas.

Traem raetemdaon evri taem we Hem i stap glad o hilim o kakae wetem ol man aotsaed, mo bae ink blong pen blong yu i go daon bifo yu pasem Luk.

Taem mi luk hemia, hat blong mi i jiam blong gat strong filing se mi semmak olsem olgeta, mo mi stat blong filim se maet Hem i lavem mi. Olsem we Presiden Nelson i bin tijim, “Moa yu lanem abaot Sevya, moa i isi blong yu trastem sore blong Hem, bigfala lav blong Hem we i no gat en, paoa blong Hem we i mekem man i kam strong moa, i kam oraet, mo i pemaot man.”²⁰ Mo moa bae yu trastem mo lavem Papa blong yu long Heven.

Elda Jeffrey R. Holland i bin tijim yumi se Jisas i bin kam blong soem “long yumi huia mo wanem God, Papa blong yumi we i no save finis i luk olsem wanem, hamas Hem i stap tru long ol pikinini blong Hem nomata yia o nesen blong olgeta.”²⁰

Pol i talem se God, Hem i “Papa blong [evri] sore, mo God we i givim [evri] kamfot.”²²

Sapos yu luk Hem long defren wei, plis gohed blong traem.

Ol kavenan mo welkamem God

Ol profet oli invaetem yumi blong lukaotem fes blong Hem.²³ Mi tekem hemia blong i stap rimaenem mi se yumi wosipim Papa blong yumi, i no wan fomula, mo se yumi no finis yet kasem taem yumi luk Jisas olsem fes blong lav blong Papa³⁰ mo folem Hem, be i no ol rul blong Hem nomo.³¹

Taem ol profet mo ol aposol oli tokbaot ol kavenan, oli no semmak long ol koj we oli stap singaot strong long (red velvet) ol gudfala ples we oli stap long hem, mo stap talem long yumi blong “traem moa strong!” Oli wantem blong luk ol kavenan blong yumi oli stamba long ol rilesensip²⁷ mo i save kam wan meresin blong fes-blaen long saed blong spirit.²⁸ Olgeta oli no ol rul blong winim lav; Hem i lavem yu finis i stret evri wan Jalenj blong yumi hem i blong andastanem mo stretem laef blong yumi i go from lav ia.²⁷

Yumi traem blong lukluk tru ol kavenan blong yumi, olsem we, sapos i wan windo, we i go long fes blong sore blong Papa biaen.

Ol kavenan oli sep blong han blong God we i holemtaet yumi.

Reva blong Lav blong God.

Yumi save lanem blong luk Hem taem yumi stap givim seves long Hem. “?From olsem wanem nao wan man i save wan masta we hem i no bin wok blong hem?”²⁹

Sam yia i pas, mi bin kasem wan koling we mi filim se mi no inaf blong mekem. Mi wekap eli, wari—be wetem wan toktok long maen blong mi we mi neva bin harem bifo: se blong givim seves insaed long Jos ia i blong stanap long reva blong lav blong God from ol pikinini blong Hem. Jos ia i wan wok ples blong ol pipol we oli gat ol ho mo ol savel, we oli stap traem blong help blong kliarem rod blong reva blong lav blong God blong i ron go kasem ol pikinini blong Hem long en.

Nomata huia yu, nomata wanem i hapen long yu bifo, i gat rum blong yu insaed long Jos ia.³⁰

Karem wan ho mo savel mo joenem tim. Help blong karem lav blong Hem i kam long ol pikinini blong Hem mo sam long olgeta bae i kasem yu.³¹

Letem yumi lukaotem fes blong Hem we i gat lav, mo afta, joenem han tugeta wetem ol pikinini blong Hem mo tugeta bae yumi singsing “Ridima blong Isrel”:

Helpem mi Sevya blong mi,
Laet blong fes blong Yu.
Plis givim sapot blong Yu long mi;
Mi wantem tumas blong mi
Luk ples blong Yu
Plis leftemap hop long hat blong mi.32

Letem yumi lukaotem fes blong Hem we i gat lav mo afta, stap olsem ol kontena we i holem insaed ol sore blong Hem.³³ Long nem blong Jisas Kraes, amen.