Stap Holemtaet Voes blong Ol Kavenan Pipol insaed long Ol Jeneresen we Oli Stap Kam Antap
Wan long ol nambawan tabu responsabiliti blong yumi i blong helpem ol pikinini blong yumi blong save moa dip mo long simpol wei, se Jisas Hem i Kraes
Wan long ol taem we i tajem hat blong man insaed long Buk blong Momon hem i taem Sevya i laef bakegen mo i visitim ol pipol long tempol, long graon ia Baontiful. Afta long wan dei blong tij, hilim, mo bildimap fet, Jisas Kraes i tekem tingting blong ol pipol i go long ol yangfala jeneresen: “Hem i bin givim oda se oli mas karem ol smol pikinini blong olgeta oli kam.”1 Hem i tekem olgeta mo blesem olgeta wan afta narawan. Eksperiens ia i tajem hat bigwan we i mekem se Sevya Hemwan i krae plante taem.
Afta, Hem i toktok long grup blong ol pipol ia, Jisas i talem:
“Luk ol smol wan blong yufala.
“Mo taem we oli stap lukluk … , oli luk ol heven oli open, mo oli luk ol enjel oli stap kamdaon aot long heven,” oli givhan long olgeta.2
Plante taem mi stap tingting abaot eksperiens ia. !Hemia i mas tajem hat blong evriwan! Oli luk Sevya. Oli tajem Hem. Oli bin save Hem. Hem i bin tijim olgeta. Hem i bin blesem olgeta. Mo Hem i lavem olgeta. Hem i wan sapraes se afta long tabu taem ia, ol pikinini ia oli bin groap blong help blong stanemap wan sosaeti blong pis, gud laef, mo lav olsem hemia blong Kraes we i bin stap afta plante jeneresen.3
Bae i naes tumas sapos ol pikinini blong yumi oli bin gat eksperiens olsem wetem Jisas Kraes—!wan samting we i save fasem hat blong olgeta wetem Hem! Hem i invaetem yumi, olsem we Hem i invaetem ol papa mo mama long Buk blong Momon, blong tekem ol smol pikinini blong yumi i kam long Hem. Yumi save helpem olgeta blong save Sevya mo Ridima blong olgeta long wei olsem we ol pikinini ia oli mekem. Yumi save soem long olgeta olsem wanem blong faenem Sevya insaed long ol skripja mo bildim fandesen blong olgeta long Hem.4
I no longtaem i pas, wan gud fren i bin tijim mi wan samting we mi no bin luksave bifo abaot parabol blong waes man we i bildimap haos blong hem antap long strong ston. Folem stori long Luk, olsem we waes man i putum fandesen blong haos blong hem, i “digim i godaon kasem ston.”5 Hem i no wan isi o simpol wok—!i nidim bigfala wok!
Blong bildim laef blong yumi long ston we i Ridima blong yumi, Jisas Kraes, yumi nid blong digim kasem ston. Yumi karemaot eni smosmol samting o ol samting we yumi no nidim long laef blong yumi. Yumi gohed blong digim kasem we yumi faenem Hem. Mo yumi tijim ol pikinini blong yumi blong fasem olgetawan wetem Hem tru ol tabu odinens mo kavenan, mekem se taem ol strong win blong agens mo ol bigfala wota i ron i kam, olsem we bae oli mas kam, be bae i no strong tumas long olgeta “from strong ston we yufala i bin bildimap [olgeta] antap long hem.”6
Kaen paoa ia i no stap kam olsem nomo. Oli no save pasem i go olsem long ol nekis jeneresen, olsem samting we oli gat raet long hem long saed blong spirit. Wanwan man o woman i mas digim i go dip blong faenem ston.
Yumi lanem lesen ia long wan narafala stori insaed long Buk blong Momon. Taem King Benjamin i givim las toktok blong hem long ol pipol, oli kam tugeta olsem ol famli blong lisin long ol toktok blong hem.7 King Benjamin i bin serem witnes blong hem wetem paoa abaot Jisas Kraes, mo testemoni blong hem i tajem bigwan hat blong olgeta. Oli bin talemaot:
“Spirit … i bin mekem wan bigfala jenis long mifala, o insaed long hat blong mifala. …
“Mo mifala i glad blong mekem wan kavenan wetem God blong mifala blong mekem wok we hem i wantem,… long evri dei blong mifala we i stap.”8
Wan bae i tingting se ol smol pikinini we oli gat kaen papa mo mama olsem we oli jenis bigwan bae long en, olgeta bae oli konvet mo mekem ol kavenan olgetawan. Mo tu, oli no bin talemaot long histri from sam risen biaen, ol kavenan we ol papa mo mama blong olgeta oli bin mekem i no bin pulum tingting blong ol pikinini blong olgeta. Sam yia i pas, “i gat plante long jeneresen ia we i stap kam antap, we oli no save andastanem ol toktok blong king Benjamin, from oli ol smol pikinini long tetaem ia we hem i bin toktok long ol pipol blong hem; mo oli no bilivim kastom blong ol papa blong olgeta.
“Oli no bilivim wanem we oli bin talemaot long saed blong laef bakegen blong olgeta we oli bin ded, mo tu, oli no bilivim we Kraes bae i kam. …
“Mo oli no wantem blong kasem baptaes; mo tu, oli no wantem joenem jos. Mo oli wan pipol we oli stap olgetawan nomo long saed blong fet blong olgeta.”9
!Tingting ia i nogud tumas! Long ol jeneresen we oli stap kam antap, blong gat fet long Jisas Kraes, i no inaf blong stap olsem “kastom blong ol papa blong olgeta.” Oli nid blong gat fet blong olgetawan long Kraes. Olsem ol kavenan pipol blong God, ?olsem wanem yumi save givhan long ol pikinini blong yumi blong oli gat wan hat we i wantem blong mekem mo kipim ol kavenan wetem Hem?
Yumi save stat, taem yumi folem eksampol blong Nifae: “Mo mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes, mo mifala i raetem folem ol profesi blong mifala blong mekem se ol pikinini blong mifala oli save gat save long wanem ples oli save lukluk long hem blong kam klin aot long ol sin blong olgeta.”10 Ol toktok blong Nifae i tekem wan strong efot we i stap gogohed blong tijim ol pikinini blong yumi abaot Jisas Kraes. Yumi save mekemsua se voes ia blong ol kavenan pipol i no kwaet long sora blong ol jeneresen we oli stap kam antap mo se Jisas i no wan topik blong tokbaot long Sandei nomo.11
Voes blong ol kavenan pipol i stap insaed long ol toktok blong testemoni blong yumiwan. Oli stap insaed long toktok blong ol profet we oli stap laef. Mo oli protektem wetem paoa insaed long ol skripja. Hem i long ples ia nao we ol pikinini blong yumi bae oli kam blong save Jisas mo faenem ol ansa long ol kwestin blong olgeta. Hem i long ples ia nao bae oli lanem doktrin blong Kraes blong olgetawan. Hem i ples ia nao we bae oli faenem hop. Hemia bae i mekem oli rere blong stap lukaotem trutok blong laeftaem blong olgeta mo laef folem rod blong kavenan.
Mi laekem kaonsel we i kam long Presiden Russell M. Nelson:
“?Weaples nao yumi save go blong harem Hem?
“Yumi save go long ol skripja. Oli stap tijim yumi abaot Jisas Kraes, mo gospel blong Hem, hamas Atonmen blong Hem i bigwan mo strong, mo bigfala plan blong hapines blong Papa blong yumi mo fasin blong pemaot man. Blong draon evri dei long toktok blong God, hem i impoten blong yumi gohed blong laef long saed blong spirit, speseli long ol taem ia we wol i stap gotru ol bigfala jenis. Taem yumi stap lafet long ol toktok blong Kraes evri dei, ol toktok blong Kraes bae oli talem long yumi hao blong fesem ol taem ia we oli had we yumi neva ting se bae yumi fesem.”12
So, ?olsem wanem nao yumi lafet long ol toktok blong Kraes mo harem Hem? !Hem i dipen nomo long wanem we i go gud blong yu! Maet hem i olsem blong kam tugeta wetem famli blong yu blong tokbaot ol samting we Tabu Spirit i bin tijim long yu insaed long ol skripja stadi blong yu taem yu stap yusum Kam Folem Mi. Maet hem i olsem blong kam tugeta evri dei wetem ol pikinini blong yu blong ridim sam ves long ol skripja mo lukaotem ol janis blong toktok raon abaot wanem yu lanem taem yu spendem taem tugeta. Faenem wanem we i gud blong yu mo famli blong yu afta, traem blong mekem i kam moa gud evri dei.
Lukluk ol wei ia long Tij Folem Wei blong Sevya: “Spos yu lukluk long wan singgel samting, olsem wan singgel famli haos naet, skripja stadi sesen o wan gospel storian, bae yu luk se hemia i no stap mekem wan samting i gud nomo. Be taem yu putum tugeta ol smol mo simpol hadwok ia, mo oltaem stap ripitim blong wan longfala taem, i save gat moa paoa mo mekem yufala i kam moa strong bitim wan taem we i impoten o i no stap hapen oltaem. … So, no givap, mo no wari se yu no stap kasem wan bigfala samting evri taem. Be gohed blong stap mekem ol efot blong yu.”13
Wan long ol nambawan tabu responsabiliti blong yumi i blong helpem ol pikinini blong yumi blong save moa dip mo long simpol wei, se Jisas Kraes, Pikinini blong God we i stap laef, Hem i Sevya mo Ridima blong olgeta wanwan, !we Hem i stanap olsem Hed blong Jos blong Hem! Eni samting abaot Hem, yumi mas talemaot blong no letem kavenan voes blong yumi i no kamaot o i stap kwaet.
Bae yu save filim se yu no inaf blong mekem wok ia, be yu mas neva filim se yu stap yuwan. Eksampol, oli givim raet long ol wod kaonsel blong oganaesem ol tija kaonsel miting blong ol papa mo mama. Long evri miting blong tri manis, ol papa mo mama oli kam tugeta blong lanem samting aot long ol eksperiens blong olgetawan, toktok raon long olsem wanem oli stap givhan long famli blong olgeta blong stap strong, mo lanem ol ki prinsipol blong ol tijing olsem hemia blong Kraes. Miting ia i mas hapen long nambatu aoa blong jos.14 Bisop bae i jusum wan memba blong wod blong lidim mo folem wei blong mekem ol nomol kaonsel miting blong ol tija, yusum Tij Folem Wei blong Sevya olsem stamba risos.15 Ol bisop, sapos wod blong yu i no stap gat ol tija kaonsel miting blong ol papa mo mama, wok wetem presiden blong Sandei Skul blong yu mo wod kaonsel blong yu blong oganaesem yufalawan.16
Ol dia fren blong mi long Kraes, yu stap mekem i gud tumas bitim wanem we yu save. Gohed nomo blong wok long wanem yu stap mekem. Ol pikinini blong yu oli stap wajem, stap lisin mo stap lanem samting. Taem yu tijim olgeta, bae yu kam blong save tru fasin blong olgeta olsem ol pikinini boe mo gel blong God we Hem i lavem olgeta tumas. Bae oli save fogetem Sevya blong wan taem, be mi promesem yufala, !Hem bae i neva fogetem olgeta! Ol taem ia we Tabu Spirit i stap toktok long olgeta, bae i gohed blong mekem olsem long hat mo maen blong olgeta. Mo wan dei ol pikinini blong yu bae oli talemaot testemoni blong Inos: Mi save papa mo mama blong mi oli bin stret, “from [hem i bin] tijim mi … long ol fasin we Lod i lukaotgud mo i givim advaes long man—mo mi blesem nem blong God blong mi from samting ia.”17
Letem yumi akseptem invitesen blong Sevya mo karem ol pikinini blong yumi i kam long Hem. Taem yumi mekem olsem, bae oli luk Hem. Bae oli filim Hem. Bae oli save Hem. Hem bae i tijim olgeta. Hem bae i blesem olgeta. Mo !yes! Bae Hem i lavem olgeta. O, mi lavem Hem tumas. Long tabu nem blong Hem, Jisas Kraes, amen.