Seken Edisen blong Prijim Gospel blong Mi I Gat Naoia I Stap

Kolosap 20 yia afta we oli bin pablisim Prijim Gospel blong Mi: Wan Gaed blong Misinari Seves, Jos i bin pablisim wan seken edisen (we taetol blong hem Wan Gaed blong Stap Serem Gospel blong Jisas Kraes).

Presiden Russell M. Nelson i anaonsem seken edisen long semina blong Jos blong ol niu misin lida long Jun. “Niufala edisen ia i kam long wan taem we wol i stap jenis hariap tumas,” hem i talem. “[Hem i] i soem fasin blong luksave samting long plante long ol jenis ia. Hem i gat sam long ol bes instraksen we mi neva luk, blong helpem ol pipol blong akseptem invitesen blong Lod blong kam long Hem.”

Edisen ia we oli apdeitem i tekem tu, ol tijing blong lida blong Jos we oli bin givim stat long taem we oli bin pablisim fas edisen long 2004. Hem i go stret wetem Jeneral Hanbuk we oli apdeitem mo ol narafala niu polisi. Hemia i tekem tu, ol sef step mo gaedlaen blong stap yusum teknoloji blong serem gospel.

Yang Woman Jeneral Presiden Bonnie H. Cordon i bin talem: “Wanem we i bin naes i we, evriwan long Olgeta Twelef Aposol oli bin stap lukluk hemia. Fas Presidensi i bin ridim fulwan. Mo buk ia i tru buk ia we Sevya i bin putum stam blong Hem long hem.”

Seken edisen blong Prijim Gospel blong Mi i gat i stap long Gospel Laebri ap mo onlaen long Inglis, Franis, Potugis, mo Spanis. Ol jenis we bae oli printim bae i gat i stap long en blong 2023. Bae i gat long sam moa lanwis i stap long stat blong Jenuware 2024.