Ol Haelaet blong Namba 193 Medel Yia Jeneral Konfrens

Jea blong Presiden Russell M. Nelson i emti nomo i stap long taem blong jeneral konfrens, be ol memba blong Jos oli glad blong kasem kaonsel mo testemoni blong profet blong olgeta we o gat 99 yia, long en blong las sesen tru long wan mesej we oli rekodem finis i stap.

Presiden Nelson i talem se soa long bodi mo wan kil long long baksaed i no longtaem i pas, i bin mekem hem i gat wan moa “dip filing blong tangkyu long Jisas Kraes mo presen blong Atonmen blong Hem we i no isi blong andastanem.” Taem profet i stap leftemap tingting blong ol memba blong “tingting selestial,” hem i serem sam samting we hem i bin lanem abaot “plan blong Papa long Heven we i stret evriwan”:

“Ol stret samting we bae i mekem laef blong yu long wol i beswan olsem we i stap, oli ol stret semmak samting we bae i mekem laef blong yu truaot taem we i no save finis i wan beswan olsem we i stap!”
“Ol joes blong yufala tedei i talemaot tri samting: wea nao bae yu laef long hem blong taem we i no save finis, wanem kaen bodi bae i girap bakegen long ded, mo huia olgeta we bae yu stap wetem olgeta blong oltaem” (pej 117).

Presiden Dallin H. Oaks, i serem witnes blong hem abaot fasin blong kam olsem wan god, we i stap blong ol fetful Sent (luk long pej 26). Presiden Henri B. Eyring i testifae abaot gaed blong Tabu Spirit we oli promesem long evri Sent we i klin inaf (luk long pej 92; luk tu long Elda Stevenson, pej 42). Mo Presiden M. Russell Ballard i bin serem wan testemoni wetem plante paoa abaot Profet Josef Smit mo “bigfala responsabiliti blong hem blong kam olsem profet blong ol las dei ia” (pej 74).

Ol spika blong konfrens oli bin tijim se ol joes blong yumi long wol ia we oli moa impoten oli mas senta long Lod Jisas Kraes mo fasin blong stap obei long ol komanmen blong hem, we i tekem tu, loa blong taeting (luk long Presiden Nelson mo Elda Andersen, ol pej 117 mo 32). Oli bin tijim tu se yumi faenem hapines, hiling, mo hop tru long Sevya taem yumi muv i go fored long kavenan rod (luk long Elda Bednar, Godoy, Choi, mo Cook, long ol pej 6, 16, 46, mo 82; Brata Newman, pej 36; mo Sista Wright, Freeman, mo Runia, long ol pej 9, 76, mo 62) mo “soem tabu kavenan mo komitmen blong yumi i go long Jisas Kraes mo wanwan long yumi tru long ol Jos koling, felosip, sosol laef mo seves” (Elda Gong, pej 111).

Ol Jos lida oli leftemap tingting blong ol memba blong yusum gud “presen blong sakem sin” (Elda Renlund, pej 96; luk tu long Presiden Eyring mo Elda Uchtdorf, long ol pej 92 mo 86). Oli bin tijim se Restoresen i mekem yumi andastanem wan “tabu fasin, ol semmak samting, mo paoa blong save mekem samting” (Elda Soares, pej 70; luk tu long Elda Phillips, Giraud-Carrier, mo Sabin, long ol pej 49, 114, mo 56). Mo oli rimaenem Ol Lata-dei Sent se “blong karem i kam tugeta Isrel, yumi nidim ol misinari—plante moa bitim olgeta we oli stap finis,” speseli ol senia kapol (Elda Rasband, pej 52; luk tu long Elda Parrella, pej 80).

Taem Presiden Nelson i stap anaonsem ol plan blong bildim 20 niu tempol, hem i talem, “Seves mo wosip blong yu long tempol bae i helpem yu blong tingting selestial” (pej 117; luk tu long Elda Christofferson mo Esplin, long ol pej 19 mo 108).