Bambae Glad blong Yufala I Bigwan
Naoia mi invaetem yufala blong tekem save, tugeta wetem ol testemoni blong yufala we i gat ona, mo go long wan misin.
Ol dia brata mo sista blong mi, ol tingting blong mi tedei i stap long kam tugeta blong Isrel, wanem Presiden Russell M. Nelson i bin talem “samting we i moa impoten we i stap tekem ples long wol tedei. I no gat samting we yu save komperem, we i bigwan tumas olsem, we i impoten tumas olsem, mo we i hae tumas olsem.”1
Blong kam tugeta hem i las riwod blong “praes blong wan sol i bigwan long ae blong God.”2 Hem i simpol nomo olsem ia. Yumi stap karem i kam tugeta ol pikinini long ol las dei ia se bae oli save kasem “blesing we bae mi kapsaetem long hed [blong olgeta]”3 mo promes blong “ol rij samting blong taem we i no save finis.”4 Hemia i we, blong karem i kam tugeta Isrel, yumi nidim ol misinari—plante moa bitim olgeta we oli stap finis.5 Tedei mi stap toktok long ol plante senia kapol we oli gat ol eksperiens insaed long Jos we oli save givim seves olsem ol misinari. Lod i nidim yufala. Mifala i nidim yufala long Niu Yok mo Jikako, Ostrelia mo Afrika, Taelan mo Meksiko, mo evri ples long medel blong olgeta.
Letem mi tekem yufala i gobak long yia 2015. Oli singaotem mi olsem wan niufala memba blong Kworom blong Olgeta Twelef Aposol. Wan long ol gudfala responsabiliti we mifala i mekem olsem Ol Aposol i blong asaenem ol misinari i go long ol ples blong wok. Mi bin tekpat olsem wan Seventi long rod ia,6 be naoia olsem wan Aposol, mi bin filim hamas ol asaenmen ia oli hevi fulwan. Mi stat wetem prea blong stap putum wan bigfala namba blong ol yangfala elda mo ol sista, wanwan, long ol misin raon long wol. Afta mi tanem i go long ol senia kapol. I bin gat 10 long lis. I no gat tumas. Mi sapraes, mi askem patna blong mi long wok we i stap long Misinari Dipatmen se, “?Hamas yumi nidim long wik ia blong fulumap ol rikwes?”
Hem i ansa: “300.”
Naesfala filing ia i stap wetem mi: 10 kapol blong fulumap 300 rikwes.
Presiden Russell M. Nelson i bin leftemap tingting blong ol kapol “blong oli save go daon long ni blong olgeta, mo askem Papa long Heven sapos taem naoia i stret blong oli go long wan misin tugeta.”7 Aot long evri kwalifikesen, hem i talem, “wan tingting blong hat we i wantem blong givim seves i moa impoten evriwan.”8
Olsem we ol skripja oli talem, “sapos yufala i wantem blong wok blong God, nao God i singaotem yufala long wok.”9 Evri samting abaot wok ia hem i loa blong karem olgeta we oli rere i stap. Yumi rid long Jon, “Long fasin ya, man we i go blong planem garen, wetem man we i go blong karem kakae i kam, tufala evriwan i save glad.”10
Mi bin luk loa blong karem kaekae we rere i stap, i hapen long famli blong mi.
Sam yia i pas mi stap visitim famli taem bisop i askem mi blong givim las toktok long sakramen seves.11 Taem mi stap kamaot long foret mi stap kamdaon, wan woman i kam long mi wetem seven pikinini blong hem mo i talem nem blong hem olsem Rebecca Guzman.
Hem i askem, “Elda Rasband, ?Yu save Rulon mo Verda Rasban?”
Mi glad tumas mo ansa, “Tufala i papa mo mama blong mi.”
Yu save andastanem finis wanem hem i minim. Wetem raet we Rebecca i givim long mi, we i stap ia wetem famli long Konfrens Senta, mi serem stori blong hem.12
Papa mo mama blong mi Elda Rulon mo Sista Verda Rasband, tufala i bin stap givim seves olsem senia kapol long Fort Lauderdale Florida Misin.13 Tufala i stap mekem wok blong misinari mo tru long spirit we i lidim tufala blong go noknok long doa blong Rebecca. Hem i wan yangfala nomo mo i laekem tumas blong stap lisin long miusik blong Osmonds, o blong talem stret, fren blong mifala Donny—we hem tu i stap tedei.14 Hem i bin lisin long ol intaviu long midia mo faenemaot se oli ol memba blong Jos Ia blong Jisas Kraes blong Ol Lata-dei. Hem i filim se i gat wan samting we i spesel abaot olgeta, mo stap tingting se maet hem i rilijin blong olgeta, Rebecca i spendem tu yia blong stap lukaotem ol bilif blong Jos insaed blong laebri blong skul. So, taem wan naes kapol we i kaen i noknok long doa blong famli blong hem mo indrodiusum tufalawan olsem Ol Lata-dei Sent misinari, hem i sapraes.
“Mama blong mi i talem long mi blong sendemaot tufala,” afta long taem ia, Rebecca i bin raetem, “be hat blong mi i talem ‘No.’ Mi lukluk stret long fes blong olgeta mo filim plante wom filing mo lav. Memori ia i stap gohed yet blong mekem wota blong ae blong mi foldaon mo ol dip filing insaed long hat blong mi.”15
Rebecca i invaetem olgeta i kam insaed, mo misinari papa mo mama blong mi tufala i serem wan mesej wetem hem, tufala yang sista blong hem, mo, mama blong hem, nomata hem i bin no wantem.
Rebecca i tokbaot long mi: “Tugeta papa mo mama blong yu i gud tumas blong stap eksplenem ansa blong eni kwestin we mifala i bin gat. Mi save tingbaot yet ol fes blong olgeta olsem se i gat wan laet we i stap raonem olgeta. Oltaem mifala i haggem mama blong yu taem hem i aot mo oltaem bae hem i mas faenem wan samting blong helpem mama blong mi filim kamfot mo we oli respektem hem. Oltaem papa blong yu i gat ol ae we i saen taem hem i stap tijim mifala abaot Jisas Kraes. Hem i traem blong mekem papa blong mi i pat long ol toktok raon mo long en, hem i winim hem i kam. Papa blong mi i wan lokol jifkuk long wan kantri klab mo stat blong stap kukum dina blong papa mo mama blong yu, we i gat tu fevret ki lemon pie.”16
Taem Elda mo Sista Rasban i askem Rebecca wetem famli blong hem blong ridim Buk blong Momon, Rebecca i bin mekem olsem blong faef dei. Kwiktaem hem i wantem blong kasem baptaes, be ol narafala memba blong famli oli no bin rere. Fo manis i pas, Rebecca i stanap strong se hem i mas baptaes mo joenem tru Jos. Hem i tingting bak, “Evri pat insaed long bodi blong hem i save se i tru.”17 Long 5 Epril, 1979, ol misinari oli baptaesem Rebecca taem hem i gat 19 yia, mo mama mo tufala sista blong hem. Papa blong mi i bin wan witnes long taem blong baptaes.
Taem mi mitim Rebecca mo famli blong hem long jos, mifala i tekem wan foto blong famli blong hem wetem mi. Mi tekem i go hom long olfala mama blong mi mo hem i holem i kam long hat blong hem. Afta hem i talem long mi, “Ronnie, hemia i wan long ol hapi dei long laef blong mi.”
Ansa blong mama blong mi i stap krae from kwestin ia blong ol senia kapol blong yumi: “?Wanem nao yu stap mekem long level blong laef blong yu naoia?” I gat plante wei we ol senia misinari oli save mekem wanem we ol narafala man oli no save mekem. Yu yu wan nambawan paoa blong gudfala samting, gat plante eksperiens insaed long Jos, mo stap long wan gudfala ples blong leftemap tingting mo givhan long ol pikinini blong God.
Sam long yufala bae i save stap tingting se, “?Be wanem bae i hapen sapos yumi stap lego ol apu pikinini? Bae mifala i mestem ol famli storian, ol betdei, ol fren mo iven ol animol long haos.” Sapos mi bin askem mama se from wanem hem mo papa i bin go long wan misin, mi save se hem bae i talem, “Mi gat ol apu pikinini. Mi wantem olgeta blong save se papa blong yu mo mi i bin givim seves long wan ples blong misin, mifala i wantem blong putum wan eksampol blong ol fiuja jeneresen, mo mifala i bin kasem blesing, plante blesing.”
Olsem we mi bin visitim ol misin raon long wol, mi bin luk ol gudgudfala seves blong plante senia misinari. Hem i klia se oli stap hapi blong mekem “tingting blong Lod” mo stap long “bisnis blong Lod.”18
Long samfala, mo mifala i hop se blong taosen long yufala, fultaem misinari seves long wan narafala kona blong wol, bae i wan stret ples.19 Long ol narawan, blong stap givim seves long wan misin blong Jos seves long hom, bae hem i wanem we oli wantem. Hem i from oli gat ol problem long saed blong helt mo ol narafala situesen, i gat olgeta we oli no save givim seves. Mifala i andastanem ol situesen ia, mo bae hem i hop blong mi se bae yufala save faenem ol wei blong sapotem olgeta we oli stap givim seves. Folem kaonsel blong ol profet mo prea blong save wanem we Lod i wantem yu blong mekem.
Ol ples we i gat ol misin raon long wol, oli ol ples we oli stap krae from help blong yufala. Presiden Nelson i bin talem long ol senia misinari blong yumi se, “Oli yang long spirit, oli waes mo oli wantem blong mekem wok.”20
Long taem blong givim seves, yu gat wan tebol we i fulap long ol janis: bae yu save wok insaed long ol misin ofis o ol tempol, helpem ol yangfala misinari blong kam moa strong sapotem ol smosmol branj, wok insaed long ol famli histri senta o long ol ples we i gat histri, tijim institut, givhan long yumaniterian seves, wok wetem ol yang adalt, help long ol senta blong faenem wok o long ol fam blong Jos. Ol wanwan wei blong givim seves, wanem nao i stret long yu, weaples oli nidim yu, mo olsem wanem yu save rere blong go, oli tokbaot long websaed “Senia Misinari.”21 Yu save toktok tu wetem bisop blong yu o branj presiden.
Mi bin singaotem plante kapol blong givim seves mo stap luk Laet blong Kraes i kavremap fes blong olgeta.22 Long taem we oli kambak, oli stap tokbaot hamas oli bin kam antap mo kam moa kolosap long Lod mo kolosap long wanwan long olgeta, stap filim spirit blong Lod we i kapsaed i kamdaon long olgeta, mo blong save se oli stap mekem bigfala jenis.23 ?Huia bae i no wantem hemia?
Wan misin i save kam wan gudfala japta long laef blong wan kapol. I save gat wan gudfala taetol olsem “Lod blong Mi Bae I Nidim Mi.”24 Bae yu save stap long wan ples we yu no save gud, be, paoa blong Spirit bae i mekem yu filim se i stret olsem hom.
Papa mo mama blong mi, mo ten blong ol taosen blong ol kapol misinari we oli bin kambak oli bin serem testemoni blong glad we oli bin faenem tru long misinari wok. Lod i bin talem insaed long ol Lata-dei skripja se, “!Mo sapos yutufala i stap wok evri dei blong laef blong yutufala blong taltalemaot long ol pipol ia blong oli sakem sin, mo tekem wan sol nomo i kam long mi, bambae glad blong yutufala i bigwan wetem hem insaed long kingdom blong Papa blong mi!”25
Aesea i bin tokbaot wan poem blong wanem i minim blong givim seves long wan “misin.” Ol skripja oli talem long yumi se “misin hem i wol.”26 Gudfala profet ia blong bifo i bin raetem, “From hemia, bae yufala i go aot wetem glad, mo letem pis i lidim yufala i go foret; ol bigfala hil bae oli brokbrok mo singsing long yu, mo evri tri long garen bae oli klapem han blong olgeta.”28 Ol maonten, ol hil, ol garen mo ol tri oli olsem ol misin presiden, ol bisop, ol distrik lida, ol memba mo olgeta we oli lukaotem trutok be “oli no save weaples blong faenem,”28 Bae oli tesifae se ol sinia misinari oli mekem bigfala jenis long ol ples we oli givim seves long hem tru long testemoni blong olgeta abaot Sevya mo Ridima, Jisas Kraes.
Olsem wan Aposol blong Lod Jisas Kraes, mi askem yufala blong givim seves olsem wan misinari blong stap karem i kam tugeta Isrel mo tu blong givim seves bakegen. Mifala i nidim yufala—mifala i nidim yufala. Mifala i glad tumas long yufala ol sinia misinari from laef blong olgeta we yufala i bin lidim mo ol eksampol we yu stap mekem long ol hom, wod mo ol stek blong yufala. Naoia mi invaetem yufala blong tekem save, tugeta wetem ol testemoni blong yufala we i gat ona, mo go long wan misin. Mi prea se nekis taem we mi sidaon blong mekem asaenmen blong ol kapol, bae i gat handred long yufala we i stap wet wetem wari from koling blong yufala.
Mi promesem tu se taem bae yu givim seves bae yu filim lav blong Lod long laef blong yu, bae yu save Hem, Hem bae i save yu, mo “bae glad blong yufala i bigwan.”29 Fetful seves blong yufala we i go long Jisas Kraes bae i givim insperesen mo blesem famli blong yufala, ol apu pikinini blong yufala mo ol apu apu pikinini. “Pis mo lav [bae] i kam plante”30 long laef blong olgeta long ol yia we i stap kam. Mi promesem. Long nem blong Jisas Kraes, amen.