Paoa blong Jisas Kraes long Evri Dei Laef blong Yumi
Stamba blong paoa i fet long Jisas Kraes taem yumi lukaotem blong kam long Hem evri dei.
Ol dia brata mo sista, hemia i Jos Ia blong Jisas Kraes blong ol Lata dei Sent. Hem i wan bigfala glad blong stap wetem yufala long Jos blong Hem. Mi glad tumas we Presiden Russell M. Nelson i rimaenem yumi blong yusum stret nem blong Jos blong Lod oltaem blong yumi save stap tingbaot we Jos Ia i blong hu mo tijing blong hu nao yumi stap folem.
Presiden Nelson i talem: “Long ol dei we i stap kam, bae yumi luk Sevya bae i soemaot bigfala paoa blong Hem we wol i neva luk. … Hem bae i givim plante janis, ol blesing, mo ol merikel long olgeta we oli stap fetful.”
Wan long ol bigfala janis blong mi mo waef blong mi, Renee, i blong mit wetem olgeta Sent long ples we mitufala i givim seves long hem. Mitufala i harem olgeta stori blong olgeta, mitufala i witnesem olgeta lus blong olgeta, mifala i serem ol harem nogud blong olgeta, mo mitufala i selebretem ol sakses blong olgeta. Mitufala i witnesem plante long olgeta blesing mo merikel we Sevya i bin givim long olgeta we i stap fetful. Mitufala i bin mitim ol pipol we i bin go tru long ol hadtaem, mo safa long samting we yumi no save bilivim nomo.
Mifala i bin luk we Sevya i soemaot paoa blong hem long wan wido we man blong hem i bin ded taem tufala i stap givim seves long Bolivia. Mitufala i bin luk long wan yang woman Ajentina we wan i bin pusum hem mo i foldaon i go andanit long tren mo i bin lusum leg blong hem, from nomo wan man i wantem stilim fon blong hem. Mo long singgel papa blong hem, we naoia i mas pikimap ol pis mo traem blong mekem gel blong hem i gohed strong afta long rabis aksiden ia. Mitufala i bin luk long olgeta famli we i lusum ol hom mo evri samting we oli gat long wan faea long Jile jes tu dei bifo Krismes long 2022. Mitufala i bin luk insaed olgeta we oli bin safa afta long wan divos mo long olgeta we oli viktim blong abius.
?Wanem nao i givim olgeta paoa blong oli save go tru long ol had samting ia? ?Wanem nao i givim sam moa paoa blong muv i go fored iven we oli lusum evri samting?
Mi faenem we stamba blong paoa i fet long Jisas Kraes taem yumi lukaotem blong kam long Hem evri dei.
Profet Jekob i tijim: “Mo hem i kam long wol blong hem i save sevem evri man sapos oli lisin gud long voes blong hem; from luk, hem i harem nogud long ol soa blong bodi blong evri man, yes, ol soa blong bodi blong evri samting we oli stap laef, ol man tugeta wetem ol woman, mo ol pikinini, we oli blong famli blong Adam.”5
Samsamtaem,blong gat fet long Jisas Kraes bae i save olsem we yu no save mekem nomo, kolosap yu no save kasem nomo. Yumi save ting se taem yumi kam long Kraes hem i nidim we yumi wanwan i gat paoa, mo stret evriwan we yumi nogat, mo yumi jes no save faenem paoa blong mekem evri samting. Be wanem we mi lanem aot long olgeta pipol ia i fet long Jisas Kraes i wanem i givim olgeta paoa blong statem rod ia. Samtaem bae yumi save tingting se, “mi nidim blong fiksim laef blong mi fastaem bifo mi kam long Jisas,” Be trutok i we yumi kam long Jisas blong fiksim laef blong yumi tru long Hem.
Yumi no kam long Jisas from yumi stret evriwan. Yumi kam long Hem from we yumi no stret mo tru long Hem nao bae yumi save “kam stret.”6
Olsem wanem nao bae yumi save statem blong eksasaesem fet blong yumi smolsmol evri dei? Long mi hem i stat long moning: taem i wekap, mi no lukluk fon blong mi, mi talem prea blong mi. Iven wan simpol prea. Afta mi ridim wan skripja. Hemia i helpem mi blong laef folem kavenan we mi mekem evri wik taem mi tekem sakramen blong “Oltaem stap tingbaot Hem”7 Taem mi statem dei blong mi wetem wan prea mo wetem skripja, mi save stap “tingbaot Hem” taem mi lukluk long fon blong mi. Mi save “tingbaot Hem” taem mi toktok wetem waef mo olgeta pikinini blong mi, taem mi fesem wan problem mo ol hadtaem, mo mi traem blong fesem olsem semmak olsem Jisas.
Taem mi “tingbaot Hem,” mi save filim fasin blong wantem blong jenis, mo sakem sin. Mi faenem stamba blong olgeta paoa blong kipim olgeta kavenan, mo mi filim paoa blong Tabu Spirit long laef blong mi “mo kipim olgeta komanmen blong Hem we Hem i bin givim (mi); blong mi oltaem save gat spirit blong Hem.”8 Hem i helpem mi blong stanap strong kasem en.9 O kasem en blong dei ia. Be long ol dei we mi slak blong tingbaot Hem. Hem i stap ia, i lavem mi mo i stap talem long mi se bae “i oraet, yu save traem bakegen tumoro.”
No mata we yumi no stret evriwan blong stap tingbaot Hem, Papa blong yumi long Heven we i fulap wetem Lav i neva slak blong tingbaot yumi.
Wan long ol mistek we plante taem yumi mekem i blong ting se blong stap kipim olgeta kavenan, o ol promes we yumi mekem wetem God, i olsem yumi mekem bisnis; Mi obei, mo bae Hem i protektem mi long eni rabis samting we bae i save hapen long mi. Mi pem taeting blong mi, mo bae mi neva lusum wok blong mi o sapos no bae faea i bonem haos blong mi. Be afta taem ol samting i no hapen folem wei we yumi wantem, yumi krae long Lod, “Yu no wari se bae mi lus?”10
Kavenan blong yumi i no blong stap givim mo kasem nomo be hem i blong jenisim wan man.11 Tru long kavenan blong mi, mi kasem tabu, paoa blong Jisas Kraes, we i givim mi janis ia blong save kam wan niufala man, blong fogivim hemia we i had blong mi save fogivim, blong winim hemia we i had blong winim. Tingbaot Jisas Kraes oltaem hem i paoa; hem i i givim mi sam moa paoa blong stap “obei long ol komanmen blong Hem we hem i bin givim finis long mi ”12 hem i helpem mi blong mi stap naes, blong smael we i nogat wan risen, blong stap olsem man blong putum pis,13 blong no raorao, blong helpem God i mekem wok blong Hem long laef blong mi.14
Taem ol harem nogud blong yumi, o blong wan nara man we yumi lavem tumas i bitim mak, tingbaot Jisas Kraes mo kam long Hem blong hem i save mekem i isi bakegen, i mekem ol hat i sofsof, mo i mekem we harem nogud bae i gowe. Hem i paoa we i pusum wan papa blong mekem bitim wanem hem i save mekem blong helpem gel blong hem tru long ol harem nogud blong bodi mo filing from i lusum leg blong hem.
Taem Elda Soares i bin visitim Ajentina las Jun mo askem Flavia long eksperiens blong hem afta long aksiden ia, hem i talem se, “Mi bin eksperiensem harem nogud, konkon, kros mo fasin blong no laekem narafala man taem aksiden ia i hapen. Samting we i bin helpem mi i no blong askem, ‘?from wanem mi?’ be ‘?blong wanem?’ Hemia i wan samting we i tekem mi kam moa kolosap long ol narafala mo long Lod. … Blong muv i go we long hem, mi mekemap tingting blong mi blong hang strong long Hem.”15
Presiden Nelson i tijim se, “Presen blong kipim kavenan wetem God hem i paoa blong heven—paoa we i mekem yumi strong blong winim ol hadtaem blong yumi, ol temtesen, mo mekem harem nogud i kam moa gud. … Hemia nao, olgeta we oli kipim kavenan oli gat raet ia long wan spesel spel.”16 Hemia hem i wan pis mo spel we mi bin luk long ol ae blong wido ia, we iven ol tru long ol harem nogud blong misim hasban blong hem evri dei.
Niu Testeman i talem long yumi long wan taem we Jisas mo olgeta disaepol blong hem i stap long bot.
“Wan bigfala win i girap, i blu strong, i mekem wota long bigfala lagun ya i raf we i raf. Nao wota i stap kam insaed long bot ya. …
“Mo hem i … stap slip gud nomo long wan pilo:nao ol man blong hem oli wekemap hem, oli talem se, “Masta, yu luk,bambae yumi lus nao, be yu yu no wari nating.
“Nao Jisas i girap, i tok long win ya, i talem se, “!Yu kwaet!” Mo i tok long wota ya we i raf tumas, i talem se, “!I naf! !Yu stap kwaet!
Hem i talem: “From wanem yufala i fraet olsem? yufala i no biliv yet?”17
Oltaem stori ia i mekem mi tingting. Lod i bin traem olgeta blong yusum fet blong olgeta blong mekem hariken ia i go daon? ?Blong tok long win? Fet long Jisas Kraes i filing blong pis blong stanap agens long hariken, save se bae yumi no save lus from Hem i stap long bot wetem yumi.
Hemia hem i wan kaen blong fet we yumi save luk taem mifala i visitim ol famli long Jile. Olgeta haos blong olgeta faea i bin bonemdaon, oli bin lusum evri samting. Yet taem mifala i stap wokbaot long ples we ol haos i bin stap long hem, afta oli stap talem long mifala olgeta samting we oli bin go tru long hem, mifala i filim se mifala i stap stanap long wan tabu graon. Wan sista i bin talem long waef blong mi, “taem mi luk ol haos kolosap i stap bon long faea, mi kasem wan semmak filing se bae haos blong mi tu bae i bon, mo se bae mifala i lusum evri samting. Mi bin eksperiensem wan pis we nogat toktok i save talemaot, be i no hemia blong harem nogud. Be, Hem i bin save se bae hem i oraet. Trastem God mo laef ol kavenan wetem Hem bae i tekem i kam paoa long ol samting we yumi no strong long hem mo kamfot long taem blong harem nogud.
Mi mi glad tumas long janis ia we mi mo Renee i gat mo mitim ol gudfala Sent ia, from ol eksampol blong fet, paoa mo gohed strong blong olgeta. Long ol stori blong ol hat i brok mo harem nogud we bae i neva go long fas pej blong wan nius pepa o neva kam popula. Long ol pikja we oli no tekem wetem ol wota blong ae i ron mo plante prea afta long lus blong wan o wan rabis divos, mo blong ol samting we oli neva tokbaot from fraet, harem nogud, ol soa blong bodi we wan i save go tru long hem tangkyu long fet blong olgeta long Jisas Kraes mo long atonmen blong hem. Ol pipol ia oli mekem fet blong mi i kam strong moa. from hemia mi glad tumas.
Mi save we hemia i Jos Ia blong Jisas Kraes. Mi save we hem i stanap rere blong givim yumi paoa blong hem, sapos yumi kam long hem evri dei. Long nem blong Jisas Kraes, amen.