Ol Nius blong Jos

Ol Aposol mo Ol Profet Oli Helpem Ol Sent raon long Wol

Long Wol Fogivnes Dei long Julae, Presiden Russell M. Nelson i bin serem wan mesej blong fogivnes long sosol media. “Fogivnes i no wan aksen we yu mekem wan taem nomo, be hem i wan proses we i gogohed we i nidim fasin blong save wet longtaem, sore, mo andastaning,” hem i talem. “I no oltaem isi blong fogivim olgeta we oli mekem nogud long yu. Yu save kasem paoa we i kam long Jisas Kraes.”

Presiden Dallin H. Oaks, Fas Kaonsela long Fas Presidensi, i askem strong long ol yang singgel adalt long wan divosen raon long wol long 21 Mei, blong holemtaet lukluk ia we i no save finis, taem oli stap go tru long ol “taem blong wari” blong tedei.

Presiden Oaks i talem, “Nomata olsem wanem yumi defdefren long ol defdefren wei we Papa blong Yumi long Heven i krietem yumi, Papa God i lavem yumi evriwan, mo long plan blong Hem blong hapines we i stret evriwan, i gat wan ples blong evriwan.” “Yumi soem lav blong yumi long Hem taem yumi kipim ol komanmen blong Hem, we i tekem tu lav ia long ol pikinini blong Hem.”

Presiden Henry B. Eyring, Seken Kaonsela long Fas Presidensi, i leftemap tingting blong Ol Lata-dei Sent we oli bin go long dedikesen blong Saratoga Springs Yuta Tempol long 31 Ogis, blong ansa wetem fet mo paoa long niufala haos blong Lod.

Presiden Eyring i talem se, “Oli bin givim tempol ia [long ol memba blong Jos] olsem wan saen blong tras blong Lod … mo tras blong Hem se bae [olgeta] oli ansa wetem fet mo paoa we i moa bigwan.” “Tempol ia i ples we yu save, oltaem kasem moa paoa blong ol tempol kavenan. Hem i save ol hat blong yu. Hem i save ol tingting blong hat blong yu blong kam antap moa mo blong kam moa ol pipol we oli stret mo gud—long wan taem we wol ia i stap raorao moa mo i stap foldaon.”

Presiden M. Russell Ballard, Akting Presiden blong Olgeta Twelef Aposol i talem se, taem ol memba oli tokbaot mo serem mesej blong Restoresen, bae ol narawan oli filim trutok blong ol toktok blong olgeta. “Samting we i bin hapen long histri blong wol we i moa naes bitim eni nara samting, i bin hapen long Tabu Bus long 1820,” hem i talem. “Ol heven oli bin open.”

Presiden Ballard i bin talemaot testemoni blong hem abaot koling blong Josef Smit olsem wan profet, taem hem i stap toktok long ol memba mo misinari long Toronto, Ontario long Epril. “I mas wan samting we i bin stikim ful bodi blong hem—stat long ol hea long hed blong hem kasem ol leg blong hem—taem hem i bin harem Papa blong yumi long Heven i singaotem nem blong hem, ‘Josef, Hem, Hem i Pikinini blong Mi we Mi Lavem Tumas. !Lisin gud long Hem!’ [luk long Josef Smit—Histri 1:17]. Hemia nao mesej blong yumi,” hem i talem long ol misinari.

Long Epril, Elda Dieter F. Uchtdorf i bin visitim Franis, Ijip, mo Isrel. Hem i bin go long ol sakramen miting long Ijip, i bin toktok long ol studen long Brigham Yang Yunivesiti Jerusalem Senta, mo i bin visitim ol tabu ples.

“Hem i bin wan glad we i toktok i no save eksplenem, se Lod i bin mekem mi blong stap wan disaepol blong hem long taem ia,” hem i talem. “Yes, yumi evriwan i nidim blong stap olsem ol disaepol, mo yumi nidim blong laef folem ol kavenan we yumi bin mekem.

“Be blong stap long ples ia mo blong talemaot witnes olsem wan disaepol, olsem we ol Aposol oli bin mekem long taem bifo, hem i wan samting we i tajem hat blong mi mo i leftemap mi i go long ol ples we mi no bin save pikjarem. Mo wetem wan bigfala filing blong tingting we i stap saon, mi filim se Lod i trastem mi blong stap olsem wan witnes blong Hem mo nem blong Hem. Hem i wan glad tru, blong wokbaot long ples we ol Aposol blong bifo oli bin wokbaot long hem.”

Elda David A. Bednar i bin dediketem hom blong Josef mo Ema Smit we oli bin mekembak long Ketlan, Ohaeo long 26 Ogis. Elda Bednar i bin talem long wan grup blong kolosap 300 pipol, we i tekem tu, ol bigfala man long ol komuniti mo ol lida blong ol relijin, se: “Haos ia i moa bitim wan bilding blong intres long saed blong histri. Haos ia i bin wan hom , long Josef mo Ema Smit—ples we tufala i bin laef tugeta blong wan taem we i moa longfala bitim ol narawan, bifo we Josef i ded.”

Elda Quentin L. Cook i bin toktok long wan yia Yunivesiti Konfrens long Ogis long Brigham Yang Yunivesiti. Hem i talem se ol ekspet(ol man wetem plante save) long saed blong tingting we i groap finis, oli talem se blong givim seves long wan misin, i givim wan proses blong man o woman i groap long saed blong tingting mo blong lanem samting, we i wan wei blong redi from edukesen we i moa hae.

Elda Cook i talem se moa long tu aot long tri BYU studen, oli bin givim seves long ol misin. “Folem semesta, hemia i moa long 21,000 misinari we oli bin kambak long misin. Tingting long paoa we ol studen ia blong BYY oli bin karem i go raon long wol. Tingting long olsem wanem ol misin eksperiens blong olgeta i bin mekem ples blong skul ia i kam moa strong olsem wan risal blong go givim seves long misin.”

Long taem blong wan visit i go long Niu Silan mo Ostrelia long Mei, Elda D. Todd Christofferson i bin invaetem Ol Lata-dei Sent long Niu Silan blong redi from dedikesen blong Oklan Tempol long 2024, taem oli kam moa tabu mo moa olsem Kraes.

Hem i invaetem olgeta blong askem olgetawan, “?Wanem nao mi save mekem, we bae i mekem mi wan man o woman we i moa tabu, we bae i mekem se mi save givim miwan we mi moa gud, olsem wan presen long Lod long dei ia blong dedikesen?”

Elda Neil L. Andersen i bin testifae abaot Jisas Kraes long wan asaenmen blong hem taem hem i stap long Esia. “Ol eksperiens blong mi olsem wan Aposol blong Lod, i bin givim mi wan witnes se Jisas Hem i Kraes mo Hem stap gaedem wok blong Hem long wol ia tru long ol profet mo Aposol blong Hem,” hem i talem. Elda Andersen i bin stap long Eria blong Jos long Not Esia blong mitim mo helpem ol Lata-dei Sent long Koria, Mongolia, mo Japan.

Long 22 Epril, Elda Ronald A. Rasband i bin mitim depiuti presiden blong Saot Afrika, Paul Mashatile, we hem i nambatu hae man long presiden blong Saot Afrika. Hemia i makem fas taem we wan lida blong Jos i bin mitim wan bigman blong wan gavman we rang blong hem i hae olsem long Saot Afrika.

Ol lida oli bin luklukbak long sam long ol wei we Jos i bin help blong karemaot safaring long ol man mo woman, mo givim paoa long ol pipol blong Saot Afrika. Jos i bin givim help blong R240 milian (ova long 13 milian US dola) stat long 2018 i kam. Ol donesen i gat ol disasta rilif blong sapotem ol tingting blong givim wok long ol yut, ol program blong mekem fam, mo ol aktiviti blong stopem vaelens agensem ol jenda.

Elda Rasband i talem se hem i hop se ol hadwok ia oli soem se Jos bae “i stap ia blong wan longfala taem. Mifala i mekem hemia blong folem tufala bigfala komanmen blong Lod we i: blong lavem God mo ol neba blong yumi.”

Long wan visit long Septemba i go long Aeslan, Skotlan, mo Inglan, Elda Gary E. Stevenson i tokbaot bigwan nid ia, blong Ol Lata-dei Sent blong gat “wan hat mo wan maen” (Moses 7:18) wetem “ol laef we i senta long Jisas Kraes,” mo stap mekem evri samting yumi save mekem blong folem Hem. Tugeta wetem waef blong hem Lesa, Elda Stevenson i bin visitim Reikiavik, Aeslan, long 7 Septemba, bifo oli go long Edinbra, Skotlan, mo Notamton, Inglan, long 9–10 Septemba.

Long wan divosen long Marriott Center long taem blong Edukesen Wik long Brigham Yang Yunivesiti long 22 Ogis, Elda Dale G. Renlund i bin givim wan dip toktok abaot olsem wanem fasin blong stap wajem samting, stap mekem ol jajmen, mo fet, oli wok tugeta blong save givim revelesen. Elda Renlund i tijim se taem fasin blong stap wajem samting, stap mekem ol jajmen, mo fet, oli wok olgetawan, yumi no save dipen long olgeta. Olgeta tri ia oli mas wok tugeta.

“Fet ‘[we i nogat aksen]’ [James 2:20] bae i no kam bigwan hemwan. Fet bae i gro nomo tru long fasin blong wajem samting mo stap mekem ol jajmen, tugeta wetem ol nara wok long saed blong spirit. Antap long hemia, fasin blong wajem samting, mekem jajmen, mo fet, plante taem oli wok wan blong kasem revelesen blong yuwan mo tu, andastanem revelesen ia.”

Long 15 Jun, Elda Gerrit W. Gong i mit wetem His Eminence Sheik Osman Nuhu Sharubutu, Nasonal Jif Imam mo Grand Mufti blong Ripablik blong Gana. Miting ia i hapen long ples blong Grand Mufti long Akra.

Elda Gong i serem olsem wanem Jos Ia blong Jisas Kraes blong Ol Lata-dei Sent oli luksave fas papa mo mama blong yumi, Adam mo Iv, semmak olsem ol Muslim: “Mifala tu i biliv se yumi kam long semmak papa mo mama mo yumi sapos blong laef long yuniti olsem wan famli.” Elda Gong i talem se profet blong God, Presiden Russell M. Nelson, i stap lidim yumi mo ol tijing blong hem oli semmak long ol tijing blong Imam. “Profet blong mifala i tijim mifala blong letem God i win, hem i tijim se yumi mas stap olsem ol man mo woman blong mekem pis, hem i tijim se yumi mas helpem ol yut blong yumi blong kasem edukesen mo trening blong mekem se oli save gat sakses long laef, mo hem i tijim mifala tu blong givim paoa long ol woman mo jeneresen blong yumi we i stap kam antap. Hemia evri samting we mi bin harem long yu tedei.”

Elda Ulisses Soares i bin travel blong 10 dei i go long Jael, Yurugwe, mo Ajentina long Jun. Taem hem i stap long Ajentina, hem i bin toktok long wan intafet konfrens, wan intaviu wetem wan man blong nius we oli save gud hem long Ajentina, mo hem i helpem ol memba blong Jos.

“Pis i stat wetem respek long wanwan man o woman we oli defdefren long ol wei blong olgeta,” Elda Soares i talem long olgeta we oli kam tugeta long World Congress of Interreligious and Intercultural Dialogue long Buenos Aires. “Tingting ia blong hamas wan man o woman i gat valiu, i save defdefren long ol defdefren kalja, be hem i wan tingting we i no jenis, long wan wol we i no sua mo stap jenis. Ol raet blong man mo woman i karemaot ol samting we i no balens long saed blong ol spesel raet, ol rij, mo janis. Mo ol raet ia oli mas yusum truaot long wol.”