Ol Kwaet Toktok blong Spirit
Kampani blong Tabu Spirit we i stap oltaem i wan long ol bigfala presen long saed blong spirit we ol Lata-dei Sent oli stap glad long hem.
Fas Toktok
I no longtaem i pas, ol ae blong ful spot blong wol i bin lukluk nomo long 2023 FIFA Woman Wol Kap we Ostrelia mo Niu Silan tufala i oganaesem. Namba blong ol top klas wol i moa long 200 nasonal tim raon long wol, oli kam wetem ol strong paoa long tingting, komitmen, talen mo ol skil blong spotwoman, taem oli go tru long kompetisen blong wol futbol kap ia.
Yumi stap sapraes long ol spotman blong fulap nara spot mo ol nara aktiviti we i gat moa long wan spot, we oli stap winim ol level we i moa hae long spot blong olgeta. Yumi tokbaot ol talen mo presen we God i givim long olgeta. Hemia i tekem tu olgeta we oli kasem talen long saed blong danis, jimnastik, miusik, art, drama, matematik, saens mo sam moa. Wanwan long olgeta ia oli stap soem talen we God i givim long olgeta we afta, bae oli developem mo givim ona long ol hadwok, stadi mo praktis blong ful laef. Ol talen we God i givim i mekem ol pipol oli kam moa gud long sam samting.
Stap Yusum Ol Presen long Saed blong Spirit
Blong lukluk tru long wan ae blong gospel, God i givim plante presen long saed blong spirit, i mekem presen blong olgeta long saed blong spirit i kam antap gud. Ol memba we oli stap kipim ol kavenan blong Jos, oli kasem ol presen blong Spirit we i gat tu, presen blong wan testemoni abaot Jisas Kraes olsem Sevya blong yumi, presen ia we i Tabu Spirit, spirit blong fet blong hilim man mo kasem hiling, spirit blong luksave gud long nogud, spirit blong stap kasem ol merikel mo presen blong waes tingting mo save.1 Lod i invaetem yumi blong lukaotem wetem strong tingting ol nambawan presen, iven ol presen long saed blong spirit. Hem i givim ol presen long saed blong spirit blong blesem yumi mo blong yusum blong blesem ol narawan.2
Blong gobak long olgeta we oli gat talen long saed blong ol spot, hem i impoten blong tingbaot se wan we i gat talen, i no minim se hem i gud evriwan long hem. Nomata long talen blong olgeta, ol spot ia oli go tru ol had praktis mo efot we i jenisim ol spotman ia save kasem hae level blong spot we oli stap mekem. Iven ol presen ia we yumi kasem mo yumi openem, plante taem i kam wetem toktok ia we i mekem yumi wari se presen ia “bae oli nidim blong joenem tugeta.”
Long semmak wei, mi bin luk rod ia blong stap lanem wan niu samting i had tumas we i go wetem ol presen long saed blong spirit. Blong stap praktisim ol presen long saed blong spirit i nidim eksasaes long saed blong spirit. “Blong stap kasem daereksen we i kam tru long Tabu Spirit long laef blong yu, i nidim wok long saed blong spirit. Wok ia i tekem tu prea we i kam wetem tru tingting mo evri dei skripja stadi. Hemia i tekem tu fasin blong kipim ol kavenan blong yu mo ol komanmen blong God. … Hemia i tekem tu fasin blong stap klin inaf blong tekem sakramen evri wik.”3
?Wanem hem ol risal blong praktisim ol presen long saed blong spirit? Olgeta i gat tu, ol kwaet toktok blong Spirit we i helpem yumi givhan long ol evri dei nid blong yumi mo soem long yumi wanem blong mekem mo talem mo ol blesing blong pis mo kamfot. Taem yumi lisin mo tekem aksen folem ol kwaet toktok blong spirit, Tabu Spirit i mekem ol janis mo paoa blong yumi i kam antap mo i kam moa gud bitim wanem we yumi save mekem yumiwan. Ol nambawan presen ia long saed blong spirit bae oli helpem yumi long evri pat blong laef blong yumi.4
Kampani blong Tabu Spirit we i stap oltaem i wan long ol bigfala presen long saed blong spirit we ol Lata-dei Sent oli stap glad long hem.
?Hamas nao presen ia i impoten? Presiden Nelson i ansarem klia kwestin ia taem hem i talemaot se, “long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”5
Olsem wanem blong Invaetem mo Luksave Ol Kwaet Toktok blong Spirit
Truaot long seves blong mi, mi bin faenemaot se raon long wol, evriwan i stap wantem tumas blong save olsem wanem blong invaetem mo luksave ol kwaet toktok blong Tabu Spirit. Ol kwaet toktok blong Spirit oli kam long wanwan man o woman nomo, mo long ol defren wei. Be yumi, yumi stap kasem blesing blong gat toktok blong ol profet, tugeta blong taem bifo mo tedei, oli givim ol niu tingting we oli impoten abaot olsem wanem blong kasem daereksen we i kam long Spirit.
Letem mi givimaot fofala prinsipol we maet i save helpem yu blong stap invaetem mo luksave ol kwaet toktok blong Spirit.
Stanap long Ol Tabu Ples
Faswan i blong stanap long ol tabu ples.6 I no longtaem i pas mi bin tekpat long open haos blong Tokio Japan Tempol. Ansa we oli kam long ol stret invitesen we oli sendem i go long tugeta media mo VIP ges i go moa bitim wanem we oli tingting long hem. Handred pipol oli bin joenem ol tua gaed ia blong tempol. Ol ges oli filim gud tumas tru long naesfala tempol, we i gat tu ol paten mo ol disaen wetem ol strong koneksen blong ol Japanis tradisen. Oli samting we i tajem hat be yet oli givim filing blong pis mo respek we oli kasem tru long ol ges olsem odinens blong famli laen we oli bin tokbaot insaed long ol rum long ples ia bae oli hapen. Be wanem we i tajem hat moa, i bin ol samting we i pusum yumi blong stat blong jenis tru long Spirit.
Mi tingbaot gud wan spesel taem wetem wan impoten gavman ofisol. I bin gat wan taem afta, blong tingting hevi long ples we i kwaet insaed long selestial rum, hat blong mifala i fulap long ol dip filing, hem i talem slo long sora blong mi se “Iven ea we mi pulum insaed long rum, mi filim i defren.” Mi luksave se hem i stap traem blong tokbaot Tabu Spirit we i bin stap, we i tru, i stap stap long ol tabu ples. Sapos yu hop blong filim Spirit, stap long wan ples we i isi blong Spirit i stap long hem.
Ol tempol mo ol hom oli stret tabu ples blong ol spes ia we oli dediketem. Insaed long olgeta, hem i ples we i isi blong yumi invaetem mo luksave Spirit. Ol narafala tabu ples i tekem tu, ol miting haos, ol seminari bilding mo institiut, mo eria blong Jos Histri mo ol visita senta. Stanap long ol tabu ples.
Stanap wetem Ol Tabu Pipol
Nambatu, stanap wetem ol tabu pipol. Bae mi tokbaot seken prinsipol blong daereksen wetem wan narafala memori.
Bae mi neva fogetem taem mi stap tekpat long wan devosen we i tekem ples long wan popula spot stadiom. Oltaem stadiom ia i stap fulap wetem laod noes blong ol pipol we oli wajem ol tim blong ples blong olgeta mo maet oli jikim tu olgeta long nara tim. Be long naet ia, situesen i defren bigwan. Stadiom ia i fulap long taosen blong ol yang pipol we oli kam tugeta blong givim ona mo selebretem mo tingbaot laef blong Profet Josef Smit. Fasin blong stap kwaet, kwaet toktok, fasin blong talem tangkyu mo hat we i stap prea, oli fulumap stadiom wetem Tabu Spirit we i stap. Mi save luk stret long ol fes blong olgeta. Hem i presen ia blong Tabu Spirit i tekem aksen, i stap konfemem ol testemoni we oli stap serem abaot Josef Smit mo Restoresen blong gospel.
Yu no save holemtaet Spirit blong i kam long wan kam tugeta blong ol tabu pipol. Sapos yu hop blong filim Spirit, stap wetem ol pipol we i isi blong Spirit i save stap. Sevya i talem long wei ia: “From we long weaples we tu no tri man oli joen wanples long nem blong mi, mi mi stap wetem olgeta.”7 Blong yufala ol yang pipol, tingting long ol kam tugeta blong yufala wetem ol tabu pipol, ol kworom mo ol klas, BYS mo seminari, ol aktiviti—long wod mo stek, mo ol kwaea blong wod. Jusum blong stap wetem ol pipol mo go long ol ples we yu save faenem fasin blong stap stret mo gud. Faenem paoa blong yu tru long ol pipol. Faenem ol gudfala fren. Stap wan tru fren. Sapotem wanwan long yufala long weaples yu stap long hem. Stanap wetem ol tabu pipol.
Testifae abaot Ol Tabu Trutok
Nambatri, testifae abaot ol tabu trutok oltaem olsem we yu save mekem. Oltaem Spirit blong Givhan i stap serem voes blong Hem taem yumi testifae wetem voes blong yumi. Spirit i givim witnes blong hem long man we i toktok mo hemia we i lisin, i semmak.
Mi tingbaot we wan taem mi bin tekem wan taksi we i ron blong 45 minit long Niu Yok Siti. Blong gat wan naes storian blong gospel wetem draeva blong hamas taem mi gat insaed long taksi i go long eapot, mi pem hem mo rere blong kamaot long taksi. Be afta mi tingbaot se mi no bin serem testemoni blong mi abaot wanem we mi bin tokbaot. Mi stop smoltaem, mi serem wan simpol sot testemoni, invaetem Spirit mo we i mekem wota blong ae blong mitufala i fulap.
Taem yu lukaotem mo tekem ol janis blong serem testemoni blong yu wetem ol narawan, bae yu krietem ol taem blong luksave Spirit blong yuwan.
Lisin long Tabu Spirit
Las prinsipol hem i blong lisin long Tabu Spirit. Hem i save stap olsem fren blong yu we i folem yu oltaem be Hem i toktok long ol wei we i kwaet mo slo. Profet Elaeja i faenemaot se voes blong Lod i no stap long win, etkwek, o faea—be hem i “wan kwaet smol voes.”8 Hem “i no wan voes blong tanda,” be luk “hem i wan kwaet voes we i sofsof stret, olsem se i wan slo toktok, mo i go tru i go kasem sol.”9
Presiden Boyd K. Packer i talem i klia se: “Spirit i no singaot strong blong yumi harem hem o stap sekhan strong long yumi wetem wan hevi han. Be, Hem i toktok long kwaet voes. hem i kavremap yumi sloslo nomo mekem se sapos yumi stap bisi, bae yumi no save filim eni samting.”10 Mi luk se samtaem voes blong Hem i had blong harem, o maet mi bisi tumas mekem se wan long olgeta we mi lavem nao, i save luksave hemia blong mi. Plante taem, waef blong mi Lesa, i stap luksave spirit long bihaf blong mi. Ol papa mo mama o ol lida we oli gat stret mo gud fasin, oli save kasem insperesen tu blong gaedem yu.
Ol noes, ol strong singaot, mo raorao we i stap go raonem wol bae i save winim bigwan, smol, kwaet filing blong Tabu Spirit. Faenem wan kwaet ples, wan tabu spes we long ples ia yu save lukaotem mo kasem daereksen we i kam long Spirit.
Sam Toktok blong Stap Sef
Taem yu tingting long ol prinsipol ia blong invaetem mo luksave Spirit, tingting long ol toktok ia blong kasem proteksen tru long spirit.11
Kasem konfemesen tru ol filing mo tingting long saed blong spirit. Eksampol, ol tingting mo filing we i kam tru long Spirit bae oli wok tugeta wetem ol skripja mo ol tijing blong ol profet we oli stap laef.
Mekem sua se ol filing we yu kasem oli semmak wetem wok blong yu. Be sapos nomo oli singaotem yu tru long stret atoriti, bae yu save kasem insperesen we i kam tru long Spirit blong yu save givim kaonsel o stretem ol narawan.
Yumi no save fosem ol samting long saed blong spirit. Yu save mekem rere wan fasin mo wan ples raon long yu we i save invaetem Spirit, mo yu save mekem yuwan yu rere, be yu no save talem olsem wanem mo wetaem nao bae insperesen i kam long yu. Gat fasin blong save wet longtaem mo trastem se bae yu kasem wanem we yu nidim long taem we i stret.
Yusum bes jajmen blong yuwan. Samtaem yumi wantem blong Spirit i lidim yumi long evri samting. Be, oltaem God i wantem yumi blong yusum ol waes tingting we God i givim long yumi mo tekem aksen folem ol wei we oli go stret wetem hamas yumi save andastanem gud samting. Presiden Dallin H. Oaks i bin tijim:
“Blong wantem Lod i lidim yu i wan strong paoa long tingting, be i nid blong i mas kam wetem save ia se Papa blong yumi long Heven i lego yumi blong mekem plante desisen long ol joes blong yumi. Olgeta we oli stap traem blong givim wok ia blong mekem ol desisen, i go long Lod, mo askem revelesen blong evri joes, bae oli faenem se bae i gat ol taem we bae oli prea from daereksen be, bae oli no kasem ansa. …
“Yu mas stadi gud long hem insaed long maen blong yu. … Afta, yumi mas prea blong Hem i soem rod mo mekem folem. … Sapos yumi no kasem wan ansa, yumi mas mekem samting folem bes jajmen blong yumi.”12
Endem toktok wetem wan Invitesen
Blong endem, Ol Lata-dei Sent oli mas gat presen ia blong kipim ol kavenan blong olgeta. Nomata hemia, i stap yet long yumi wanwan blong lukaotem blong praktisim ol presen blong yumi long saed blong spirit mo afta, blong invaetem mo lanem blong luksave kwaet voes blong Spirit. Fofala prinsipol blong gat spirit i blong helpem yumi tru ol traehad blong yumi long saed blong spirit oli:
-
Stanap long ol tabu ples.
-
Stanap wetem ol tabu pipol.
-
Testifae abaot ol tabu trutok.
-
Lisin long Tabu Spirit.
Paoa blong yu blong invaetem mo luksave ol kwaet voes blong Spirit bae i developem wan step afta wan. “Blong kam blong save moa lanwis blong Spirit i olsem blong stap lanem wan nara lanwis. Hem i wan rod we i slo mo i nidim had wok, mo fasin blong save wet longtaem.”13
Gobak long stat blong toktok blong mi, plis tingbaot se, olsem wan Lata-dei Sent, yu gat presen ia. Pikjarem fast Sandei pat ia we oli jes tokbaot long mi i no longtaem. Wan yangfala pikinini we i stap stanap long wan stul, mo ol man oli no save luk hem biaen long pulpit. Papa blong hem i stanap narasaed long hem, i helpem mo leftemap tingting blong hem mo i stap toktok slo long sora blong hem taem hem i glad blong talem se “Mi wan pikinini blong God.”
Nekis testemoni we i kam afta, hem i wan yang adalt we i mekem fani long saed blong wari, “Mi wantem tu sapos mi gat wan we i save stap toktok slo long sora blong mi olsem ia.” Afta, hem i kasem wan kwik insperesen mo testifae se, “Mi gat wan we i stap toktok slo long sora blong mi olsem ia—!Tabu Spirit!”
Mi klos wetem wan invitesen !speseli blong evri yut! Plante long yufala i statem dei blong yufala taem yufala i stanap long fored blong wan mira [klas]. Sapos hem i tumoro, wik ia, yia ia, oltaem, yu stop smol taem mo yu lukluk yuwan long mira. Tingting long yuwan, o talem laod sapos yu wantem, “!Wao, traem luk mi! !Mi mi gud tumas! !Mi wan pikinini blong God! !Hem i save mi! !Hem i lavem mi! Mi mi kasem presen ia—!blong gat Tabu Spirit olsem fren blong mi blong oltaem!”
Mi talem testemoni blong mi long yufala, ol Lata-dei Sent we oli gat presen, blong God, Papa, Jisas Kraes mo Tabu Spirit, we oli testifae long Olgeta. Long nem blong Jisas Kraes, amen.