?Yu Yu Wantem blong Stap Hapi?
Stap long kavenan Rod Laef blong yu bae i moa isi, moa hapi, mo fulap wetem glad.
?Yu yu wantem blong stap hapi? ?Wanem nao i mekem yu yu no stap hapi? Presiden Russell M. Nelson i talem: “Sapos yu wantem blong stap harem nogud, brekem ol komanmen—mo neva sakem sin. Sapos yu wantem blong stap glad, stap long rod blong kavenan.”1 Blong stap hapi, ?i simpol? Mekem ol kavenan mo holemtaet olgeta long laef blong yufala. Bae yumi luk sam long ol samting we i save helpem yumi stap long rod blong kavenan mo i mekem yumi hapi.
1. ?Wanem hem i kavenan rod?
Elda Dale G. Renlund i talem se, “toktok ia kavenan rod i stap minim moa long wan kavenan we i mekem yumi kam long Kraes mo karem yumi kam tugeta long Hem. Tru long kavenan rilesensip ia, yumi gat akses long paoa blong Hem we i no save finis. Rod ia i stat wetem fet long Jisas Kraes mo fasin blong sakem sin, folem wetem baptaes mo kasem Tabu Spirit.”2 Yumi mekem i kam niu ol kavenan blong yumi evritaem yumi kakae sakramen.
Statem wetem kavenan ia blong baptaes, yumi mekem plante moa kavenan truaot laef blong yumi. Bakegen, Elda Renlund i talem: “Kavenan rod ia i lid i go long ol odinens blong tempol, olsem tempol endaomen. Endaomen hem i presen blong God blong ol tabu kavenan we i joenem yumi moa fulwan i go long Hem.”3
2. ?Yu yu stap long kavenan rod?
Samtaem taem yumi mekem ol kavenan, yumi no stap kipim olgeta. Taem hem ia i hapen, olsem wanem nao yumi save kambak long kavenan rod ia? Letem mi serem sam eksampol blong kambak long kavenan rod ia.
Wan manis i pas, mi bin risivim wan mesej we i kam long wan riten misinari we mifala i bin mekem misin tugeta. Hem i talem: “Smol taem ia i bin had tumas long mi. Blong faet wetem ol wari mo harem nogud evri dei i mekem i hevi long mi, mo i had tumas. Mi filim se mi stap miwan mo no stap glad. Mi bin stap prea from daereksen long Papa blong yumi long Heven from pis mo kamfot long wanem mi save mekem blong save faet agensem ol hadtaem ia Taem mi stap prea, mi filim smol voes blong Spirit i talem long mi se mi nid blong pem taeting blong mi fulwan. … Mi filim spirit i strong tumas, mo wantaem nomo mi filim strong tingting ia blong mekem olsem. Wetem tingting ia blong wantem mekem, mi filim spirit i talem ‘sapos yu pem taeting blong yu evrisamting bae i Oraet.’ Mi stap traehad yet blong faenem pis, be mi gat wan testemoni long Sevya blong yumi mo se tru long obediens, mi save filim mo faenem pis we mi stap lukaotem blong hat mo maen blong mi. Mi disaed bakegen blong kambak long Jos mo blong lukaotem blong gat Spirit long evri samting we mi stap mekem.”
Naoia hem i kam oraet. Yu tu yu save askem help long Papa long Heven from pis, be ansa bae i defren long wanem yu stap tingting long hem. Taem yu stap lukaotem blong save Sevya mo prea long Papa long Heven, bae Hem i givim stret ansa long yu.
Presiden Thomas S. Monson i bin tijim:
“Bigfala lesen we yumi save lanem long laef long wol ia hem i taem God i toktok mo yumi obei, nao bambae yumi mekem samting i raet oltaem.”4
Taem yumi kipim ol komanmen, laef blong yumi bae i fulap long glad, bae i kam moa gud, mo bae i no had tumas. Ol jalenj mo ol problem blong yumi, bae i isi moa blong tekem, mo bambae yumi kasem ol blesing we [God] i promesem.”5
Taem oli bin kolem mi blong kam wan bisop, hem i long wan taem we mi bin fesem wan bigfala hadtaem. Mi bin wan yangfala papa blong 30 yia, mi bin fesem hadtaem long saed blong mani blong helpem famli blong mi. Mi no save faenem wan ansa, mo mi ting se ol jalenj ia bae i no save en. Mi bin taed long hadtaem long saed blong kasem mani mo blong stap harem nogud. Mo i mekem mi stat blong gat tu tingting long paoa blong spirit we mi gat. Hem i long hadtaem ia nao we stek presiden blong mi i bin givim koling ia long mi. Mi bin akseptem koling ia nomo, nomata we i had.
Waef blong mi i bin gat wan intaviu tu wetem stek presiden, be hem i no save talem yes, mo i no talem no be i stap krae nomo. Hem i bin krae ful wik, mo stap askem Papa long Heven “From wanem naoia?” mo “Yu yu save gud wanwan long mifala?” Hem i no bin kasem wan ansa, be oli bin sastenem mi olsem wan bisop long Sandei blong wik ia. Hem i nomo askem Papa long Heven ol kwestin ia be hem i sapotem mi long koling blong mi blong sikis yia.
Long Sandei we mi bin rilis, waef blong mi i harem wan voes taem hem i stap tekem mo kakae sakramen. Smol voes ia i talem, “From i bin had tumas long yu blong wokbaot, Mi bin singaotem hem olsem wan bisop blong mekem se hem i save sapotem yu mo wokbaot long ples blong yu.” Hem i bin lukluk i go bak long ol sikis yia we i pas, hem i kam blong faenemaot se evri jalenj we hem i tingse bae i no save en oli bin kam gud bakegen long ol taem ia.
Yumi bin lanem se, taem yumi ting se hem i no wan gud taem blong yumi kasem wan koling, hem i stret taem ia nao we yumi nidim tumas blong kasem koling ia. Long wanem taem we Lod i askem yumi blong stap long eni koling, iven sapos koling ia i had tumas o i no had , Hem i luksave olgeta nid blong yumi. Hem i givim paoa we yumi nidim mo i gat ol blesing we i rere blong givim long yumi sapos yumi stap fetful blong wok.
Bae i gat plante nara samting we bae i save karemaot yumi blong stap long rod blong kavenan. Nomata wanem, hem i neva let blong tanem ol hat blong yumi i go long Papa long Heven blong kasem help. Elda Paul V. Johnson i tijim: “Taem yumi folem Setan yumi givim paoa long hem. Taem yumi folem God, Hem i givim yumi paoa.”6
King Benjamin insaed long Buk blong Momon i bin testifae: “Mo antap long samting ia, mi wantem se yufala i tingbaot gudfala mo hapi ples blong olgeta we oli holem ol komanmen blong God. From luk, Lod i blesem olgeta long evri samting, ol samting blong laef ia tugeta wetem blong spirit; mo sapos oli fetful kasem en, bae oli go insaed long heven, blong mekem se oli save stap wetem God long wan ples blong hapi we i neva gat en.”7
3. ?Olsem Wanem taem yumi Kipim ol Kavenan we yumi Mekem wetem God I Mekem Yumi Stap Hapi?
Waef blong mi i talem se mared blong mitufala i karem mitufala i kam tugeta, mo from hemia hem i kam blong save mekem ol samting we hem i no bin save mekem bifo. Eksampol,long taem we hem i yang, hem i i bin filim se i had blong wokbaot long tudak, be i nomo had from mi stap go wetem hem. Hem i sot mo no save kasem ol kapod we i hae, sapos nomo hem i yusum wan jea o lata bae hem i save kasem, be mi save karem ol samting long ol kapod we i hae blong givim long hem, from mi moa tol bitim hem. Blong karem yok blong Sevya long yumi i olsem. Taem yumi putum yok blong Hem, yumi save mekem ol samting, we yumi no save mekem yumiwan, from Hem i save mekem ol samting we yumi no save mekem yumiwan.
Elda David A. Bednar i talem: “Blong stap mekem mo kipim ol tabu kavenan, i joenem mo fasem gud yumi wetem Lod Jisas Kraes. Long fasin ia, Sevya i stap singaotem yumi blong stap dipen mo kam wan wetem Hem, nomata sapos ol traehad blong yumi i no naf blong komperem wetem Hem. Taem yumi trastem mo putum ol hevi samting blong yumi wetem Hem long laef ia, i tru we yok blong Hem i isi nomo, mo ol hevi samting, oli no hevi.”8
Presiden Nelson i bin tijim tu se:
“Blong putum yok blong yu long Sevya i minim yu gat raet long paoa blong Hem mo paoa we i pem praes.”9
“Presen blong kipim kavenan wetem God hem i paoa blong heven—paoa we i mekem yumi strong blong winim ol hadtaem , ol temtesen, mo mekem harem nogud i kam gud moa. Paoa ia i mekem rod blong yumi i kam isi. Olgeta we oli laef folem ol hae loa blong Jisas Kraes, oli save kasem ol hae paoa blong Hem.”10
“[K]ipim ol kavenan i mekem laef i moa isi! Wanwan man mo woman we i mekem kavenan long ples blong baptaes mo insaed long ol tempol—mo i kipim olgeta—i kasem moa akses long paoa blong Jisas Kraes.”11
Ol dia brata mo sista blong mi, ?Yu yu wantem blong stap hapi? Stap long Kavenan Rod Laef blong yu bae i moa isi, moa hapi, mo fulap wetem glad. Sevya blong yumi i stap invaetem yumi, “Yufala evriwan we i stap hadwok tumas, mo stap karem ol hevi samting, yufala i kam long mi, nao bambae mi mekem we yufala i spel gud.”12 Hem i Kraes we i stap laef. Hem i karem ol hevi samting blong yumi mo mekem laef blong yumi i kam moa isi. Long nem blong Jisas Kraes, amen.