Senia Misinari Taem
Wan long ol bes wei we ol senia kapol oli save gat ol gudfala memori i taem oli givim seves tugeta long wan misin.
Taem ol fren blong mifala we oli gat 60 o 70 yia oli fogetem samting, plante taem mifala i mekem fani blong talem se oli gat wan “senia taem.” Be mi wantem tokbaot wan defren kaen blong senia taem–wan taem we i gudgudwan tumas we i mekem memori ia i stap we i no gat en. Hem i taem ia, taem wan senia misinari kapol i luksave se oli stap mekem stret samting we Lod i wantem tufala blong mekem. Long ol gudfala taem olsem, tufala i luksave se:
-
Oli gat ol eksperiens blong laef blong tufala blong serem, wetem ol talen, ol skil, mo save long gospel we oli save yusum blong blesem ol narawan.
-
Eksampol blong olgeta i wan blesing long ol pikinini blong olgeta, mo ol pikinini blong ol pikinini blong olgeta.
-
Taem tufala i stap givim seves, tufala i stap mekem ol fren we bae oli stap oltaem.
-
Mared blong tufala bae i gro strong moa evri dei.
-
Seves long nem blong Hem i swit.
Ol Taem long Taem blong Wok
Ol senia kapol fren blong mi. Ol kaen taem olsem i mas hapen long taem blong wok, mo hemia long plante long yufala. Tingting long stori we Elda Jefri R. Holan blong Kworom blong Olgeta Twelef Aposol i bin talem abaot wanem we wan senia kapol we i givim seves long Jile i bin save mekem. Papa mo mama blong wan long ol yangfala elda i ded. Misin presiden i stap longwe tumas mekem se hem i no save kasem misinari ia kwiktaem.
“Be i bin gat wan swit misinari kapol we tufala i raef long tingting we tufala i bin stap wok long eria ia,” Elda Holan i talem. “Tufala i kam, mo sidaon wetem misinari ia, mo tufala i kea long hem mo leftemap tingting blong hem kasem taem we misin presiden i save toktok stret long misinari ia. Mifala i bin gat ol gudfala yang misinari long misin blong mifala, be wan yang singgel misinari bae i no save mekem long elda ia wanem we tufala kapol ia i bin save mekem.”1
Skil blong tufala long tetaem ia i blong serem lav mo sore long wan taem blong nid. Tufala i no wari se bae tufala i toktok wanem lanwis be lanwis we i olsem lanwis blong lav blong Kraes. Tufala i no wari se tufala i misim betdei blong wan apupikinini o blesing blong wan bebi, nomata ol taem ia oli impoten tu. Tufala i wari blong stap long ples we Lod i save yusum tufala blong blesem laef blong wan long ol pikinini blong Hem. Mo from se tufala i bin glad blong mekem, nao Lod i bin save letem tufala i ripresentem Hem.
Plante Taem Seves I Wan Stret Samting blong Mekem
I tru we i no gat wan senia misinari we i faenem se, blong livim hom i stap, i wan stret samting blong mekem. I bin semmak long Josef Smit, Brigham Yang, Jon Teila, o Wilfod Wudrof. Oli bin gat ol pikinini, mo ol apupikinini tu, mo tufala i lavem ol famli blong tufala semmak olsem we yumi lavem famli blong yumi. Be oli bin lavem Lod tu, mo oli bin wantem blong givim seves long Hem. Bae wan dei, bae yumi mitim ol bigfala man ia we oli bin help blong stanemap dispensesen ia. Taem bae yumi mit, bae yumi glad se yumi no bin lukaot blong stap haed long sado long taem we yumi sapos blong givim seves.
Sam oli laekem moa blong givim seves mo stap long haos blong olgeta semtaem. Afta we hem i kasem wan strok, Ahase Skumaka Nelson (i no famli blong Elda Nelson) i mas stap insaed long wan wiljea nomo, nao sista ia i fraet se tingting we hem i wantem longtaem finis, we i blong go long wan misin wetem hasban blong hem, Don, bae i nomo save hapen. Nao wan neiba i tokbaot long tufala abaot Jos seves misin blong hem long wan stoahaos blong wan bisop. Nao tingting blong tufala i kam antap. Tufala i toktok wetem wan supavaesa long stohaos, tufala i fulumap rekomendesen fom blong tufala, mo oli bin singoatem tufala blong givim seves tu dei long wan wik long wan stoahaos kolosap long hom blong tufala.
“Hem i isi blong jes lukbak mo tingting, ‘O, mi bae oli nomo nidim mi nao,’” Ahase Nelson i talem. “Be naoia mi filim se oli nidim mi. Mo hemia i wan testemoni blong mi.”
Yes Oli Nidim Yu
Sapos yu gat temtesen blong tingting se oli no nidim yu, mi wantem talem long yu se, no, i no tru, oli nidim yu i stap. I no gat wan misin presiden insaed long Jos we bae i no laekem blong gat sam moa kapol blong oli givim seves long misin blong hem. Ol senia oli mekem ol yangfala elda mo sista oli kam strong moa. Oli givim sapot we i helpem ol narawan blong givim moa gud seves long responsabiliti we oli gat. Mo, ?yu save se i minim wanem long wan lida we hem i jes kam memba blong gat samfala memba blong Jos we oli gat fulap eksperiens? Ol senia kapol oli wan stret ansa long ol prea blong ol bisop mo ol branj presiden.
Mifala i leftemap tingting blong ol misin presiden blong oli lukaotem samfala kapol blong lukluk long ol nid insaed long misin blong olgeta. Ol bisop oli mas lukaotem ol kapol we oli save givim seves. LDS.org i gat ol pej mo ol pej we oli putum ol janis blong ol senia kapol oli givim seves. Be, antap long evri samting ia, ol kapol oli save go daon long ni blong olgeta, mo askem Papa long Heven sapos taem naoia i stret blong oli go long wan misin tugeta. Aot long evri kwalifikesen, wan hat blong wantem givim seves i moa impoten evriwan (luk long D&C 4:3).
Taem mi stap presem wok blong ol senia misinari, mi luksave se i gat plante we oli wantem blong givim seves be oli no save mekem. Ol samting olsem yia, nogud helt, oli mas luklukgud long olgeta samting ia, wetem tu ol impoten nid blong ol memba blong famli. Be taem hat i strong blong givim seves, mo i gat samting olsem i blokem, ol narawan oli save kam olsem han mo leg blong yu, mo yu save givim mane from.
Ol senia kapol, nomata huia yu, mo weaples yu stap long hem, plis prea from kaen janis ia blong krietem ol bigfala senia misinari taem tugeta. Papa long Heven bae i helpem yu save wanem yu save mekem.