Spes blong Yumi
Mi Gat Blesing from Mi Obei Loa blong Taeting
Sabrina T., Sao Paolo, Brasil
Taem mi smol, famli blong mi mo mi i gotru long sam tes long saed blong faenens we i stap gogo kasem taem we mi gat samples 10 yia. Papa blong mi i no save faenem wok, mekem se hem i stap salem samting long rod mo i winim smol mane nomo. Mama blong mi i stap long haos blong lukaot long mi mo smol brata blong mi.
Be iven taem mifala i stap pas tru long ol hadtaem ia, mifala i gat wan testemoni blong pem taeting mo givim ol nara ofring. Mifala i bin fetful blong pem taeting evri manis mo mifala i neva sot long wan samting. Mifala i save gud se mifala i stap gohed blong kasem blesing from kaen fasin blong Lod i bigwan mo from se Hem i stap holem promes blong Hem taem yumi stap obei long ol komanmen blong Hem.
Ol dei blong tes long faenens oli kam blong finis. Ol blesing we Lod i bin givim long yumi long ol las yia, oli bin bigwan tumas.
Mi save se, olgeta we oli fetful blong pem taeting, mo oli stap pem ofring blong olgeta wetem lav wetem gol ia blong blesem laef blong ol narafala man, bae oli no sot long wan samting, mo wan samting we i gud moa bae i save hapen long olgeta, semmak olsem i bin hapen long mi mo famli blong mi. Ol blesing bae oli kam antap. Mi save hemia. Mi gotru long hemia.
Stap Ones long Evri Samting
Alivsi H., Jalisko, Meksiko
Long stat blong evri semesta long skul, mifala i stap kasem ol fri samting we i gat wan notbuk, wan ajenda, mo sam nara samting moa. Long wan yia, mi laenap blong kasem ol samting blong mi, mo mi luksave se wanem we mi bin kasem, bae i helpem mi plante.
Long en blong dei, mi bin luk se oli bin stap givim tu samting we i semsemmak. Bae i isi nomo blong laenap bakegen mo kasem wan moa set blong ol fri samting ia, mo mi disaed blong mekem. Yes, oli fri nomo, mo mi nidim samting ia.
Mi go kwik long toelet, mo mi luk wan mobaelfon we wan gel i fogetem i stap. Hem i wan long ol niu model, mo mi jes lusum fon blong mi wan wik i pas. Be mi no tingting nating blong holemtaet. “Hemia stil ia” mi talem long miwan.
Afta, taem mi stap go blong laenap from ol fri samting, mi luksave se hemia tu bae i no ones semmak olsem i no ones blong holemtaet fon ia from se bae mi mas giaman mo talem se mi no kasem wan fri set yet.
Mi glad tumas from smol eksperiens ia we i tijim mi wan bigfala lesen. Mi givimbak fon mo mi go hom wetem wan notbuk, wan ajenda mo wan fri samting, be wetem wan naesfala filing se mi bin tru long evri samting, i nomata se i smol olsem wanem.