Ol Infomesen blong Ol Yang Adalt
Makem Ol Blesing long Madagaska
Nomata ol hadtaem blong politik mo ekonomi long kantri blong hem, Solofo i dipen long ol blesing we oli kam taem wan i stap laef folem gospel.
Ol Foto: antap i kam long Solofo Ravelojaona; andanit © iStock/Thinkstock
Afta we waef blong hem i lusum fas bebi blong hem taem hem i gat bel yet, we i mekem hem i harem nogud tumas, Solofo Ravelojaona i filim se prea blong tufala i gat ansa taem waef blong hem i gat bel nambatu taem. Hem mo waef blong hem, Hari Martine i tekem se taem we gel blong tufala i bon long wol, i wan long ol blesing blong tufala we i moa bigwan. Solofo i eksplenem: “From se mitufala i bin askem God, mo Hem i givim gel ia long mitufala, mitufala i givim nem ia long hem, we long lanwis blong Malagasi, i minim ‘God i stap ansa.’”
Solofo, i wan yang adalt long Madagaska, i gat save ia se God i stap ansa long ol prea, mo long stret taem, i blesem olgeta we oli fetful. Solofo i talem: “Laef i had mo taem ol pipol oli no kasem wanem we oli wantem, sam oli stat blong aksem ‘?From wanem hemia i hapen long mi?’ Maet oli aot long Jos mo oli kwestenem bilif blong olgeta we oli gat long God. Be taem yumi stap laef long gospel mo ridim ol skripja, hem i moa isi. Taem yu rili laef folem gospel, yu rili save luk ol blesing.”
Taem yu laef long wan kantri we i gat ol bigfala jalenj, luk laef we i pua tumas, gavman we i jenis oltaem, ol tul blong wok we i no gat, mo ol disasta, yumi luk klia from wanem Solofo i talem se laef i had. Be long hem, ol blesing we i kam taem hem i laef folem gospel, i bigwan bitim ol hadtaem ia. “Mi no save kaontem ol blesing we mi bin kasem, be wanem i impoten i we mi stap laef folem gospel,“ hem i talem.
From se Jos i niu long Madagaska (fas branj i bin oganaes long 1990) Solofo i talem se had pat blong stap olsem wan memba i ol giaman toktok mo ol rong tingting abaot Jos. Solofo i talem se, semmak olsem long visen blong Lihae abaot tri blong laef, “ol pipol oli no akseptem gospel fulwan from se oli sem long fored blong ol fren, o oli fraet se famli blong olgeta i sakemaot olgeta.” Wanem i mekem se Solofo i defren, i we, “mi neva sem.” Mi laef folem gospel, mo oltaem mi wantem serem gospel ia wetem ol wokfren blong mi, iven sapos sam long olgeta oli no gat intres.” Plante taem, hem i serem simpol testemoni blong hem, i serem gogo we ol wokfren blong hem oli stap singaotem hem “pasta.”
Long medel blong hadtaem blong ekonomi mo politik, Solofo mo Hari Martine oli dipen long ol blesing blong tempol kavenan blong tufala (tufala i bin mared long Johanesbeg Saot Afrika Tempol, wan yia afta long misin blong tufala—Solofo long Yuganda, mo Martine long Madagaska), mo tu, tufala i dipen long tras we tufala i gat long Lod. “Mi gat gospel, mo mi jes putum laef blong mi long han blong God.” Solofo i eksplenem. Hem i save dipen long strong testemoni blong hem from se hem i gat fet finis long “ol ansa blong God.”