Luklukbak
?Ol Instraksen Ia, Oli Gat Mining?
Woman we i raetem stori ia i stap long Amerika, mo hem i ded las yia.
Wan baeskel trip i winim tingting blong mi se i gat nid oltaem blong stap jekem map blong rod blong laef we i kam long Lod.
Samfala yia i pas, mi bin go long wan baeskel trip long Franis wetem sista blong mi, tawian sista blong mi mo gel blong hem. Evri moning, bae mifala i kasem tri pej we i gat ol ditel instraksen, mo sapos mifala i folem stret olsem we i stap, bae i lidim mifala i go long nara ples we mifala i mas kasem long dei ia. Mifala i stap ron tru long ol plantesen, mo instraksen i talem blong mifala i go “50 mita Not, mo afta tanem long lef mo ron 100 mita.” Plante taem, instraksen ia i givim ol saen mo nem blong ol strit.
Wan moning, mifala i stap ron tru long wan naesfala rod, be i no longtaem afta, mifala i luksave se instraksen ia i no stret folem ples we mifala i bin stap long hem. Kwiktaem mifala i lus, nao mifala i disaed blong gobak long las ples we mifala i bin save se mifala i stap long stret rod, mo luk sapos mifala i save faenem weaples blong go long hem.
I tru tumas, taem mifala i kasem ples ia, mifala i faenem wan smol rod saen, we i stap long instraksen blong mifala, we mifala i no bin luk. I no longtaem afta, mifala i stap long rod blong mifala bakegen, mo folem progres blong mifala wetem instraksen we i stap, we bakegen i luk se i stret.
Eksperiens ia i stap olsem wan pikja we i ansarem bigfala kwestin we mi bin gat: ?From wanem we, taem wan we i gat testemoni blong gospel finis, bae i save foldaon i go? I kam klia long mi se taem we yumi tekem wan rong rod (sin) o yumi foldaon blong folem ol komanmen blong God, ol instraksen (toktok blong God) bae i nomo stret long laef blong yumi. Map ia, olsem we i bin stap, i nomo stret long ples ia we yumi stap long hem. Sapos yumi no go longwe tumas long rong rod, bae yumi luksave se rong i blong yumi mo yumi nid blong gobak (sakem sin) o mekem promes bakegen blong laef olsem we God i bin givim komanmen long yumi blong mekem, mo gobak long ples we yumi save se yumi bin stap folem rod long stret fasin.
Plante taem tumas, taem instraksen i nomo go wetem ples we yumi stap long hem, yumi stap gat kwestin long ol instraksen ia. Be yumi nomo tanem i gobak; be yumi stap poenem fingga long ol instaksen, mo afta, yumi minim blong nomo folem olgeta instraksen ia evriwan. Long en, afta we yumi sakemaot visen blong kasem ples we yumi wantem go long hem, yumi go lus i stap, yumi wokbaot olbaot long ol rod we oli flasem gud, blong smol taem, be oli no tekem yumi i go long ol ples we yumi nid blong go long hem.
Evri dei, yumi gat janis blong stadi long ol skripja. Mo evri sikis manis yumi gat janis blong gat wan jeneral konfrens blong Jos. ?I no ol taem ia nao we yumi save stap jekem map blong rod blong yumi mo mekemsua se yumi stap long ples we yumi sapos blong stap long hem? Long wan taem, taem mi bin stap lisin long konfrens, mi bin filim se, nomata we yumi no stret evriwan, yumi save kam blong save se yumi stap long stret rod sapos ol instraksen ia we oli kam oli saen o luk stret long yumi.
Semmak olsem we blong stap folem ol stret daereksen bae i tekem yumi i go long ol defren ples long laef ia, blong stap stadi long ol skripja mo stap folem kaonsel blong ol profet we oli stap laef, i givim janis long yumi blong save jekem rod blong yumi, mo stretem sapos i nid blong mekem, mo long en, kasem selestial hom blong yumi.