Mi Bin Putum Tingting blong Stop
Man we i raet i stap laef long Niu Yok, YSA.
Ol skil blong mi long piano oli kam gud, iven afta plante yia blong praktis. Papa mo mama blong mi, tufala i talem se mi save stop long wan kondisen nomo: Mi mas lanem 50 hymn.
Mi spid i go long haos, ae blong mi i fulap long wota afta we mi gat wan nara piano lesen we i bin go gud. Hem i nambafo yia we mi stap tekem piano, mo mi no bitim singsing ia “Twinkle, Twinkle, Little Star.” Tija blong mi i traem blong faenem wan samting we i gud blong talem abaot nogud wei we mi stap plei, be mi stap harem nogud moa. Papa mo mama blong mi i stap pem mane blong ol lesen blong piano we mi no bin wantem mo mi nomo gat hop from.
Mi wantem papa mo mama oli letem mi blong mi stop. Mi plis long tufala: “Plis. Bae mi mekem eni samting. ?Bae mi mekem wanem moa?”
Afta we tufala i storian, tufala i talem: “Sapos yu lanem 50 hym, bae mitufala i letem yu blong yu stop.”
Mi stat blong praktis wantaem. Mi wantem stop kwiktaem mo mi glad nomo blong spendem sam moa taem long piano. Fas hym, “Tangkyu Papa God Yu Givim Profet,” (STSP, pej 36), i tekem kolosap wan manis blong mi save gud. Mi gat tingting yet blong stop, mekem se mi gohed blong praktis.
Wan gudfala samting i hapen: naoia i moa isi blong plei ol hym. Mi filim se mi hapi moa evri dei. Mi stap singsing ol hym long dei taem mo singsing laod moa long sakramen miting.
Long en, mi stop blong kaontem hamas hym mi bin save. Taem skil blong mi blong plei piano i stap kam gud moa, mi luksave se mi save lanem wan niu hym long 30 minit nomo.
Taem mi ademap olgeta evriwan, mi bin lanem ova long 50 hym. Mo i no gat wei nating blong mi stop blong plei long piano. Mi kam blong mi trastem mi moa long paoa blong mi blong plei, mo mi bin filim paoa blong ol hym long laef blong mi.
Ol hym oli olsem ol skripja; oli stap tokbaot trutok. Taem mi plei ol hym, mi filim olsem se mi stap draonem miwan insaed long ol skripja. Blong lanem olsem wanem blong plei i wan stat blong bildimap testemoni blong mi mo blong stap lanem trutok. Mi stap gotru ol toktok blong ol defren hym blong helpem mi truaot long dei. Blong stap plei long piano i bin mekem testemoni blong mi i kam strong moa mo i bin openem ol doa long mi long weaples mi stap go long hem.