Ol Gadman Antap long Taoa

Gadman

Ol gadman oli ol man we oli stap waj, we oli putum olgeta antap long wan wol o insaed long wan taoa blong save waj mo wonem man long ol denja we oli stap kam longwe i kam. Oli stap yusum olgeta blong protektem ol taon, mo tu, ol plantesen blong grep, ol garen, mo ol plantesen blong buluk.

Ol Defren Kaen Taoa

Ol taoa we oli bildim long ol taon wetem wol, oli bildim olgeta long ol get o long ol kona (luk long 2 Kronikel 26:9). Ol taoa long ol get mo taoa oli stap hae antap we oli save luk ol denja we oli stap kam mo faet agensem atak blong ol enemi 2 Kronikel 26:15).

Ol sefhaos o taon taoa, oli ol haos we oli stanap olgetawan, we oli bildim long hae graon o long ol stret ples blong faet. Samtaem oli bigwan inaf blong stap olsem wan las ples blong haed blong ol pipol blong wan ful taon sapos oli stap atakem olgeta (luk long Ol Jaj 9:46–52).

Ol taoa long ol plantesen blong grep, garen, o plantesen blong buluk, oli ol smol taoa we oli bildim blong protektem ol krop, mo grup blong animol long ol stilman mo ol nara animol (luk long 2 Kronikel 26:10; Aesea 5:2; 27:3). Plante taem, long andanit long taoa i gat wan rum i stap blong putum ol tul blong wok.

Ol Gadman Antap long Taoa:

Oli stap antap mo lukluk evri ples. Taem God i bin stap singaotem mo givim raet long ol wokman, ol profet oli seperet long wol, oli go kolosap long Hem, mo oli gat raet blong luk ol samting wetem wan lukluk we i stap long heven i kam daon.

Oli luk ol samting we ol narawan oli no save luk. “Be wan sia i save kasem ol samting we oli pas finis, mo tu ol samting we bae i kam, mo tru long ol samting ia bae oli soemaot evri samting, o, long ol narafala toktok, ol sikret samting bae i kamaot mo ol samting we i stap haed bae i soemaot long laet, mo ol samting we oli no save bae oli save tru long ol samting ia, mo tu ol samting bae oli save tru long ol samting ia we oli no save faenemaot tru long wan narafala wei” (Mosaea 8:17).

Oli gat ae i open oltaem. Ol profet oli gat tabu responsabiliti blong wonem yumi long ol denja we oli stap kam, mo bae oli gohed blong mekem olsem nomata wanem pablik, o fasin blong sosaeti i talem.

Oli givim woning blong ol samting taem oli stap longwe yet. “Wan profet i talemaot wanem i sin, mo i talemaot fastaem wanem nao risal blong hem.” Hem i wan man blong prijim stret mo gud fasin. Samtaem, ol profet oli kasem insperesen blong talem fiuja fastaem blong gud blong ol man (Guide to the Scriptures, “Prophet,” lds.org/scriptures/gs).

Oli givim sefti mo proteksen. Taem yumi mekem folem ol woning blong ol profet, yumi save stap sef mo ronwe long ol trabol we i save foldaon long yumi, wanwan o olsem wan grup, sapos yumi no obei.

“Mi mi putum ol wajman oli stap olbaot long bigfala stonwol blong taon ya, mo long dei mo long naet, olgeta oli no mas spel, Hae God i mekem ol promes long yumi finis , mo oltaem, oli mas prea long hem blong hem i stap tingbaot ol promes ya.”

Aesea 62:6.

Tru Samting long Baebol

Long Ol Testeman, samtaem oli komperem Lod long wan sefhaos o strong ples blong haed (luk long Ol Sam 18:2; 61:3; Ol Proveb 18:10; 2 Samuel 22:3), mo samtaem ol profet oli komperem olgeta long ol wajman (luk long Aesea 62:6; Jeremaea 6:17; Esikel 3:17; 33:7; Hosea 9:8; Maeka 7:4).

“Mi mi mekem yu yu kam wan wajman blong lukaot long ol laen blong Isrel. Bambae yu tekem strong tok ya blong mi we mi talem long yu, yu go talem long olgeta blong wonem olgeta”

(Esikel 3:17; luk tu long Esikel 33:1–7).

Wok Ia blong Waj o Lukaot

“Tru long plante handred yia, ol profet oli bin mekem wok ia blong olgeta taem oli givim woning long ol pipol abaot ol denja we oli stap long fored blong olgeta. Ol Aposol blong Lod oli gat stret wok ia blong waj, o lukaot, blong givim woning, mo blong go aot blong helpem olgeta we oli stap lukaotem ansa long ol kwestin blong laef.”

Elda M. Rasel Balad blong Kworom blong Olgeta Twelef Aposol, “O Be Wise,” Liahona, Nov. 2015, 25.