Elda Ronal A. Rasban: Wan Lida we I gat Talen, Wan Gudfala Papa
I Kam long Elda M. Rasel Balad
Blong Kworom blong Olgeta Twelef Aposol
Famli blong Rasban oli glad blong serem ol foto ia; ol narawan i gat nem blong olgeta long hem.
Ron Rasban i neva gat tu tingting se bae hem i go givim seves long wan fultaem misin. Wan kwestin nomo we boe ia blong 19 yia i gat taem hem i openem misin koling blong hem, i weaples bae hem i go long misin long hem.
“Papa blong mi i go long wan misin long Jemani. Bigfala brata blong mi i go long wan misin long Jemani. Fiuja tawi blong mi i bin go long wan misin long Jemani,” hem i tingbaot. “Mi ting se bae, mi tu, bae mi go long Jemani.”
Be Lod i gat sam nara plan. Ron, oli singaotem hem blong go long misin long Is Stet Misin, we hedkwota blong hem i stap long Niu Yok Siti, YSA. Hem i harem nogud nao hem i tekem koling leta blong hem i go long bedrum blong hem, i nildaon long saed blong bed blong hem, i talem wan prea, i openem skripja blong hem, mo i stat blong rid i go olsem:
“Luk, mo luk gud, mi gat plante pipol long ples ia, long ol ples raonabaot; mo wan doa we i wok gud bae i open long ol ples raonabaot long graon ia long Is.
Taswe, mi, Lod, mi bin letem yutufala blong kam long ples ia; from olsem ia nao i bin nid long mi blong mi sevem ol sol” (D&C 100:3–4; oli ademap italik).
Wantaem nomo, Tabu Spirit i konfemem long Ron se koling blong hem i blong go long graon ia long Is, mo hemia i no wan mistek.
Hem i talem: “Mi bin harem nogud long hat mo hemia i aot long hat blong mi taem mi bin gat faswan long ol toktok blong skripja we i talem se ples ia nao Lod i wantem mi blong go long hem.” “Hemia i bin wan bigfala taem we mi bin gat eksperiens long saed blong spirit.”
Misin blong hem long graon long Is i bin faswan long ol plante koling blong Jos we bae i tekem hem long ol ples we hem i neva tingting long olgeta. Mo, wetem wanwan koling—olsem wan ija, wan bisop, wan hae kaonsela, misin presiden, memba blong Olgeta Seventi, Senia Presiden blong Olgeta Seventi, mo Aposol blong Lod Jisas Kraes—Elda Ronald A. Rasban i bin akseptem tingting blong Lod mo i bin gohed blong dipen long Spirit blong Hem taem hem i bin givim seves long ol pikinini blong God.
Hem I Bon long Wan Papa mo Mama we oli gud tumas
Long fas toktok blong hem olsem wan Aposol blong Jisas Kraes, Elda Rasban i bin talem tangkyu blong hat blong hem from laen blong hem. “Mi bon long wan gudfala papa mo mama insaed long gospel,” hem i talem, “mo tufala i bon long ol gudfala papa mo mama blong sikis jeneresen i gobak biaen.”1
Mama blong hem, Verda Anderson Rasban, i wan lida we i gat lav, we i bin fidim yangfala Ron wetem lav long ol skripja. Papa blong hem, Rulon Hwakins Rasban, i wan fetful prishud man we i soem eksampol blong gud fasin ia blong save hadwok.
Hem i bon long 6 Febwari 1951, long Sol Lek Siti, Yuta, YSA; Ronald A. (Andeson) Rasban i wan pikinini ia nomo long mared ia. Tufala, papa mo mama blong hem, tufala i bin mared mo divos, mo Ron i groap wetem tufala bigfala brata mo wan bigfala sista.
“Fasin blong hem i tekem tugeta saed blong papa mo mama, mekem se mifala i lavem hem,” sista blong hem, Nansi Sindla i talem. “Ron i neva letem Papa mo Mama, tufala i sidaon saedsaed, o stanap saedsaed; oltaem hem i stap long medel blong tufala.”
Ron i wan gudfala boe, be, yes, hem i talem se i tru se samtaem, hem i strong hed smol.
“Plante taem tumas ol tija blong Praemeri oli go luk mama blong mi we i Stek Praemeri presiden mo talem: “Roni Rasban ia i wan smol pikinini we i strong.” “Be oli neva givap long mi. Oli bin soem bigfala lav long mi mo oltaem, oli stap invaetem mi blong gobak long klas.”2
Taem Ron i pikinini, hem i stap long Jos—go long miting blong wod, pati blong wod, dina blong wod mo spendem taem blong mekem spot wetem wod. Taem hem i no bisi long Kotenwud Fas Wod mitinghaos, bae hem i go mekem ol smol wok olbaot, mekem aktiviti blong Skaot, mo spendem taem wetem ol fren. Long hom, famli i lukluk fula long ol skripja, ol gem mo ol wok blong haos.
“Papa blong mi i tijim mi blong save wok taem hem i soem eksampol blong hem long mi,” hem i talem. “Papa blong mi i tijim mi long saed blong wok taem hem i stap mekem mi mi wok.”
Papa blong Ron i draevem wan trak, i girap long eli moning long 4 klok, mo i gobak hom let evri naet. Mama blong hem i stap long haos blong lukaot long ol pikinini, mo i helpem mane blong famli taem hem i somap ol les klos blong ol smol doli.
Talen blong Ron blong save lidim man, givimaot wok mo mekem samting i hapen—we bae i givhan long hem plante long responsabiliti blong hem long wok mo long Jos—i bin helpem hem fulap.
Sista blong hem i tingbaot: “Ron i bin kasem wok blong katem gras.” Be Ron, semmak olsem Tom Soya blong Mak Twein, i gat wan fasin blong hem blong winim tingting blong ol fren blong hem oli kam help
Nansi i talem: “Bae mi luk aotsaed, mo hemi bes fren blong hem we i stap katem gras. Long wik afta, wan nara fren blong hem i stap katem gras. Hem i jes sidaon long fored blong haos, i laf mo i stap mekem fani taem olgeta oli stap wok.”
Papa mo mama blong Ron oli bin stap long hadtaem blong mane, be famli i gat gospel. “Mifala i neva gat plante mane,” Ron i talem, “be hemia i neva mekem mi mi no hapi.”
Ol Fren mo Lida we Hem I Trastem
Taem hem i stap groap, Ron i gat blesing blong gat ol gud fren mo ol prishud lida we hem i save trastem, mo wan long olgeta i stek presiden blong hem we i stap 14 yia—Jemes E. Faost (1920–2007), we afta i bin stap insaed long Kworom blong Olgeta Twelef Aposol mo long Fas Presidensi. Famli blong Ron i bin kolosap long Presiden Faost mo famli blong hem. Hem i talem: “Oltaem hem i talem se mi mi wan Kotenwud boe from hem i bin help blong lukaotem mi.”
Ron i no gat taem blong spendem long spot blong skul taem hem i kasem hae skul; hemia from oltaem hem i stap wok blong winim mane. Be hem i bin mekem sam gudfala tru fren we oli bin fren blong ful laef.
Fren blong hem, Kreg MaKliri, we i wan fren blong hem taem i yangfala i talem: “Mi laekem Ron from huia hem, be hem i no stret evriwan.” Wetem wan smael hem i ademap: “Mi bin talem long hem se sapos hem i go long heven, bae mi tu mi go from mitufala i bin mekem sem samting taem mitufala i gro i kam antap.”
Ron i go long misin blong hem long stat blong yia 1970, be Kreg i stap tingting blong pusumbak misinari seves blong hem kasem en blong yia. Long tetaem ia nao Ron i stap long misin, nao i ringim fren blong hem.
Brata MaKliri i talem: “Mi no save olsem wanem nao hem i kasem raet blong ring, be hem i tok strong long mi from mi no gat strong tingting blong go kwik long misin. “Yes, mi no wet longtaem moa.”
Ron i talem se misin blong hem i wan “taf” eksperiens. “Lod i blesem mi wetem plante eksperiens we i gat merikel, mo i leftemap fet blong mi,” hem i talem. “Misin blong mi i gat big pat long laef blong mi long saed blong spirit.”
Ron i spendem pat blong misin blong hem long Bermuda Aelan. Misin presiden blong hem, Harol Nifae Wilkinson, i stap sendem nomo ol “strong stret misinari” longwe from hem i save visitim olgeta wanwan taem nomo.
Ron i tingbaot: “Mifala i stap mifalawan nomo, be presiden i no nid blong wari long mifala. Mifala i stap mekem wok i hapen.”
“Drim Gel” blong Delta Fi
Afta we hem i finisim misin blong hem long 1972, Ron i faenem wan wok, i rejista long Yunivesiti blong Yuta long manis Ogis olsem, mo i joenem Delt Fi Kapa, wan grup blong ol riten misinari. Long sosol aktiviti blong grup ia, hem i luk wan naes yang woman we nem blong hem i Melani Twitsel. Melanie i wan long “drim gel” blong Delta Fi, we i bin stap help wetem ol aktiviti blong grup ia.
Olsem Ron, Melani i kamaot long wan aktiv Lata-dei Sent famli. Papa blong hem, wan ami ofisa, mo mama blong hem, tufala i neva letem fasin blong jenisim ples mo haos i wan eskius blong no go long Jos.
Melanie i glad tumas long fasin blong Ron we i kaen, i gat gud fasin, mo i save long gospel. “Mi talem long miwan: ‘Hem i wan gudfala man tumas mo i no mata sapos mi neva gat janis blong deit wetem hem. Mi wantem stap gudfala fren blong hem nomo.’”
Taem rilesensip blong tufala i stap gro, Spirit i konfemem filing blong hem long Ron mo komitmen blong hem long Lod. I no longtaem afta, frensip blong hem i gro i kam wanem we Melanie i singaotem wan “storibuk, feri lav stori.”
Elda Rasban i talem se Melanie i go stret nomo wetem hem. “Melanie i stret ikwel blong mi long evri pat blong gospel laef blong mi. Mitufala i kam ol bes fren, mo long tetaem ia nao mi askem hem blong maredem mi.”
Tufala i mared long 4 Septemba 1973 long Sol Lek Tempol. Hem i talem se stat long tetaem ia, “kompanion blong mi we i no save finis we i no selfis, i bin sepem mi olsem man blong mekem graon pot, i kam wan smut disaepol blong Jisas Kraes . Lav mo sapot blong hem, mo hemia blong ol 5 pikinini blong mitufala, ol hasban mo waef blong olgeta, mo ol 24 apupikinini blong mitufala, oli sapotem mi.”3
“Yumi Go”
Taem hem i stap olsem presiden blong kworom blong ol elda blong studen wod blong hem, Ron i kam blong save Jon Hantsman Senia, we i wod hae kaonsel advaesa. Jon i sapraes bigwan long wei we Ron i stap lidim kworom.
Elda Hantsman i tingbaot: “Hem i gat bigfala lidasip skil mo i save oganaesem gud hem.” Elda Hantsman i bin stap olsem wan Eria Seventi stat long 1996 kasem 2011. “Mi tingting se i no oltaem we wan yang man we i stap yet long yunivesiti i save lidim wan kworom long wei olsem.”
Blong plante manis, Jon i lukluk Ron i tanem ol tingting i go long aksen taem hem i stap mekem ol prishud diuti blong hem. Taem posisen blong Senia Maketing ofisa i open long kampani blong Jon—we afta i tekem nem blong Hantsman Kemikel Koporesen—hem i talem se Ron nao i gat skil ia mo i givim wok ia long hem. Wok ia i stat long wik afta long Ohaeo, YSA.
Ron i tingbaot: “Mi talem long Melanie se bae mi no stop long skul mo muv i go nara ples. Mi wok ful laef blong mi blong mi graduet long skul, mo mi kolosap long gol blong mi nao.”
Melani i talem long Ron se blong faenem wan gudfala wok i risen ia nao from wanem hem i stap long skul.
Melanie i askem: “?Yu wari long wanem? Mi save olsem wanem blong pakemap ol ting mo muv i go. Mi mekem hemia ful laef blong mi. Bae mi letem yu ringim mama blong yu evri naet. Yumi go.”
Tras we Jon i gat long Ron i karem frut blong hem. Andanit long tijing blong Jon, Ron i muv hariap insaed long kampani ia we i stap gro, mo i kam presiden blong kampani mo jif opereting ofisa long 1986. Hem i travel fulap from kampani ia—insaed long kantri nomo, mo ovasi tu. Nomata bisi taem tebol blong hem, Ron i traem blong kam hom evri wiken. Mo taem hem i travel, wanwan taem bae i tekem wan memba blong famli wetem hem.
Melanie i talem: “Taem hem i stap long hom, hem i mekem ol pikinini oli filim se oli spesel mo hem i lavem olgeta.” Hem i stap go long ol aktiviti blong olgeta mo ol spot taem, taem we i posibol. Jenesa MakFison, wan long ol fo gel blong kapol ia i talem se ol wok blong papa blong hem long Sandei, i mekem se bae papa blong olgeta i no sidaon wetem olgeta long ol miting blong Jos.
“Bae mifala i faet se hu bae i sidaon long saed blong hem long jos from se i wan bigfala samting tumas blong gat hem i sidaon wetem mifala.” hem i talem “Mi tingbaot se mi holem han blong hem mo tingting long miwan: ‘Sapos mi save lanem blong stap olsem hem nomo, bae mi stap long stret rod oltaem, mo bae mi kam moa olsem Sevya.’ Oltaem hem i hiro blong mi.”
Boe blong kapol ia, Kristian, i tingbaot ol gud memori blong “papa-boe taem.” Ol fren oli kam mo go from famli i stap muv oltaem, be papa blong mi i bes fren blong mi oltaem—mo mifala i stap kompit from hem.
Nomata hem i plei basketbol wetem Kristian, o plei wan bod gem wetem ol gel blong hem, o go huk wetem ol famli mo fren, Ron i laekem tumas blong win.
Kristian i talem: “Taem mifala i stap groap, bae hem i neva letem eniwan i win. Mifala i mas wok strong blong win, be i mekem mifala i kam gud moa. Mo praktis ia i gohed wetem ol apupikinini blong hem we hem i lavem.”
Ova long ol yia, famli blong Ron i luk olsem wanem blong wok insaed long Jos lidasip i mekem se hem i gat moa paoa blong soem lav mo sore, blong hem mi talem ol filing blong Spirit, mo blong givim insperesen long ol narawan blong oli mekem bes blong olgeta. Afta we apu boe blong Ron mo Melani, Pakston, i bon, famli i bin dipen bigwan long paoa mo sapot long saed blong spirit blong Ron.
Pakston i bon wetem wan sik we i no hapen oltaem, mekem se hem i gat fulap problem long helt we i testem famli long saed blong bodi, filing mo spirit. Elda Rasban i singaot rod ia we i kam afta we Pakston i bon, “wan mas blong lanem ol spesel lesen we i go wetem ol taem we oli no save finis.”4
Long taem blong sotfala 3 yia we Pakston i bin laef—taem kwestin i bin fulap mo ansa i smol nomo—Elda Rasban i stanap olsem wan pos blong spirit, i lidim famli blong hem blong karem moa paoa aot long paoa blong Atonmen blong Jisas Kraes.
Wetem anaonsmen blong niufala koling blong hem, plante memba blong famli mo fren blong hem oli no bin sapraes. Kristian i talem: “Olgeta long mifala we i save gud hem, mifala i bin leftemap han blong mifala hae antap taem oli sastenem hem olsem wan Aposol.”
“Bae Mi Go Givim Seves”
Long 1996, taem hem i gat 45 yia, Ron i bin stap long medel blong wan gud wok we i gat sakses taem koling i kam blong go givim seves olsem misin presiden blong Niu Yok, Niu Yok Not Misin. Semmak olsem we ol Aposol blong bifo oli talem, wantaem nomo hem i lego net blong hem i stap. (Matiu 4:20).
Elda Rasban i talem: “Blong akseptem koling ia i tekem haf blong haf blong wan seken.” Hem i talem long Lod: “Yu wantem mi blong go givim seves, bae mi go givim seves.”
Ron i tekem wan bigfala lesen we hem i bin lanem long wok blong hem: “Ol pipol oli moa impoten bitim eni nara samting moa.”5 Wetem save ia mo lidasip skil blong hem, hem i rere blong statem fultaem seves blong hem insaed long kingdom blong Lod.
Ron mo Melani, tufala i bin faenem se misinari wok long Niu Yok Siti i tugeta wan jalenj mo i givim paoa. Ron i kwik blong givim responsabiliti long ol misinari—i givim insperesen long olgeta blong oli stap tru, mo i stap tijim, bildimap, mo leftemap olgeta long semtaem.
Long yia 2000, eit manis afta we Ron mo Melanie i finisim misin blong tufala, oli singaotem Ron long Olgeta Seventi, long ples we fasin blong hem blong rere, eksperiens mo plante talen blong hem i bin blesem Jos. Olsem wan memba blong Olgeta Seventi, hem i stap olsem wan kaonsela long Yurop Sentrol Eria Presidensi, i help blong lukaotem wok blong 39 kantri. Nomata we hem i aot ong yunivesiti moa long 40 yia finis, hem i bin gohed blong stap olsem wan series studen, we i welkamem ol tijing we oli kam long ol senia Brata blong hem taem hem i stap lukaotem Not Amerika Wes, Notwes, mo ol trifala eria long Yuta; i bin wok olsem Eksekutiv Daerekta blong Tempol Dipatmen; mo i givim seves long Presidensi blong Olgeta Seventi, we i wok kolosap wetem Olgeta Twelef.
I no longtaem i pas, Elda Rasban i talem: “I wan bigfala ona mo spesel janis blong mi, blong mi laswan long medel blong Olgeta Twelef mo lanem samting aot long olgeta long evri wei mo long evri taem.”6
“Wanem we Oli Save, Mi Tu, Mi Save”
Top lefsaed: foto i kam long Wendi Kila; raet: Momon Prija, Fas Misinari long Denmak i kam long Arnol Fribeg (folem wan peinting blong Kristen Dalsgrad, 1856); Dan Jon i wekap long Wels i kam long Klak Keli Praes
I gat tufala peinting we i flasem ol wol blong ofis blong Elda Rasban. Wan i blong ol Momon misinari we oli stap tijim wan famli long Denmak long ol yia 1850. Sekenwan, i wan blong ol fas misinari, Dan Jons, we i stap antap long wan wel mo i stap prij long ol Britis Aelan. Ol peinting, (antap long raet) i mekem Elda Rasban i tingbaot ol bubu blong hem.
Hem i testifae ia: “Ol fas paeonia ia oli givim evri samting we oli bin gat from gospel blong Jisas Kraes mo oli livim wan histri long laen blong olgeta oli folem.”7 Wanem i pusum ol bubu blong Elda Rasban blong gotru fasin blong agens mo hadtaem i wanem i mekem hem i kwalifae from niufala koling blong hem: wan save mo strong witnes abaot Lod mo wok blong Hem.
“Mi gat plante samting blong lanem long niufala kolin blong mi,” hem i talem. “Mi filim se tingting blong mi i stap daon long saed blong samting ia. Be i gat wan saed blong koling blong mi we mi save mekem. Mi save serem testemoni blong mi abaot nem blong Kraes i go long ful wol (luk long D&C 107:23). !Hem i stap laef!8
Olsem wan smolsmol apu pikinini blong ol paeonia, hem i ademap: “Wanem oli bin filim, mi stap filim. Wanem we Oli Save, Mi Tu, Mi Save.”9
Mo wanem we oli bin hop from, from laen blong olgeta, i stap insaed long laef, ol tijing mo seves blong Elda Ronal A. Rasban, we i stap folem eksampol blong olgeta mo stap givim ona long histri blong olgeta taem hem i stap go fored olsem wan long ol spesel witnes blong Lod.