Tijim Olgeta blong Ridim Buk Blong Momom

Emilien Riu, Kebek, Kanada

Long taem blong seves blong mifala long Jeniva Switselan Misin, oli bin singaotem mi mo setem mi apat olsem branj presiden, mo waef blong mi, oli singaotem hem olsem Rilif Sosaeti presiden. Tugeta, mitufala i wokhad wetem evri paoa blong mitufala blong mekem branj ia we i traehad i kambak strong. Nomata we hem i bin oganaes long 1960, branj ia i no gat tumas baptaes blong plante yia mo i no bin sendem eni misinari i go long misin blong 15 yia.

Hem i klia se yumi nidim help blong Lod blong save faenem ol ansa long ol plante hadtaem we branj i stap fesem. Afta we mi bin prea abaot ol jalenj blong branj, Spirit blong Lod i talem long mi: “Tijim ol memba blong ridim Buk blong Momon, mo bae yu gat sakses.”

Wantaem nomo, mifala i mekem ol plan blong komitim evriwan long ol memba blong oli stat ridim Buk blong Mormon.

Ol bigfala risal oli kam afta. Pis mo Spirit i kambak long branj. Ol niu famli oli joenem Jos. Wan yang man, we tingting blong hat blong hem blong givim seves i mekem se hem i aot i go long wan misin. Ol mared famli we oli gat trabol, oli kam strong moa, mo ol famli oli kam kolosap moa. Branj ia i gohed blong progres tedei.

Mifala mo ol memba blong branj i witnesem merikel paoa blong Buk blong Momon. Hem i ki ston blong relijin blong yumi mo testemoni blong yumi long saed blong gospel mo long saed blong Jisas Kraes. Mifala i lavem gospel ia wetem ful hat blong mifala. Hem i wan spring blong save we i no gat en mo i no save jenis.

Eksperiens ia i tijim mifala se Buk blong Momon, i tru, i wei blong helpem ol brata mo sista blong yumi blong muvaot long ol sado blong tudak long saed blong spirit we i stap kavremap wol ia. Buk ia i tekem pis, hapines, mo wan strong filing blong wantem folem Sevya Jisas Kraes.