Ol Voes blong Ol Lata-dei Sent
Wan Seken Janis
Kaeli Boldwin, Arisona, YSA
Fas taem we mi mitim hem, mi bin stap holem wan vaeolin.
Hem i pulum leg blong hem i wokbaot i kam kolosap long mi taem mi stap wokbaot i go long rum blong kakae, mo vaeolin bokis blong mi i stap fas long leg blong mi.
“Vaeolin” Hem i talem taem hem i stap kam kolosap.
“Yes,” mi talem.
Mi neva rili toktok wetem wan we i handikap mo mi no save stret wanem bakegen blong talem. Hem i folem mi long tebol blong mi mo i sidaon long saed blong mi, i poenem bokis blong mi.
“Vaeolin” Hem i talem bakegen.
Mi openem bokis blong mi mo ae blong hem i open bigwan. I muv raf nao i tajtajem ol string blong vaeolin. Hat blong mi i pam smol taem mi tingting se nogud wan string blong vaeolin i brok, mo sloslo mi sarem bokis blong mi. Hem i hagem mi bifo hem i go.
Afta long hemia, mi bin luk hem plante taem.
Taem hem i luk mi, bae hem i putum han blong hem raon long solda blong mi, mo i kisim fored blong hed blong mi.
Long haf blong hae skul, oltaem mi traem blong stap longwe long hem taem mi luk hem i stap kam. Taem bae hem i faenem mi, mo kavremap mi wetem hag mo kis blong hem, bae mi akseptem blong smol taem wetem wan smael we mi foesem mi long hem, mo afta, wokbaot i go kwik mo no talem wan toktok.
“O no,” hemia wanem mi talem taem mi luk hem long las okestra konset blong hae skul. Afta long konset, hem i wokbaot sloslo i kam long ples we mi stanap long hem wetem ol fren blong mi aotsaed long ples blong plei.
Ol fren blong mi oli arier taem hem i kam long mi wetem smael mo i openem han blong hem blong givim wan hag.
“!Wiliam!”
Mi tanemraon mo luk wan woman i wokbaot hariap i kam long mitufala.
“Sori,” hem i talem, mo putum han blong hem i holem han blong Wiliam. “Wiliam i laekem vaeolin. Hem i plis long mi blong mi tekem hem i kam long konset tedei long naet. Ale boe, yumitu go.”
Kasem taem ia, mi no bin luksave se mi neva save nem blong hem. Mi bin mitim Wiliam blong tu yia, be mi spendem fulap taem blong stap longwe long hem nao mi neva traehad blong kam blong save gud hem. Taem mi stap luk Wiliam mo mama blong hem i go, bigfala sem i kam long mi.
Sam yia afta, afta we mi mared, mi bonem wan naes smol boe wetem Daon Sindrom, wan sik we i mekem hem i handikap; nem blong hem Spensa. Plante taem, tingting blong mi i stap long Wiliam taem mi stap lukluk boe blong mi, mo mi stap askem miwan sapos Spensa bae i gat ol semmak eksperiens. ?Bae ol pipol oli stap longwe long hem from se hem i laekem blong givim kis long man o givim hag long man? ?Bae ol fren blong hem bae oli no laekem blong stap wetem hem from handikap blong hem?
Taem Spensa i gat fo manis, mi tekem hem i go long lokol hospital blong go long wan apoenmen. Taem mi stap tekemaot hem long trak, mi luk tu pipol i stap aot long hospital. Mi no bilif nating, be mi luksave se hem i Wiliam mo mama blong hem.
“!William!” Mi singaot taem mitufala i kam kolosap moa, hat blong mi i pam.
“!Halo! Hem i wokbaot sloslo i krosem paking, wan bigfala smael long fes blong hem. Hem i sakem han blong hem mo i holem han blong mi mo givim wan bigfala sekhan.
?So, yu olsem wanem? Mi askem hem.
“Vaeolin,” hem i talem, mo yu luk long ae blong hem se hem i glad tumas.
Vaeolin Hem tu i tingbaot. Mi jok long wan laef wetem krae mo talem: “Yes, mi plei vaeolin.”
Taem mitufala i stap storian, hat blong mi i mekem wan prea from ol kaen sore blong wan Papa we i stap long Heven we i bin save hamas mi wantem mitim Wiliam bakegen. Mi talem tangkyu se God i luk mi—wan yang mama we mi traehad, we i fulap wetem ol helt problem blong boe mo mi wari long fiuja blong hem—mo givim mi wan eksperiens we i mekem mi mi tingbaot se Hem i save gud yumi.