Seksek, Harem Nogud mo Plan blong God
Woman ia we i raet i stap long Albania.
Taem mi lukluk tru long eksperiens blong laef blong mi we i moa nogud mi bin filim se Papa long Heven i bin stap wetem mi long ful wokbaot blong mi.
Foto pikja i kam long Deved Ketis
Hem i long wan moning, long yia 2008, taem mama blong mi i wekemap mi blong go long skul. Mi bin rili hapi long moning ia, be mi no bin save se bae i kam dei we i moa nogud long laef blong mi, o bae i las taem ia nao we bae mi stap wetem hem. Mi no bin finisim ol klas blong mi long dei ia from wan fren blong famli blong mifala i kam pikimap mi, mo talem long mi se mama blong mi i bin kilimded hemwan. Mi bin gat 12 yia nomo.
Mi bin tingting se: “?Olsem wanem nao bae mi laef we i no gat mama blong mi?” Hem i bes fren blong mi.
Mi bin krae blong plante manis. Mi no laekem blong go long skul from se ol nara pikinini oli mekem mi mi defren, mo oli filim sori long mi. Mi no save nating wanem mi mas mekem; mi save nomo se mi mas stap strong blong helpem evri narawan.
Wan dei, faef o sikis manis afta we mama blong mi i ded, mi bin stap miwan long rum blong mi, long windo, mi stap krae, mi traem blong andastanem se mi stap ia from wanem. Wantaem mi harem wan voes long hed blong mi: “Yu gel blong mi; bae mi no letem yu yu safa.” Mi bin save hem i God. Be mi bin sapraes from se mi nomo biliv long Hem finis, speseli stat long taem ia we God nao i bin tekemaot mama blong mi long mi. Nomata se mi no save wanem nao Hem i minim long taem ia, mi bin filim se mi sef i stap.
Tri yia afta, mi bin go long Rom, Itali, blong visitim anggel blong mi. Hem i stap wokem tokbaot long mi jos ia we hem i stap go long hem. Wan Sandei, hem i tekem mi i go wetem hem. Oltaem mi stap tingbaot we mi wokbaot i go from ol doa blong Jos blong fas taem mo filim lav blong Papa long Heven taem mi go insaed. Mi filim olsem mi stap long hom.
Mi stat blong go long jos evri Sandei, mo stap go long evri aktiviti long wik. Mi lavem blong stap wetem ol yut blong Jos. Oli mekem mi mi hapi moa. Oli bin tingting mo bilivim ol semfala samting we mi bin biliv long olgeta. Afta, afta long tri manis, holidei blong mi i finis mo mi mas gobak long Albania.
Taem mi gobak hom, mi talem long papa blong mi ol filing we mi bin gat mo olsem wanem mi bin filim hapi long ful taem ia. Hem i no laekem samting ia nating. Hem i talem long mi se bae hem i no letem mi blong go long jos mo lanem moa abaot jos ia. Mekem se mi mas wet blong ol nekis tri yia kasem taem we bae mi kasem 18 yia. Afta long hemia, bae mi save disaed miwan mo kasem baptaes.
Long taem ia, mi bin gat blesing wetem plante pipol we bae oli kam talemaot wanem oli bin lanem long evri Sandei long Jos. Wan long olgeta ia, hem i Stefani. Hem i bin stap long Itali taem anggel blong mi i joenem Jos, be hem i mas gobak long hom blong hem long Yunaeted Stet. Anggel blong mi i ting se bae i gud blong mifala i stap raetraet long mifala, mekem se mi ademap hem olsem wan fren long Fesbuk.
Nomata mitufala i neva mit olsem we mitufala i fesem mitufala, oltaem bae mi talem tangkyu long hem blong bildimap fet blong mi mo lanem moa abaot gospel blong Jisas Kraes. Hem i raet i stap kam long mi evri Sandei, mo talem evri samting we hem i bin lanem long Jos, mo afta, bae hem i ansarem ol kwestin blong mi. Hem i wan gudfala fren blong mi.
Nao, afta plante yia blong save wet longtaem, mi bin kasem baptaes tu dei nomo afta long namba 18 betdei blong mi. Mo i no longtaem bae mi serem wetem mama blong mi, hapines we mi bin filim long dei ia, from se bae mi mekem baptaes blong hem. Mi save se bae hem i praod long laef we mi bin jusum.
Mi bin filim se Papa long Heven i blesem mi from se Hem i bin stap wetem mi long ful wokbaot blong mi long plante wei. Mi jes nidim nomo blong wet, mo save wet longtaem from se Hem i bin gat wan plan blong mi. Hem nao i bin givim mi paoa blong go tru long evri jalenj we mi bin fesem. Hem i bin stap oltaem, we i bin stap helpem mi blong stap hapi moa.