!Lan blong Plei Wan Hym long 10 Minit!
Sapos yu neva bin plei piano bifo be yu wantem blong lanem, hemia nao janis blong yu. Wanem yu nidim, i wan miusik kibod. Nomata se yu no gat wan long hom, yu save tekem atikol ia wetem yu long wan ples we i gat wan piano, o wan kibod blong yu stat blong lan.
Lesen ia i simpol tumas mo i isi, mekem se bae yu save plei wan hym taem yu finisim lesen ia. Yes, i posibol blong yu save plei miusik blong hym long lesen ia long 10 minit nomo.
?Yu Rere? !Go!
Stap Rere blong Plei long Piano
-
Taem yu sidaon long piano, mo putum fingga blong yu antap long kibod, muvum jea i gobak biaen inaf blong elbo blong yu i ben smol nomo.
-
Sidaon long medel blong stul o jea, stret long fored blong medel blong kibod.
-
Sidaon kolosap long fored blong stul wetem bak blong yu i stret mo hevi blong bodi blong yu i go fored.
-
Putum leg blong yu i flat gud long floa.
-
Sidaon gud mo holemtaet wan gudfala wei blong sidaon.
-
Meksua se i gat wan gudfala laet blong yu luk miusik mo kibod.
-
Stanap. Slakem tufala han blong yu long saed blong bodi blong yu, mo mekem oli rilaks. Yu luk se oli ben smol, olsem we oli holem wan balong. Taem yu sidaon bakegen, putum ol fingga blong yu antap long kibod, mo livim i ben smol semmak olsem we i bin stap taem yu bin stanap.
-
Putum ol han blong yu antap long kibod, mo letem ol fingga blong yu oli tajem, kolosap long medel blong bigfala ples ia we i gat ol waet ki, mo putum antap long ol waet ki. Holem flat ples blong han blong yu antap long kibod, be yu no mekem i slip antap long ol ki o long wud andanit long ol ki.
-
Kilim ki wetem flat ples andanit long fingga blong yu. Mekem ol fingga blong yu oli ben, stat long stat blong fingga. Taem yu kilim ki, holem ol joen blong fingga oli ben i stap.
Plei wetem Ol Fingga Namba
Blong helpem yu putum stret fingga long wanwan ki, oli givim wan namba long ol fingga olsem oli soem long ples ia. Ol fingga namba, oli raetem long saed blong ol not long pej.
Putum han blong yu antap long grup blong ol faef ki, mo putum wanwan fingga antap long wan ki. Praktisim ol fingga namba taem yu plei ol ki wetem stret fingga olsem we oli soem. Ol not wetem stik i go antap, oli blong raet han. Ol not wetem stik i kam daon, oli blong lef han.
Plei long “I Gat Wan Hil I Stap Longwe”
Putum han blong yu antap long kibod olsem we oli soem daon ia.
Yusum ol grup blong tu o tri blak ki blong helpem yu faenem stret posisen.
Plei long hym ia, folem ol fingga namba olsem we oli soem. Ol not wetem stik i go antap, oli blong raet han, mo ol not wetem stik i kam daon, oli blong lef han. Praktisim hym ia kasem taem yu harem se i stret. Yusum ol prinsipol blong gud teknik blong fingga we oli listim daon long ol naen poen jeklis.
Nao, oli soem yu olsem wanem blong plei long piano mo yu bin lanem wan simpol miusik blong hym. Blong plei ol nara hym, yu nid blong lanem samfala besik prinsipol abaot bit blong miusik, longfala blong bit, mo ol not.
Hemia bes pat: lesen we yu jes lanem i fas lesen insaed long Jos Kibod Kos, we i stap long sikis lanwis, mo i stap long Jos distribusen senta.1 Instraksen plan we i stap insaed i isi blong folem blong yu lanem yuwan o blong yu lanem long grup. Maet yu save mekem ful famli i kam blong lanem piano tugeta olsem wan famli haos naet aktiviti. Kos ia, oli save finisim nomo long sikis wik.
Plante stadi oli soem se ol praevet lesen oli helpem ol studen blong lukluk gud long wan samting, blong oli wok gud long skul, mo blong oli save olsem wanem blong tingting.2
Taem yumi lanem ol skil blong miusik, yumi developem ol talen we Lod i bin givim long yumi, kam antap long save, mo lanem plante defren wei we yumi save yusum save mo talen blong bildimap kingdom blong Hem.