Go Helpem Hem

Tomas Robins, Kalifonia, YSA

Mi stanap long laen long wan fiul stesen. Long fored blong mi, i gat wan mama wetem tu smol pikinini; hem i askem fiul blong 300 vatu mo tu vanila aeskrim.

Taem mi luk i go, mi luk se oli no gat fulap mane. Ol pikinini oli draeleg, mo tufala i werem ol brokbrok klos.

Mi harem se woman ia i putum fulap fulap koen long kaonta blong pem bil blong hem.

Afta we mi pem fiul blong mi, mi wokbaot i go mo lukluk long trak blong mama ia. Hem i wan olfala stael trak we i no ron tumas.

Mi filim sore long mama ia wetem tufala pikinini blong hem, be mi statem trak blong mi mo gohed long dei blong mi.

I no wan minit we mi aot mi stap ron long bigfala rod, nao wan voes i kam long mi: “Go helpem hem.” Toktok blong Spirit ia i kam tu taem.

Mi seksekem hed blong mi, mo ting se ating hem i go finis. ?Mo bae wanem nao mi talem long hem?

Voes i kam klia nambatri taem: “!Go helpem hem!”

Mi tanem i gobak i go long stesen, mo traem faenemaot se bae mi talem wanem sapos hem i stap yet.

Taem mi kasem stesen, mi luk se ol doa blong trak blong hem oli open. Hem i sidaon long ples blong draeva, mo tufala smol pikinini blong hem oli stap kakae aeskrim long jea biaen.

Mi mekem wan smol prea, mi askem Papa long Heven wanem nao bae mi talem. Semfala voes i kam long mi: “Talem nem blong yu mo askem sapos hem i nidim help.” Mi go kolosap long trak blong hem mo talem nem blong mi. Mi serem wetem hem se mi filim blong askem sapos hem i nidim help.

Hem i stat blong krae mo talem: “Mi jes finis blong prea long Jisas, mo askem Hem blong sendem wan man blong kam helpem mi.”

Papa long Heven i bin ansa long prea blong mi. Mi pem blong oli fulumap tank blong trak blong hem, mo givim telefon namba blong wan long kworom blong ol elda blong mifala we i stap lukaotem man blong wok. Mi no save wanem i hapen long yang mama ia afta, be mi talem tangkyu se mi bin folem toktok ia blong go helpem hem.