Givim Seves Insaed long Jos
Tangkyu long Seves blong Yu
Yu wan stret eksampol blong ol woman ia, we, stat long taem blong Nauvu, oli bin givim seves long wanwan long olgeta tru long visiting tijing wetem lav mo insperesen.
Mi no save nem blong yu, o yu gat hamas yia, o eni samting moa abaot yu. Wanem we mi save i we yu yu visitiing tija blong Joan, mo mi laekem tumas seves we yu givim wetem ful tingting blong yu; mi laekem hemia wetem ful hat blong mi.
Mi save se blong stap visitim wan lesaktiv sista olsem Joan (nem i jenis), we i aeneli blong mi, i no isi, speseli from fasin blong hem i no naes tumas. Mi ting se bae hem i no wantem yu go luk hem. Be Joan i talem long mi se yu bin wan tru fren long hem, mo yu stap stop blong luk se hem i oraet mo stap akseptem hem olsem we hem i stap.
Long ol 19 yia we Joan i maredem boe blong mi, hemia i fas taem we hem i tokbaot wan visiting tija. I no longtaem i pas, hem i stap talem long mi se yu stap pas long hem oltaem, mo yu gat tingting mo gat kaen fasin long hem. Hem i talem se yu bin helpem hem plante taem, taem we hem i bin sik mo yu bin glad blong tekem apugel blong mi i go long Yang Woman.
Long ol las 10 yia, hem, boe blong mi, mo famli blong olgeta, oli stap longlongwe long mifala. Mi bin prea se bae sam narafala pipol bae oli lavem mo kea long olgeta semmak olsem mi mekem long olgeta, mo mi bin plis wetem krae long Papa long Heven, se bae ol nara pipol bae oli go long olgeta semmak olsem we sapos mi stap slip kolosap long olgeta. Long wanem we Joan i stap talem, yu nao yu ansa blong ol prea blong mi.
Iven sapos Joan mo boe blong mi oli no obei long Toktok blong Waes, mo tufala i no stap go long Jos, tufala i ol gudfala pipol mo tufala i lavem ol pikinini blong tufala. Long wan wei, smok blong sigaret blong Joan i no blokem ae blong yu. Yu no jajem hem from se hem i no stap kam long Jos. Yu go mo kam blong save hem, mo lanem se hem i wan mama we i gat lav, we i wantem gel blong hem blong kam long Jos, mo kasem wan testemoni. Mo taem Joan i go long hospital, yu bin karem kaekae i go be yu no askem yuwan se hem i sik ia from rong blong hem nomo o wanem.
Mi talem tangkyu tumas se yu yu wan eksampol long apugel blong mi. Hem i save lukluk long yu olsem wan we i kea long evriwan mo i go aot, folem rod blong hem, blong soem lav mo kea. Hem i bin talem long mi wan dei se, sapos yu no gat wan trak, bae yu wokbaot i bitim 1 kilometa i go kasem haos blong hem wetem ol smol pikinini blong yu blong karem kuki i kam.
Yu bin talem long hem: “Mi stap tingting nomo long yu mo mama blong yu, mo mi wantem blong mekem wan naes samting long yu—olsem nomo.”
Mi wantem tumas blong talemaot long yu hamas mi laekem strong tingting blong yu long koling blong yu olsem wan visiting tija. Yu wan stret eksampol blong ol woman ia, we, stat long taem blong Nauvu, oli bin givim seves long wanwan long olgeta tru long visiting tijing wetem lav mo insperesen. Yu bin soemaot seves mo lav ia tru long wei ia we yu bin visitim, wetem filing, lesaktiv aeneli blong mi.
Tangkyu.