Taem Ponografi I Kasem Hom—Ol Waef mo Ol Hasban, Tugeta I Nidim blong Kam Oraet Bakegen
Mi luk stret long ae blong mi paoa blong Sevya we i save hilim ol waef, mo tu, ol hasban taem we ol hasban oli gat hadtaem wetem ponografi.
Ol Model nao oli stanap long ol foto ia.
Long ol fas sikis manis blong mi olsem wan bisop, mi gat samfala kapol long wod blong mi we oli kam luk mi, wetem ful tras, blong talem long mi se hasban i stap traehad wetem ponografi. Long sam kes, waef i sapraes bigwan from hem i sek we hem i jes lanem bigfala nogud sikret ia; ol narawan oli kam blong save plante manis o yia i pas.
Mi filim lav mo sore long wanwan long ol kapol ia, mo mi bin filim paoa blong Sevya we i pemaot olgeta taem mi bin toktok oltaem mo wetem hevi tingting wetem wanwan long ol brata ia blong helpem olgeta blong “sakemaot ol jen … we i save fasem [olgeta]strong” (2 Nifae 9:45).
Maet bigfala taem we Spirit i bin kapsaed i bin kam taem mi bin mit wetem ol waef. Mi bin faenem se, nomata we samfala soa ia oli open i stap yet, mo samfala soa oli stap kam gud yet afta plante yia, evriwan long ol sista ia oli traehad wetem wan bigfala harem nogud long saed blong spirit, we i mekem oli askem ol kwestin olsem: “?Mi mekem wanem blong hem i nomo stap lukluk mi?” o “?From wanem hem i wantem stap pikjarem hem wetem wan narawan be i no mi?”
From se hasban nao i brekem loa, hem i isi blong bisop i filim se hasban nao i nidim blong save yusum ol ki moa blong save openem doa long hiling paoa blong Sevya; be mi bin lanem tu se nid blong waef blong kam oraet bakegen long harem nogud mo trabol long tingting i bigwan i semmak long nid blong hasban blong i lego sin ia mo strong fasin insaed long hem blong wantem ol nogud samting ia.
Long toktok blong hem i go long ol man blong Nifae, Jekob i tok strong long ol man from fasin blong olgeta blong no stap fetful long waef blong olgeta, “we plante long ol filing blong olgeta i sofsof tumas, mo klin, mo i save brokbrok isi long fored blong God, we God i hapi long ol samting ia” (Jekob 2:7). Hem i gohed i talem: “Yufala i bin brekem hat blong ol gudfala woman blong yufala, mo bin lusum tras blong ol pikinini blong yufala, from ol nogud eksampol blong yufala we yufala i bin soem long fored blong olgeta, mo ol krae blong hat blong olgeta i go antap long God agensem yufala” (Jekob 2:35). Mi bin luk ol krae ia long fored blong mi. Ol krae ia oli kamaot i no from bigfala filing blong waef we hasban blong hem we i yusum ponografi i tanem baksaed long hem, be tu, i kamaot long ol toktok blong daonem hem, mo ol aksen blong daonem hem we i stap kamaot long taem blong hadtaem ia. I tru. I hapen oltaem se wan man we i talemaot fasin blong hem olsem, i putum blem long waef blong hem olsem eskius blong fasin blong hem, mo i talem ol defren aksen se waef i mekem o i no stap mekem. Sore tumas, i hapen se waef i stat blong tekem ol samting ia long hemwan mo i stat blong bilivim ol toktok ia.
Wan kapol olsem i bin sidaon long ofis blong mi, jes sam dei afta we hasban i talem se hem i stap yusum ponografi stat long taem we hem i wan yang man. Taem hem i bin stap lisin long wan lesen blong Rilif Sosaeti we i toktok blong Sista Linda S. Rivs long Epril 2014 long jeneral konfrens, “Proteksen long Ponografi—Wan Hom we i Lukluk Nomo long Kraes,” waef ia i stat blong luksave long fasin blong hasban blong hem we i stap mekem long hem, ol fasin we tija i stap tokbaot. Afta long lesen, hem i fesem hasban blong hem wetem kwestin ia, mo hem i konfesem sikret ia we hem i bin stap haedem blong wan longfala taem. Tras long hemwan we i go nogud finis, i joen wetem wan filing blong bigfala kros. Long taem blong fas miting blong tufala wetem mi, tufala i traehad blong luk olsem wanem mared blong tufala bae i save gohed. Mi talem long tufala se i gat hop, mo givim sam fas kaonsel, mo afta invaetem olgeta blong kambak, mo mit wetem mi seperet.
Wetem ol strong prea we mi bin givim blong rere from ol miting ia, mi bin luklukbak long ol tingting we oli stap long Ministering Resources on LDS.org, speseli long risos blong sapotem ol waef o hasban blong olgeta we oli stap yusum ponografi, mo mi ridim toktok ia: “Talemaot lav blong yu mo wari blong yu long sista ia, taem yu mit wetem hem hemwan, mo tu, lav mo wari we yu gat long hasban blong hem. Mekem i klia se hem i no responsibol long fasin blong hasban blong hem blong yusum ponografi, o rong fasin, mo bae yu no askem hem blong gohed blong stap tekem ol abius fasin.”
Taem mi mit wetem sista ia, mi folem kaonsel ia mo ademap se ol aksen blong hasban blong hem i no abaot hem nating, i no abaot wan samting we hem i no mekem o i bin mekem, be i wan problem insaed long hemwan. Mi luk se wan wef blong harem gud i kam long hem, taem hem i akseptem ol toktok ia mo filim konfemesen blong Spirit i talem long hem se hemia i tru. Long en blong intaviu, hem i askem sapos bae mi givim wan prishud blesing long hem. Mi luksave se mi nomo nao bae hem i save askem blesing olsem ia, from hem i no wantem se famli o fren i save long situesen blong hem.
Blong help blong hem i kam oraet bakegen, mi invaetem hasban blong go long wan lokol Lata-dei Sent adiksen grup, mo mi leftemap tingting blong waef blong hem blong joenem grup ia blong ol waef mo ol memba blong famli. Hem i tokbaot haremgud we hem i bin filim blong mit wetem ol nara sista we oli andastanem wanem nao hem i stap gotru long hem, mo hop ia we grup ia i givim blong luk ol kapol we oli gotru long semfala tes, mo oli bin win blong kamaot long samting ia evriwan.
Sam manis i pas nao afta long fas miting blong mi wetem kapol ia, mo lav mo wari blong mi long olgeta i gro from we mi mit wetem olgeta plante taem. Nomata we mi luksave se rod we oli stap gohed long hem i save gat ol taem we bae oli gobak biaen, hem i wan glad long mi blong lanem, evri manis, se hasban i bin holemtaet hem, i fri long rabis tingting mo ponografi, mo blong luk waef i tingting gud long hemwan mo i gat tras, we mi save luk.
Long ol intaviu we mi jes gat wetem tufala, trabol long tingting mo krae we i stap long ol fas miting oli go lus, mo plante smael mo samtaem laf i kam. Be risal we i moa bigwan we i bin kamaot, hem i hop—hop se mared blong olgeta bae i save gohed, be tu, i save kasem paoa blong kam wan naes mared mo kam olsem wan god.
Mi luksave mo sore tumas, from i no evri kapol oli gotru long semfala eksperiens. Sam mared bae oli brok taem hem we i yusum ponografi i no wantem blong mekem progres. Nomata long rod we hasban i jusum, be mi bin lanem se kaonsel blong helpem ol waef i kam wetem insperesen. Mi hop se i no gat wan sista long situesen olsem we bae i filim se bisop blong hem i no wantem save long hem, i jajem hem long rong wei, mo i no andastanem hem. Seves blong bisop i wan ki rod we Sevya i stap soemaot paoa blong Hem blong hilim fulwan wanwan hat—Iven olgeta ia we oli stikim olgeta i dip we i dip” (Jekob 2:35).
Andanit: Keri i harem nogud tumas taem hem i lanem se hasban blong hem i gat jalenj wetem ponografi, be hem i faenem hop mo hiling tru long Jisas Kraes mo Atonmen blong Hem.