Ol Voes blong Ol Lata-dei Sent
!Yu No Sut!
Oli no talemaot nem
Bob mo mi i sidaon long polis trak, mitufala i wet se bae mitufala i luk wan i muv daon long rod. Mitufala i statem patrol blong mitufala tu aoa eli, mo faenem trak we oli stap tokbaot long wan polis redio woning.
“Stil i stap hapen yet,” woning i talem. “Tu man, tufala i gat masket. Oli jes luk tufala long wan orenj trak. Ol witnes oli talem se ol man ia oli save faet mo oli save sut.”
Long eria ia, i bin gat fulap stil i bin hapen, mo nomata hadwok blong mifala, ol stilman ia oltaem oli stap ronwe. Ol tingting ia oli flae long maen blong mi taem mi luk tufala man ia oli kamaot long wan hom long rod ia we i tudak, mo oli jiam long wan orenj trak. Naoia, oli stap ron i kam long mitufala.
“Mi nidim bakap yunit,” mi talem. “Ol stilman oli ron i go long Not long ples mifala i stap long hem.”
Bakap blong mitufala, i tu ditektiv long nomol klos insaed long wan nomol trak, oli pul long fored blong mitufala, mo Bob mo mi, i folem. Afta we tri trak oli go long wan brij, bakap blong mifala i stop wantaem, i krosem rod long brij long fored blong orenj trak ia, mo mitufala i pak biaen, blokem ol stilman ia. Stret afta, trak i stop mo tufala stilman oli haed we mitufala i no luk olgeta.
“!Kamaot long trak wetem han blong yutufala antap long hed!” Mi givim oda olsem afta we mi kamaot long trak. I no gat wan i ansa.
Mi gat sefklos mo mi rere blong faea, bakegen mi givim oda, “!Kamaot long trak wetem han blong yutufala antap long hed! !Mekem naoia!”
Wantaem draeva i girap mo i tanem hem i luk mi. Mi save luk wan samting olsem nikel i flas long han blong hem.
Polis trening blong mi mo stret tingting blong mi i stap talem se bae mi sut blong sevem laef blong mi. Be antap long fos blong taem ia, mi bin harem wan voes. Hem i kwaet be i gat atoriti mo i gat paoa: “!Yu No Sut!”
Mi ting se bae oli sutum mi long eni taem, be mi bin wet blong wan long trak i faea fastaem. Be, draeva i leftemap han blong hem, i leftemap antap long hed blong hem wanem we i luk olsem wan smol masket, mo i slakem han blong hem long leg blong hem.
“!No muv!” Mi talem taem mi wokbaot kwik i go long trak. “!Yu No Muv!”
Taem ia i olsem wan so long Tivi—kasem taem mi luksve se tufala strong stilman ia insaed long trak oli tu yang gel we tufala i fraet. Wanem we mi ting se i wan smol masket, i aean blong strap blong jea blong trak.
Tufala gel, mifala i lanem afta, se tufala i askem trak blong boefren blong tufala. Tufala i no save nating we boefren blong tufala i wanem kaen man.
“!Mi ting se bae yu ded Kal!” Bob i talem long mi afta. “Kolosap mi sut. Mi no save from wanem mi no mekem.”
Tufala ditektiv long nara trak i talem sem samting, be i no gat wan long olgeta i bin harem wan voes. Mi save nomo se paoa blong heven nomo i save sevem tufala gel ia long ded, mo sevem fo polis ofisa blong mekem wan bigfala nogud msitek. Eksperiens ia i givim mi wan tru save se Papa blong yumi long Heven i save, mo bae i mekem samting blong gud blong yumi.