Stap Lukaotem Ol Presen long saed blong Spirit

I Kam long Presiden Joj K. Kanon (1827–1901)

Fas Kaonsela long Fas Presidensi

I kam long The Latter-day Saints Millennial Star, Epril 23, 1894, 258–61; oli stretem fasin blong raetem ol sentens.

?Hamas long yufala i stap lukaotem olgeta presen ia we God i bin promesem blong givim?

Evri man mo woman insaed long Jos blong Kraes i save gat ol presen blong Spirit blong God, we bae Hem i serem long olgeta folem fet blong olgeta mo olsem we God i wantem. …

?Hamas long yufala i stap lukaotem olgeta presen ia we God i bin promesem blong givim? ?Hamas long yufala, taem yufala i stap bodaon long fored blong Papa blong yufala long Heven insaed long ol famle prea, o long ol sikret ples, i glad from olgeta presen ia we Hem i bin givim long yufala? ?Hamas long yufala i stap askem Papa, long nem blong Jisas, blong Hem i soemaot Hemwan long yufala tru long ol paoa ia mo ol presen ia? O yu stap gogohed, dei afta dei, olsem wan doa we i swing long ol inj blong hem, mo i no gat filing long topik ia, i no praktisim fet blong hem nating, i glad nomo se hem i kasem baptaes mo i memba blong Jos, mo i spel long ples ia, mo i ting se fasin blong sevem man i stap nomo from se yu bin baptaes? …

… Mi save se God i glad blong hilim ol sikman, i glad blong givim presen ia blong luksave ol defren kaen spirit, presen blong waes tingting, mo presen blong save mo blong profesi, mo ol nara presen we bae yumi nidim. Sapos eniwan long yumi i no stret evriwan, hem i diuti blong yumi blong prea from presen ia we bae i mekem yumi kam stret evriwan. ?Mi mi gat sam samting we i no stret evriwan? Mi gat fulap. ?Wanem nao diuti blong mi? Blong prea long God blong Hem i givim mi ol presen ia we bae i stretem ol samting ia we oli no stret evriwan. Sapos mi mi wan man we mi save kros, nao i wok blong mi blong prea from jareti, we i save wet longtaem mo i wan fasin we i kaen. ?Mi mi wan man we mi jalus? Hem i wok blong mi blong lukaotem jareti, we i no gat jalus long hem. I semmak wetem evri presen blong gospel. Oli stap ia from stamba tingting ia nao. I no gat man i save talem: “O, hemia mi no save jenisim; i fasin blong mi.” Hem i no wan eskius; from se risen we God i promesem blong givim paoa i blong stretem olgeta samting ia, mo blong givim ol presen we bae oli waepemaot ol nogud fasin ia. Sapos wan man i no gat waes, hem i wok blong hem blong askem long God blong kasem waes tingitng. I semmak wetem evri nara samting. Hemia nao plan blong God long saed blong Jos blong Hem. Hem i wantem blong olgeta Sent blong Hem blong oli kam stret evriwan long saed blong trutok. From stamba tingting ia, Hem i givim olgeta presen ia mo i givim olgeta presen ia long olgeta we oli askem olgeta, blong mekem se oli kam ol pipol we oli stret evriwan long fes blong wol ia, nomata we oli gat fulap wiknes, from se God i bin promesem blong givim ol presen we oli nidim blong oli kam stret evriwan.