Fas Presidensi Mesej
Profesi mo Revelesen blong Yuwan
I Kam long Presiden Henri B. Aering
Fas Kaonsela long Fas Presidensi
Tru Jos blong Jisas Kraes i bin kambak mo i stap long wol tedei. Jos blong Jisas Kraes blong Ol Lata-dei Sent, oltaem nomo ol profet mo ol aposol we oli laef oli stap lidim, mo olgeta ia oli kasem oltaem toktok we i kam long heven.
Tabu paten ia i bin tru tu long taem blong bifo. Yumi lanem insaed long Baebol: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta” (Amos 3:7).
God i toktok bakegen long taem blong yumi tru long Profet Josef Smit. Hem i soemaot, tru long Profet Josef Smit, gospel blong Jisas Kraes we i fulwan i stap. Hem i putumbak tabu prishud blong hem wetem ol ki blong prishud ia, wetem evri raet, paoa, mo wok blong tabu paoa blong prishud ia.
Long taem blong yumi, ol profet mo ol aposol we oli gat raet oli toktok, oli tij, mo oli lidim man wetem atoriti we i kam long God Papa, mo Lod Jisas Kraes. Sevya i talem long Profet se, “Wanem we Hem i bin talem, Hem i talem ia nao mo Hem bae i no talem sore from; nomata ol heven mo wol bae oli lus i go, bae toktok blong Hem i no save lus, be bambae i kamtru, sapos i no tru long voes blong Hemwan, be bambae i kamtru tru long voes blong ol wokman blong Hem, mo hemia i semmak” (Luk long D&C 1:38).
Long jeneral konfrens, tu taem long wan yia, yumi gat blesing blong gat janis ia blong harem toktok blong Lod we i kam long yumi tru long ol wokman blong Hem. Hemia i wan spesel janis we i no gat praes from. Be praes blong janis ia i dipen long, sapos o no, yumi kasem ol toktok ia wetem paoa blong semfala Spirit we God i givim long olgeta wokman blong Hem (luk long D&C 50:19–22). Semmak olsem we oli kasem toktok we i kam long heven, i mas semmak wetem yumi. Mo hemia i nidim semfala hadwok long saed blong spirit.
“Mekem Homwok blong Yu”
Sam yia i pas, wan long ol memba blong Kworom blong Olgeta Twelef Aposol i bin askem mi blong ridim wan konfrens toktok we hem i bin stap rere blong jeneral konfrens. Mi mi yangfala insaed long kworom ia. Mi filim se hem i givim ona long mi wetem tras blong hem se bae mi save helpem hem blong faenem ol toktok we Lod i wantem hem blong talem. Hem i talem long mi wetem wan smael: “O, hemia i namba 22 raf pepa blong toktok ia.”
Mi tingbaot kaonsel blong wan Presiden we i gat lav mo kaen fasin, Presiden Harol B. Li (1899–1973) we hem i bin givim long mi fastaem mo i poenemaot gud long mi: “Hal, sapos yu wantem kasem revelesen, mekem homwok blong yu.”
Mi bin ridim, tingting hevi, mo prea long namba 22 raf pepa ia. Mi bin stadi gud olsem we mi save mekem wetem paoa blong Tabu Spirit. Taem memba blong kworom ia i givim toktok blong hem, mi bin mekem homwok blong mi. Mi no sua se mi bin help, be mi save se mi bin jenis taem mi bin harem toktok we hem i bin givim. Ol mesej oli kam long mi we oli moa bigwan bitim ol toktok we mi bin ridim mo hem i bin talem. Ol toktok ia oli gat bigfala mining moa bitim hemia we mi bin ridim long raf pepa ia. Mo i luk se mesej ia, i blong miwan, i stret long ol nid blong mi.
Ol wokman blong God oli livim kakae mo oli prea blong kasem mesej we Hem i gat blong oli talem long olgeta we oli nidim revelesen mo insperesen. Wanem mi lanem aot long eksperiens ia, mo plante moa olsem ia, i we, blong kasem ol bigfala samting we i stap taem yumi stap harem ol profet mo ol aposol we oli laef, bae yumi mas pem praes yumiwan blong kasem revelesen ia.
Lod i lavem evri man o woman we i save harem mesej blong Hem, mo Hem i save hat mo situesen blong wanwan long yumi. Hem i save wanem blong stretem, wanem blong leftemap tingting long hem, mo wanem trutok blong gospel bae i helpem gud wan man o woman blong i jusum bes rod blong hem we i go long laef we i no save finis.
Yumi, we yumi stap lisin mo lukluk ol mesej blong jeneral konfrens, samtaem afta, yumi tingting se: “?Wanem nao mi rimemba gud moa?” Hop blong Lod from wanwan long yumi, i we ansa blong yumi bae hem i: “Bae mi neva fogetem ol taem we mi bin filim voes blong Spirit long maen mo hat blong mi we i talem wanem mi save talem blong mekem Papa blong mi long Heven mo Sevya oli glad.
Yumi save kasem revelesen blong yumiwan taem yumi stap harem ol profet mo ol aposol, mo taem yumi stap wok wetem fet blong kasem revelesen ia, semmak olsem we Presiden Li i talem se yumi save mekem. Mi save se hemia i tru aot long eksperiens blong mi mo tru long witnes blong Spirit.