Hem nao i Bisop?
Man ia we i raet, i stap long Ilinoa, YSA.
From se mi bin lesaktiv plante yia i pas, wan memba we i bin save mi long tetaem ia, i no bin save bilivim se oli bin singaotem mi olsem wan bisop.
Pikja i kam long Mak Smit © 2016
Long wan taem blong wan eksekutiv komiti miting, ol fultaem misinari oli ripotem se i gat wan memba we rekod blong hem i no stap long wod. Mi luksave nem wantaem mo talem se woman ia mo mi i bin stap long semfala wod plante yia i pas.
Wan long ol misinari i talem: “Yes bisop. Hem i talem hemia mo i sapraes we yu nao yu bisop.”
Mi askem olgeta: “?Hem i talem wanem?”
Oli talem se hem i sapraes bigwan mo talem: “Hem nao i bisop?”
Mi mas laf mo eksplenem se sista ia i save mi we mi bin wan defren man 30 yia i pas.
Afta long hemia, taem mi tingtingbak long wanem i hapen, mi tingting long hamas nao laef blong mi i bin jenis long ol las 30 yia we famli blong mi mo mi i bin memba. Mi bin save plante memba blong wod blong mifala blong 20 yia, mo mi bin givim seves olsem branj presiden mo olsem wan bisop, be i no gat wan long ol memba ia oli bin save mi 30 yia i pas. Nomata we wanwan taem bae mi serem ol samting blong bifo blong tij abaot fasin blong sakem sin mo Atonmen blong Jisas Kraes, plante long olgeta long wod oli no bin save bigfala wokbaot blong laef blong mi insaed long Jos.
Famli blong mi mo mi i kam blong save abaot Jos long Mei 1979, mo mi bin save wantaem se hemia nao ples blong mifala. Mifala i bin baptaes long manis Jun, mo long fastaem, mifala i bin aktiv, be i no longtaem afta, mi stop blong go long Jos mo gobak long olfala fasin blong mi. Mi neva gat tu tingting se gospel i tru mo Restoresen i hapen, be mi no ting se mi naf blong stap olsem wan gudfala memba blong Jos.
Long 1982, from se mi stapgohed blong dring, waef blong mi, we i neva stop long fet blong hem, i putum wan divos long kot. Long tetaem ia, famli blong mi i stap long Oklahoma, YSA, be mi bin gobak long Ilinoa, YSA, long ples we mi bin groap long hem. Mi kasem poen ia we bae mi lusum wan samting ia nomo we i impoten tumas long mi: famli blong mi.
Mi stat blong foldaon long ni blong mi mo prea evri moning mo naet long wan God we mi nomo save se Hem i stap o no, o, sapos Hem i stap, Hem i fogetem mi longtaem finis. Be blong tri manis, mi bin fetful blong prea. Eli long wan moning, taem mi bin stap prea strong, wan filing blong bigfala givhan i kam long mi, mo mi bin save se God i stap laef, mo Hem i save mi, mo Hem i lavem mi. Mi bin save tu se bae mi neva save tajem wan drop blong alkol tu.
Long stret naet ia, waef blong mi i ringim mi blong letem mi save se bae hem i sendem ol divos pepa long postofis blong mi saenem. Long taem mitufala i stap storian, wantaem hem i talem: “I gat wan samting i defren long yu. Mi no biliv se bae yu dring bakegen, mo bae mi terem ol pepa ia nomo.” Mitufala i kambak tugeta bakegen, mo tu yia afta, hem i bonem nambatri boe blong mitufala i kam long wol.
Bae wan i save ting se bae mi gobak aktiv long Jos, be mi mi wan stronghed man. Mi gobak blong smol taem, mo mi kasem wan koling olsem tija long kworom blong ol elda. Be i no longtaem, mi filim se mi no naf blong tij, mo bakegen mi go inaktiv.
Long 1991, mifala i muv i go long wan smol branj. Sam manis afta long eit yia blong yangfala boe blong mitufala, waef blong mi, Praemeri presiden, i askem boe se huia nao hem i wantem se bae i mekem baptaes blong hem. Yes, hem i talem se hem i wantem papa blong hem blong i mekem odinens ia. Waef blong mi i talem long hem se ating hemia bae i no save hapen. Hem i no akseptem ansa ia, mo i tekem step blong mekem papa blong hem i aktiv bakegen. Hem i no stop, mo long sot taem, mi stap givim seves olsem Skaot masta, mo afta, mi bin baptaesem mo konfemem boe blong mi.
Ol eit manis afta we mi kambak aktiv, oli bin gat fulap samting i hapen long olgeta. Mifala i sil olsem wan famli long Jikago Ilinoa Tempol, mo bakegen oli singaotem mi olsem tija blong kworom blong ol elda, be long tetaem ia, mi no bin givap. Afta, oli singaotem mi olsem wan kaonsela long branj presidensi, mo faef manis afta, oli singaotem mi olsem branj presiden. Wan manis olsem afta we oli singaotem mi, mi tingbaot se mi stap tingting: “I tru ia we mi mi branj presiden?”
Mi bin talem long plante Sent we oli stap traehad se sapos mi save progres long gospel, bae eniwan tu i save mekem. Hem i nid nomo blong andastanem tru paoa blong Sevya mo Atonmen blong Hem mo tekem ol step blong kam long Hem.
Bae mi oltaem talem tangkyu long waef blong mi mo ol pikinini, mo evri fetful hom tija, kworom lida, bisop, mo ol narafala Sent we oli bin stap olsem wan bigfala eksampol long mi. Hem i bin wan spesel janis blong wok blong Lod mo blong olgeta Sent long ol las 20 yia ia. Mi kasem blesing long laef blong mi i bitim eni samting we mi bin tingting long hem.