Ennaan an Ritōl an Eria
N̄e Eban Kar Bok in Mormon, Iban Kar Jelā
Ilo aolepen mour e aō emōj aō riiti elōn bok ko āinwōt—ko rekalimomo, bwebwenato ko reṃṃan, kōn armej im rej kōketak kōj, im ko rej katakin kōj. Ilo an lōn̄ iaer rej jelōt mour e aō ilo jim̧we, im juōn wōt iaer eḷap an lukkuun oktak. Bok in Mormon ej jipan̄ n̄a n̄an epakeḷọk Anij im ej kalōk pedped eo aō ioon Ripinmuur, Jisōs Kraist (lale Hilamōn 5:12).
Naan in kaṃool
Men̄e ikar jab lukkuun niknik ke eaar 14 aō iiō, kar karuwaineneik eō bwe in pād ilo Jemenere. Kōn kar karōk eo an Irooj eaar kōjeraam̧m̧an eō kōn juōn men edik bōtaab uwaak eo ekajoor kōn jar jejjo raan m̧oktaḷọk jen aō kar pojak n̄an uwaak e kajjitōk eo. Ilo iiō ņe, kōm ekkar ekkatak kōn Bok in Mormon. Kōn iakwe im jipan̄ ko an rikaki im rijikuuļ ro m̧ōtta, ikar uwaak e kajjitōk in n̄an riiti Bok in Mormon ilo iiō ne. Men eo eļap an aorōktata, ikar bōk ennaan eo an rikanaan Moronai n̄an kajjitōk ippān Anij eḷaan̄e bok in ej m̧ool (lale Moronai 10:3–5).
Ālkin an kar jino jemenere, iaar jar n̄an Jema Ilan̄, kōn juon bōro em̧ool im kōn lukkuun kōttōpar, kōņaan n̄an jeļā n̄an n̄a make n̄e Bok in Mormon ej m̧ool, im n̄e Josep Smith eaar ukōte kōn menin letok im kajoor eo an Anij āinwōt an ba. En̄jake eo ikar en̄jake kar m̧oktaļo̧k ekar itok ioō. En̄jake in kōn iakwe eo em̧ool kar bwiļ ilo n̄a, im iaar jeļā—lukkuun jeļā bwe Bok in Mormon ekar naan in Anij.
Ilo ejja iien in wōt kōn aō jeļā ke Bok in Mormon ej m̧ool, Jisōs Kraist kar aō Rilo̧mo̧o̧r, Josep Smith ekar juōn An rikanaan, kar kāālet jen jinoin n̄an kōjepļaaktok Kabun̄ eo Irooj em̧ool ilo laļin, im rikanaan eo emour ilo laļin ej letok naan in rōjan̄ im tōl im ij aikuji ilo aō kajjieon̄ mour ekkar n̄an kien im kakien ko an Kabun̄ in. Men kein rekar lukkuun em̧m̧an n̄an jeļā kaki āinwōt juōn ļaddik 14 an iiō.
Jeļāļo̧kjeņ in ekar ukōt eō. Ikar kōņaan bwe in juōn eo em̧m̧an. Ikar kōṇaan kōm̧m̧ani men ko rem̧m̧an, im n̄e ij kōm̧m̧an bōd ij būrom̧ōj kōn ta eo iaar kōm̧m̧ane, iaar pedped ioon Irooj bwe en jipan̄ n̄a bwe in em̧m̧anļo̧k. Tōmak eo aō ilo Jisos Kraist ekar eddōkḷọk kajjojo raan im kajoorḷọk naan in kam̧ool eo aō im meļeļe ko kōn katak ko ilo Bok in Mormon.
Būreejitōn Russell M. Nelson ekar kajjitōk ippān membōr ro ilo Kabun̄ in̄ n̄an ļōmņaki jilu kajjitōk ko: “Kein kajuon, eļan̄n̄e en kar ejjeļo̧k Bok in Mormon elmen nej kar mour eo am̧? Kein karuo, ta eo kwon kar jab jelā? Im kein kajilu, ta eo en kar ejjeļo̧k ippam̧”?1
Eļan̄n̄e Kwojjan̄in kar kōm̧m̧ane menin, ij kajjitōk ippam n̄an lukkuun ļōmņak kake kajjitōk ko im uwaaki ilo m̧ool. Ke iaar uwaaki, aō iakwe im m̧ōņōņō kōn Bok in Mormon, im Jisōs Kraist eo ej kam̧ool kake, eaar lukkuun in ļap.
Iban kar jeļā kōn karōk in pinmuur eo eļap, en̄taan in pinmuur im tiriam̧okake eo an Jisōs Kraist, ak katak ko an rikanaan ro remour. Wāween mour eo aō rainin ej kōn wōt Bok in Mormon. Pedped in katak ko ilo ie rejipan̄ eō pād wōt ilo iaļen bujen in ilo juon laļ eļap nana ie.
Kōjeraam̧m̧an ko an Baam̧le
Būreejtōn Marion G. Romney, kar rikakpilōklōk eo kein karuo ilo Būreejtōnji eo Kein Kajuon eaar kallim̧ur:
“Ij lukkuun jeļā bwe n̄e, m̧oko im̧ōd, ro jined im jemed renaaj riit jen Bok in Mormon kajjojo raan, ippāerro make ak ippān ajri ro nejier, jetōb eo an bok in em̧m̧an enaaj pād ilowaan m̧oko im ippān ro rej pād ie. Jetōb in kautiej enaaj ḷapḷọk, jeḷā ṇae im ḷōmņak kōn ro jet enaaj ļapļo̧k. Jetōb in iakweelel enaaj jako. Jinen im jemen renaaj kōketak ajri ro nejier ilo iakwe eļap im māletlet. Ajri ro renaaj lapḷo̧k aer jeḷā im leļo̧k aer n̄an katak ko an ro jineir im jemeir. Jim̧we enaaj ḷapḷọk. Tōmak, kōjatdikdik, im iakwe em̧ool—iakwe eo erreo an Kraist—enaaj pedjake imōko im mour ko ad, bōktok jetōbin aenōm̧m̧an, lan̄lōn̄, im m̧ōṇōṇō eḷap.”2
Ke eaar wōr ļalem nejim̧ro ajri, ekar pen n̄an baam̧le eo am n̄an ḷoori naan in kanaan in. Ekar bōk tarin in 18 allōn̄ n̄an am kadedeikḷọk am riiti Bok in Mormon. Enan̄in aolep raan kōmij riiti juon peij. Kajjojo iaam kōmij riiti juōn eoon im kōmij jipan̄ leddik eo edik nejim̧ riit, emen iiō dettan, ej ḷoor e am riiti naan ko ilo eoon ko ālkin am riitiḷọk. Ilo an kautiej iien ko kōmij diwo̧jḷọk im m̧ōn̄ā, im ilo tebōl eo ij kajjitōk ippān baam̧le eo aō ta bwebwenato ko rem̧m̧an ippāer ilo Bok in Mormon. Bwebwenato ko ekoba iien eo Alma ej pād ippān armej in Zoram ro, iaḷ eo n̄an āneen kallim̧ur jān Liai im baam̧le eo an, Hilamōn im ritarinae ro, Mormon im Moronai, jerbal in mijenede jān Ammōn im bwebwenato in oktak eo an Alma eo edik. Āliktata, leddik eo edik nejim̧ ekar kakobaba. Ej ba, “Jisos wōt!” Leddik in ekar katakin kōm juōn katak ekajoor kōn tōmak āinwōt juon ajri ilo raan eo.
Karuwainene im Kallim̧ur
Būreejtōn Nelson eaar katakin:
“N̄e ij ļōmņak kōn Bok in Mormon eo, ij ļōmņak kōn naan eo ,kajoor. M̧ool ko ilo Bok in Mormon ewōr an kajoor n̄an kemour, kaenōm̧m̧an, kōjepļaaktok, jipan̄, kōkajoorļo̧k, kōjebwebweik, im kam̧ōņōņōik jetōb ko ad. . . . Ij kallm̧ur bwe ilo ami lukkuun ekkatak Bok in Mormon aolep raan, kom̧ naaj kōm̧m̧ani kālet ko rem̧m̧an—aolep raan. Ij kallim̧ur bwe ilo ami kejōkļo̧kjeņ kōn ta eo kwoj ekkatak, wintō in lan̄ enaaj peļļo̧k, im kom̧ naaj bōk uwaak ko n̄an kajjitōk ko ami im tōl n̄an mour eo ami make?”3
Kallim̧ur eo an Moronai enaaj pād ippān jabdewōt ilo aer riiti Bok in Mormon, men̄e ej kab kein kajuon ak kōļalem. Keememej bwe tōmak im jar, kōn bōro em̧ool, im kōn juon ikdeelel in ekkatak. Ippānļo̧k ilo am̧ ekkatak, kōļmenļo̧kjeņ, im jar, kwonaaj bar bōk naan in kam̧ool im bōk kōjeraam̧m̧an ko rem̧m̧an rej waļo̧k. Menin enaaj lapļo̧k ilo am̧ kwaļo̧k kōn bok in im kwaļo̧k naan in kam̧ool eo am̧ n̄an ro jet.
Ij karuwaineneik eok n̄an kōm̧m̧an bwe Bok in Mormon en m̧ōttan mour eo am̧ kajjojo raan. Ekkatak jen katak ko ie, m̧ōņōņō kōn bwebwenato ko ie, im ļoor waanjon̄ak ko an rikaļoor ro rem̧ool an Jisōs Kraist. Ij kallim̧uri eok, ilo am̧ kōm̧m̧an āindein am̧ tōmak ilo Kraist enaaj kajoorļo̧k, kwonaaj en̄jake eļapļo̧k kōjatdikdik, im kōn tūriam̧okake eo an Irooj, kwonaaj en̄jake iakwe eo erreo an Anij ej kobrak būruem.