Rongorongo ni Kairiiri man te Aono
Te Euangkerio ao Ana Mwakuri ni Kamaiu Iesu Kristo Bon Ibukiia Aomata ni Kabane
N te bong aei, ti maeka n te aonaaba ae a bua mai iai mwaake aika mwaiti. A kauringiira koroboki aika tabu ni kamataata raoi aio:
“Ao e na roko te bong bwa naake aki kan ongo bwanaan te Uea, ke bwanaan ana tia mwakuri te Uea, ke n aki kakauongo raoi nakon aia taeka burabeti ao abotoro, a na bon kamaunaaki mai buakoia aomata; bwa a taonnako man au otenanti, ao n urua au berita ae tabu ae akea tokina; Aki ukoukora te Uea ni kamatoa raoiroina, bwa aomata nako a bon nakonako n oin kawaia, ao ni katotonga oin atuaia, are katotongana ai aron te aonaba” (Reirei ao Berita aika Tabu 1:14–16).
E kairiira te euangkerio nakon koaua aika akea tokiia, te rau, ao te kimwareirei. E reireiniira te eugangkerio bwa ngaira ni kabane bon natin Tamara are i Karawa, ae ti karikaki ni Katotongana. Ngkana ti mataata ni rikira ae mai iroun te Atua, ti kunea te tangira ae akea tiana are e rabuna kairuara ao mamaarara.
Ngkai kaain Ana Ekaretia Iesu Kristo Ibukiia Aika Itiaki ni Boong aika Kaitira, ti kakabwaiaaki ma te ataibwai n ataakin bwainin Ana euangkerio ao Ana Mwakuri ni Kamaiu ara Tia Kamaiu ae Iesu Kristo, are bon te bwai n aoraki ibukin ara aonaaba. Aio bukina ngkai te Uea e tuangiira n tatabemaniira—ngaira ake ti kukurei ni katoka i aora Arana n te bwabetito—bwa ti na tataekina Ana euangkerio. Ti riai n riki bwa taan tei ibukin Ana euangkerio nakon te aonaaba, ao anne bukina ae ti na maiuakina Ana euangkerio. Ana Euangkerio Iesu Kristo bon te rongorongo n tangira ao ni kamaiu ibukiia ni kabane aomata.
Kabanean nanora nakon te mwakuri ni mitinare bon kaotan ara koaua ae kakaawaki ni “kakawakin te euangkerio ae tabangaki.” Ara mitinare a rabwatana te tamnei ae e onoti n Ana mwakuri Kristo, n kawariia naake aki tabeakinaki bwa a kakawaki ao ni butimwaiia ma te kukurei ni kabane naake a tauraoi n ongora. A uouota te oota n rongorongon te euangkerio ae tabangaki, ni kakoauaa bwa Ana tangira te Atua ao Ana Mwakuri ni Kamaiu Iesu Kristo a tauraoi ibukiia aomata ni kabane.
E kabwarabwara tamaroan te koaua aio 2 Nibwaai 26:33:
“. . . [Te Uea] weteia ni kabane bwa a na nakoina ma ni katoonga ana raoiroi; ao akea ae totokoia ngkana e nakoina, ae bwatabwata ke ae mainaina, te toro ke ae inaomata, te mwaane ke te aine; ao e uringia aika a beekan; ao titebo aroia ni kabane imatan te Atua, Iutaia ma Tientaire.
Ti riai n uringnga bwa aomata ni kabane ake ti kaitibo ma ngaiia bon natin te Atua, a tau ibukin te tangira, karinerine, ao reken te tai n ongo rongorongon te eunagkerio. Ti kauringaki n Aramwa 16:16 bwa te Uea e na kabwaroa “Tamneina i aon te aba ni kabuta ni katauraoa aia iango natia aomata, ke ni katauraoa nanoia ni butimwaea te taeka are e riai n reireiaki i buakoia n tain Okina.”
Teuana riki mwakoron te tua ae kakaawaki bon te koaua i aon te utu ae akea tokina ao reken te kamaiuaki ibukiia ni kabane kanoara. I nanon ara tembora, ti karaoi otenanti ibukiia ara bakatibu ake a tia ni mate. Karaoan te mwakuri ae tabu aei e kamatoa ara koaua ae te kamaiuaki e tauraoi ibukira ni kabane, nakoia naba naake aki reke aia tai n ongo te euangkerio i nanon aia tai ni maiu.
Ara motinano nakon mwakuri n te tembora a katerea ara koaua bwa Ana tangira te Atua e roota are i aon tian te maiu aei. E nanonaki n aei bwa ti mataata ae Ana Mwakuri ni Kamaiu Iesu Kristo e anga te kantaninga ao te kamaiuaki tiaki ti nakoia naake a maiu, ma bon nakoia naba naake a mena ni iteran te rabuna are teiterana.
Ana Mwakuri ni Kamaiu Iesu Kristo bon boton aan ara koaua. Rinanon Ana Anga Karea ni kamaiu, E katokaa Iaona ara bure, marakira, ao rawawatara, ngaia are e anganiira ara tai n rairannano ao ni karekea kabwaraan ara bure ae mai iroun te Atua. Aio bon te bwai n tangira ae tabangaki, ae e tauraoi nakoia ni kabane ake a nanorinano ni butimwaea te Uea i nanon maiuia.
Ti a bane n tei n nene n te koaua ae Ana euangkerio ao ana Mwakuri ni Kamaiu Iesu Kristo bon ibukira ni kabane. Bon te rongorongo ni karekean te kantaninga, te kamaiuaki ao te kakabwaia ae akea tokina, ae e reke n akea boona nakoia ni kabane ake a ingainga n reiakina ae mwaiti riki. Tia uota ara tangira, mwamwanano, ao ara nanoanga nakoia ni kabane tarira ao mwanera, n ataia ae ngaira bon bwaai ni mwakuri ibukin Ana babaire ae mai ieta, n anga te kamaiuaki nakoia aomata n tatabemaniia nako.
Ni kainana, I kaota au koaua nakon koauan raoi Ana euangkerio Iesu Kristo ao mwaakan Ana Mwakuri ni Kamaiu. Ti a tataro bwa ti na katiteuanaaki n ara motinano ni iriira Kristo ao n tataekina te rongorongo ae raoiroi nakoia ni kabane natin te Atua, n aki tarai aron maiuia ke te bwai are a rinanona. Te aonaaba aei e rangi ni kainanoa te euangkerio ao Ana Mwakuri ni Kamaiu Iesu Kristo i nanon maiuia. Ti a uaia ni bootaki ni kamaiuiia. N aran Iesu Kristo ae tabu, amen.