Դուք պատկանում եք

Քույր Քրիստին Մ. Յի

Սփոփող միության գերագույն նախագահության երկրորդ խորհրդական

Նկար

Քույր Քրիստին Մ․ Յի

Մենք կարող ենք գտնել մեր պատկանելության զգացումը, երբ զարգացնում ենք իմաստալից հարաբերություններ Երկնային Հոր և Հիսուս Քրիստոսի հետ:

Նկար

Հայր Աստվածը և Հիսուս Քրիստոսը թևատարած ողջունում են իրենց շրջապատող մարդկանց

Հատված Փառքի աստիճանները, նկարից, Էննի Հենրի Նեյդերի

Մեզանից յուրաքանչյուրը ծնվել է պատկանելու բնածին պահանջով: Մենք, բնականաբար, փափագում ենք այդ պատկանելությունը մեր ընտանիքների, ընկերների, գործընկերների, ծխերի և մեր կյանքի այլ մարդկանց հետ ընկերակցություններում: Մեր սրտերը կարծես թե ունեն այս երկնային ցանկությունները՝ պատկանելու խոր և մշտական կարիքի համար:

Ես և դուք մեր Երկնային Հոր հավերժական ընտանիքի մի մասն էինք (և դեռևս ենք)՝ երկիր գալուց շատ առաջ: Սուրբ գրությունները մեզ նկարագրում են որպես՝ «օտարներ և պանդուխտներ երկրի վրա» (Եբրայեցիս 11.13, Վարդապետություն և Ուխտեր 45.13): Լքելով մեր երկնային տունը և գալով՝ շփոթմունքով, մենակությամբ և սրտի ցավով լի այս աշխարհ՝ մենք կարող ենք մեզ զգալ թափառականների նման, որոնք կարոտում են իրենց հավերժական տունն ու հարաբերությունները:

Եթե դուք երբևէ զգացել եք երկնային տան կարոտը, գուցե դա այն պատճառով է, որ մեր իսկական տունն ու ինքնությունը կապված են մեր Երկնային Հոր և Փրկիչ Հիսուս Քրիստոսի հետ: Ահա թե ինչու է այդքան կարևոր Նրանց հետ խոր կապ ունենալը: Երբ Նրանց հետ կապված ենք մեր ուխտի հարաբերությունների միջոցով, կգտնենք պատկանելության իրական զգացումը, որին ձգտում են մեր հոգիները:

Մեր ուխտի հարաբերությունները Աստծո հետ

Մեր գործողություններն ու մեր մտքերը արտացոլում են մեր հարաբերությունները, որոնք մենք արժևորում ենք: Նույնը վերաբերում է մեր Երկնային Հոր և Փրկչի հետ մեր ուխտի հարաբերություններին:

Երբ մենք գնահատում ենք Աստծո հետ մեր ուխտի հարաբերությունները, ամեն ինչ փոխվում է: Աշխարհի ազդեցությունն ընդունելու փոխարեն մենք ընդունում ենք Նրա ազդեցությունը և ավելի ենք նմանվում Նրան: Մեր կյանքը սկսում է ավելի շատ իմաստ, հոգևոր կայունություն և ուժ ստանալ: Հանկարծ «պատկանելությունը» գերազանցում է մահկանացու ոլորտը, որն ըստ մեզ, նշանակում է «պատկանելություն»:

Երբ Աստծո հետ այդ ուխտի փոխհարաբերությունն առաջին տեղում է, աշխարհիկ սին շեղումները կորցնում են իրենց ամրությունը, և մենք գտնում ենք իսկական անձնական խաղաղություն և պատկանելություն: Աշխարհը գրեթե ոչինչ անվճար չի տալիս, իսկ մեր Երկնային Հայրը սիրով տարածում է Իր ուխտի օրհնությունները՝ անկախ այս աշխարհում մեր կարգավիճակից (տես 2 Նեփի 9.50–51):

Նախագահ Ռասսել Մ. Նելսոնը հստակ ուսուցանել է, որ «երբ մենք ուխտ ենք կապում Աստծո հետ, մենք ընդմիշտ հեռանում ենք չեզոք հողից: Աստված չի խզի Իր հարաբերությունները նրանց հետ, ովքեր նման կապ են հաստատել Իր հետ: Իրականում, բոլորը, ովքեր ուխտ են կապել Աստծո հետ, արժանանում են հատուկ սիրո և ողորմության»:¹

Մենք ենք որոշում՝ արդյոք սերտ հարաբերություններ ունենք Աստծո հետ. Նա մշտապես մեզ հետ է, սակայն մենք ինքներս պետք է ընտրենք մշտապես լինել Նրա հետ: Իսկ այդ աստվածային ընտրությունը և զորացնող է, և ազատող: Այդ ընտրությունը մեզ ազատում է կեղծ պատկերացումներից, թե ով ենք մենք, նաև ազատում է աշխարհիկ ակնկալիքների սահմանափակող շղթաներից:

Եվ երբ մենք գտնում ենք այդ պատկանելությունը մեր Երկնային Հոր հետ, ապա կարող ենք նայել մեր շուրջը և տեսնել ուրիշներին այնպես, ինչպես Նա է տեսնում: Երբ ես հասկանում եմ, թե Նա ինչ է զգում իմ հանդեպ, ես ավելի լավ եմ հասկանում, թե Նա ինչ է զգում քո հանդեպ, իսկ ուրիշներին հասնելու և հավաքելու իմ կարողությունն ու ցանկությունը մեծանում են:

Նկար

Նավուի տաճարը մայրամուտին

Նավուի տաճարի նկարը մայրամուտին, նկարը՝ Մաքս Դ. Ուիվերի

Ուխտերը բացում են օրհնությունները

Երկնային Հայրը և Հիսուս Քրիստոսը ցանկանում են, որ մենք ուխտեր կապենք Իրենց հետ, որպեսզի Նրանք կարողանան օրհնել մեզ այն ձևերով, որոնց կարիքն ունենք և փոխեն մեզ այնպիսի ձևերով, որոնք թույլ կտան մեզ վերադառնալ Իրենց ներկայություն:

Ես կհրավիրեի ձեզ որքան հնարավոր է հաճախ այցելել Տիրոջ տուն: Երբ պարտավորվում եմ հաճախակի և միտումնավոր գնալ այնտեղ, ես թեթևանում եմ աշխարհիկ հոգսերից, և իմ մտքերն ու բնույթը ազնվանում են:

Մեր ուխտերը պահելու միջոցով մենք ստանում ենք քահանայության զորություն, որը բացում է Փրկչի Քավության օրհնությունները մեր կյանքում: Այդ օրհնությունները ներառում են՝ բժշկում, առաջնորդություն, պաշտպանություն, օգնություն, ուժ, խաղաղություն, հեռանկար և ուրախություն: Երկնային Հայրը ցանկանում է օրհնել մեզ այս բոլոր բաներով մեր ուխտի փոխհարաբերությունների միջոցով:

Եթե դուք դեռ չեք ստացել տաճարի օրհնությունները, ես հրավիրում եմ ձեզ ուսումնասիրել տաճարի օրհնությունները, քահանայության զորությունը, ուխտերը և այն, ինչ Աստված ցանկանում է ձեզ համար: Մի սպասեք, որ ստանաք Նրա սփոփանքը, զորությունը և սիրալիր օգնությունը:

Նախագահ Նելսոնն ասել է․

«Ես կհորդորեի ձեզ չսպասել ամուսնությանը՝ Տիրոջ տանը օժտվելու համար: Այժմ սկսեք սովորել և զգալ, թե ինչ է նշանակում զինված լինել քահանայության զորությամբ:

Եվ ձեզանից յուրաքանչյուրին, ով տաճարային ուխտեր է կապել, խնդրում եմ, որ աղոթքով և հետևողականորեն ձգտեք հասկանալ տաճարային ուխտերն ու արարողությունները: Հոգևոր դռներ կբացվեն: Դուք կսովորեք, թե ինչպես բաժանել երկնքի ու երկրի միջև եղած վարագույրը, ինչպես խնդրեք Աստծո հրեշտակներին, որ աջակցեն ձեզ և ինչպես ավելի լավ ստանաք երկնքի առաջնորդությունը։ Եթե եռանդուն ջանքեր գործադրեք դրա համար, կամրապնդեք և կզորացնեք ձեր հոգևոր հիմքը»:²

Պատկանել ապաշխարության միջոցով

Մշտական ապաշխարությունը ևս մեկ գեղեցիկ և հզոր միջոց է՝ մոտ մնալու Երկնային Հորը և Հիսուս Քրիստոսին: Հաճախ մենք սխալմամբ կարծում ենք, որ եթե շատ ենք ապաշխարում, ուրեմն պետք է որ հեռու լինենք Նրանցից: Բայց ճիշտ հակառակն է։

Ապաշխարությունը ձեզ չի հեռացնում նրանցից, այն ձեզ ավելի է մոտեցնում Նրանց:

Դուք կարող եք ավելի մեծ պատկանելություն և ավելի խորը հարաբերություններ գտնել Նրանց հետ՝ Նրանց օգնության համար դիմելու և ներում ստանալու ձեր ջանքերի միջոցով:

Մեզանից յուրաքանչյուրը կարող է կատարելությունից ավելի հեռու զգալ, քան կցանկանար, բայց ես չեմ կարծում, որ Երկնային Հայրն այնքան մտահոգված է դրանով, որքան Նա մտահոգված է նորից փորձելու մեր ցանկությամբ ու ջանքերով: Նա սիրում է մեզ, Նա գիտի, թե ուր ենք մենք գնում, և Նա սիրով կուղեկցի մեզ:

Մեր թուլություններն ու սխալներն ընդունելը խոցելիություն է պահանջում, սակայն ապաշխարելով՝ մենք հրավիրում ենք Երկնային Հորը մոտ լինել մեր այդ խոցելի մասի հետ: Այդ մոտիկությունը թույլ է տալիս Նրան տարածել Իր մեծ սերը մեզ վրա և ապահովել մեզ անհրաժեշտ բժշկում, ներում և անվտանգություն: Աստծո հանդեպ այս կապով է, որ մենք կզարգացնենք վստահություն և կգտնենք քաջալերանք ու իսկական պատկանելություն:

Նկար

Արարումը

Արարումը, Էննի Հենրի Նեյդեր

Բարձրագույն հեռանկարի որոնում

Մեր հեռանկարը կարող է նպաստել Տիրոջ Եկեղեցում մեր պատկանելության զգացմանը: Մենք կարող ենք ընտրել այն հեռանկարը, որ մեր սեփական գործողությունները կարող են օգնել մեր ծխին, մեր Սփոփող միությանը կամ մեր երեցների քվորումին՝ դառնալու սիրառատ վայր: Օգնելով ուրիշներին պատկանել՝ իրականում մեծացնում ենք մեր սեփական պատկանելության զգացումը:

Քանի որ դուք Աստծո զավակն եք, դուք պատկանում եք, անկախ նրանից, թե ուրիշներն ինչպես են ընկալում ձեզ կամ ինչպես կարող եք ընկալել ինքներդ ձեզ: Հոր երջանկության ծրագիրը նախատեսված է ձեզ համար, և դուք կարևոր դեր ունեք դրանում: Ձեզանից յուրաքանչյուրը կարող է եզակիորեն նպաստել և պատկանել Աստծո արքայությանը՝ անկախ ձեր ամուսնական կարգավիճակից, կրթությունից կամ ծագումից:

Ինձ բազմիցս այցելել է այն միտքը, որ «երիտասարդ ամուրիներ», «չափահաս երիտասարդներ» և «չափահաս ամուրիներ» եզրույթները չեն, որ իրականում բնութագրում են ձեզ: Սրանք ժողովրդագրական տերմիններ են, որոնք օգնում են նկարագրել տարիքը և ամուսնական կարգավիճակը, բայց դրանք իսկական հավերժական ինքնության, նպատակի և կարողությունների համարժեք բնութագրիչներ չեն:

Պիտակները կամ համեմատությունները կարող են սահմանափակել այն, թե մենք ինչպես ենք տեսնում մեզ և մեր արժեքն ու ներուժը Աստծո արքայությունում: Իրականությունն այն է, որ դուք Հիսուս Քրիստոսի Վերջին Օրերի Սրբերի Եկեղեցու անդամ եք: Դուք ուխտեր եք կապել Աստծո հետ: Դուք հասանելիություն ունեք Նրա քահանայության զորությանը: Դուք Սփոփող միության կամ երեցների քվորումի անդամ եք: Դուք, ինչպես նախագահ Նելսոնն է ուսուցանել, Աստծո զավակն եք, ուխտի զավակը և Հիսուս Քրիստոսի աշակերտը: Ահա թե ով եք դուք իրականում նախ և առաջ, և դա այն է, ինչը ձեզ «կառաջնորդի դեպի հավերժական կյանք Աստծո սելեստիալ արքայությունում»:³

Ավետարանը վերականգնվել է չափահաս երիտասարդ մարգարեի՝ Ջոզեֆ Սմիթի միջոցով: Դա խորհելու հզոր միտք է։ Երկնային Հայրը և Հիսուս Քրիստոսը այդ տարիքում Մարգարեին և նրա համախոհներին վստահեցին Եկեղեցու վերականգնումը: Աստված նաև վստահում է, որ դուք կլինեք այս մեծ աշխատանքի մի մասը այս վերջին օրերին:

Եթե ցանկանում եք իմանալ, թե ով եք դուք, և արդյոք ձեզ սիրում և գնահատում են, հարցրեք ձեր Երկնային Հորը: Նա միշտ ձեզ կասի ճշմարտությունը ձեր մասին: Նա կօգնի ձեզ տեսնել ինքներդ ձեզ այնպես, ինչպես Նա է տեսնում ձեզ՝ հսկայական կարողությամբ ու սիրով: Նա կարող է ձեզ առաջնորդել դեպի մեծ հնարավորություններ և աճ, որը դուք դժվար թե պատկերացնեք:

Թող որ մենք բոլորս աչքեր ունենանք տեսնելու միմյանց և ինքներս մեզ, ոչ թե տարիքի կամ ամուսնական կարգավիճակի, այլ ուխտը պահողների, Հիսուս Քրիստոսի ընկերների, եղբայրների և քույրերի, նաև Աստծո որդիների ու դուստրերի միավորող ոսպնյակների միջոցով: Եվ այդ հավերժական դերերում ու հարաբերություններում մենք կգտնենք պատկանելության ամենաբարձր և իրական զգացումը: