Ngaahi Meʻa Kotoa Pē Ki Heʻetau Leleí
Ko e taumuʻa ʻo e Fakatupú pea mo e natula ʻo e ʻOtuá Tonu ʻi he moʻuí ni pea mo e moʻui taʻengatá, ke fakatahatahaʻi ʻa e ngaahi meʻa kotoa pē ki heʻetau leleí.
Ko e ʻaho 6 ʻeni ʻo ʻEpelelí, ko e ʻaho fakamanatu ʻeni hono fakafoki mai ʻe Sīsū Kalaisi ʻa Hono Siasí ʻi he ngaahi ʻaho kimui ní—pea ko e konga ʻo e faʻahitaʻu Toetuʻú, ʻa ia ʻoku tau fakamoʻoniʻi fiefia ai ʻa e moʻui haohaoa, feilaulau fakalelei, mo e Toetuʻu nāunauʻia ʻa Sīsū Kalaisí.
Naʻe kamata ha talanoa Siaina ʻi he taimi ne maʻu ai ʻe he foha ʻo ha tangata ha hoosi fakaʻofoʻofa.
Naʻe talaange ʻe he kaungāʻapí, “Ko ha monū ia.”
Naʻe talaange ʻe he tangatá, “Tau sio angé pe ʻe fēfē.”
Naʻe tō leva ʻa e fohá mei he hōsí ʻo lavea lahi ʻaupito ʻi he toenga ʻo ʻene moʻuí.
Naʻe talaange ʻe he kaungāʻapí, “Meʻa fakamamahi tama ia.”
Naʻe talaange ʻe he tangatá, “Tau sio angé pe ʻe fēfē.”
Naʻe haʻu ha kau tau ke fili haʻanau kau sōtia, ka naʻe ʻikai ke nau fili ʻa e foha ne laveá.
Naʻe talaange ʻe he kaungāʻapí, “Ko ha monū ia.”
Naʻe talaange ʻe he tangatá, “Tau sio angé pe ʻe fēfē.”
ʻOku faʻa ongoʻi ʻe he māmani puputuʻu ko ʻení ʻoku felīlīaki kinautolu ʻe he matangi ʻo e faingataʻá, taʻepaú, monūʻia ʻi he taimi ʻe niʻihi, pea—lahi tahá—ʻoku fakamamahi. Ka neongo ia, ʻi he māmani fonu faingataʻaʻia ko ʻení, “ʻoku tau ʻilo ʻoku fengāueʻaki fakataha ʻa e ngaahi meʻa kotoa pē ke lelei ai ʻa kinautolu ʻoku ʻofa ki he ʻOtuá.” Ko hono moʻoní, ko e taimi ʻoku tau moʻui angatonu ai mo manatuʻi ʻetau ngaahi fuakavá, “ʻe fengāueʻaki fakataha ʻa e ngaahi meʻa kotoa pē koeʻuhi ko hoʻomou leleí.”
Ngaahi meʻa kotoa pē ki heʻetau leleí.
Ko ha talaʻofa fisifisimuʻa! Fakapapau fakafiemālie mei he ʻOtuá Tonu! Ko e taumuʻa ʻo e Fakatupú mo e natula ʻo e ʻOtuá ke ʻiloʻi ʻa e kamataʻangá mo e ngataʻangá ʻi ha founga fakaofo, ke fakahoko ʻa e ngaahi meʻa kotoa pē koeʻuhi ko ʻetau leleí; pea ke tokoniʻi kitautolu ke tau hoko ʻo maʻa mo māʻoniʻoni ʻo fakafou ʻi he ʻaloʻofa mo e Fakalelei ʻa Sīsū Kalaisí.
ʻE lava ke fakahaofi mo hakeakiʻi kitautolu mei he angahalá, ʻe he Fakalelei ʻa Sīsū Kalaisí. Ka ʻoku mahino foki kia Sīsū Kalaisi ʻa e kotoa hotau ngaahi mamahí, ʻahiʻahí, fokoutuá, faingataʻaʻiá mo e māvahevahé. ʻI he moʻuí ni mo e moʻui ka hoko maí, ʻoku lava ʻe Heʻene ikunaʻi ʻa e maté mo helí ke fakaleleiʻi ʻa e meʻa kotoa pē. ʻOkú Ne tokoni ke fakamoʻui ʻa kinautolu ʻoku loto-mafasia mo manukiá, fakatahaʻi ʻa kinautolu ʻoku loto-ʻita mo mavahevahé, fakafiemālieʻi ʻa kinautolu ʻoku tuenoa mo liʻekiná, fakalotolahiʻi ʻa kinautolu ʻoku loto-veiveiua mo taʻehaohaoá, pea fakahoko ha ngaahi mana ʻoku toki malava pē makatuʻunga ʻi he ʻOtuá.
ʻOku tau hiva haleluiá mo kaila hosana! ʻE fengāueʻaki fakataha ʻa e ngaahi meʻa kotoa pē ki heʻetau leleí ʻi he palani ʻa e ʻOtuá ki he fiefiá, ʻaki ʻa e mālohi taʻengata mo e lelei taʻefakangatangata. ʻOku tau lava ke fehangahangai mo e moʻuí ni ʻaki ʻa e loto-falala pea ʻikai ha ilifia.
Ka ne tau tuʻu toko taha, mahalo he ʻikai ke tau ʻiloʻi ʻa hotau leleí. ʻI he taimi “ʻoku ou fili ai pē aú,” ʻoku ou fili foki hoku ngaahi fakangatangatá, ngaahi vaivaí, ngaahi taʻefeʻungá. Ko hono fakakātoá, kuo pau ke tau lelei kae lava ke tau fakahoko ʻa e lelei tahá. Koeʻuhí ko e ʻOtuá pē taha ʻoku leleí, ʻoku tau fekumi ai ki he haohaoá ʻia Sīsū Kalaisi. ʻOku tau aʻusia hotau tuʻunga totonu taha mo lelei tahá, ʻi he taimi pē ʻoku tau siʻaki ai ʻa e tangata pe fefine fakakakanó pea hoko ko ha tamasiʻi siʻi ʻi he ʻao ʻo e ʻOtuá.
ʻI heʻetau falala mo tui ki he ʻOtuá, ʻe lava ke fakatapui ʻa e ngaahi ʻahiʻahí mo e ngaahi faingataʻá koeʻuhí ko ʻetau leleí. Naʻe fakatau ʻa Siosefa ki he nofo pōpulá ʻi ʻIsipite, pea naʻá ne fakahaofi hono fāmilí mo hono kakaí kimui. Naʻe akoʻi ʻa e ngaahi meʻa ko ʻení kia Siosefa Sāmita ʻi hono fakahū pōpula ia ʻi he Fale Fakapōpula Lipetií, “ʻe foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe.” ʻE lava ke tāpuekina kitautolu mo e niʻihi kehé ʻi ha ngaahi founga ʻoku ʻikai mafakakaukaua ʻi heʻetau moʻui ʻaki ʻa e tuí, ngaahi ʻahiʻahí mo e ngaahi feilaulau ne ʻikai ʻaupito ke tau mei filí.
ʻOku tau fakalahi ʻetau tui mo e falala ki he ʻEikí, ʻe lava ke fengāueʻaki fakataha ʻa e ngaahi meʻa kotoa pē ki heʻetau leleí ʻi heʻetau maʻu ha fakakaukau ʻoku taʻengatá; maʻu ha mahino ko hotau ngaahi faingataʻaʻiá ʻoku malava ke “fuofuoloa siʻi pē”; ʻiloʻi ko e ngaahi mamahí ʻe lava ke fakatapui ia ke hoko ko ha lelei kiate kitautolu; fakahaaʻi ko e ngaahi meʻa ʻoku hoko fakatuʻupakeé, mate taʻeʻamanekiná mo e mahaki fakatupu vaivai ki he sinó ko ha konga ia ʻo e moʻui fakamatelié; pea falala ʻoku ʻikai ke ʻomi ʻe heʻetau Tamai Hēvani ʻofá ha ngaahi faingataʻa ke tauteaʻi pe fakamaauʻi ʻaki kitautolu. He ʻikai ke Ne foaki ha maka ki ha taha ʻoku kole ha foʻi mā, pe ko ha ngata ki ha taha ʻoku kole ha mataʻiika.
ʻI he taimi ʻoku hoko mai ai ʻa e ngaahi faingataʻá, ʻoku angamaheni ko e meʻa ʻoku tau fiemaʻu lahi tahá, ko ha taha ke fanongo mo feohi mo kitautolu. ʻI he momeniti ko iá, he ʻikai ʻaonga ʻa e ngaahi tali angamaheni peé, neongo ʻa ʻenau feinga ke fai ha fakafiemālié. Ko e taimi ʻe niʻihi ʻoku tau fakaʻamu ke ʻi ai ha taha ʻe kaungā mamahi mo tangi fakataha mo kitautolu; tuku muʻa ke tau fakahaaʻi ʻetau ongoʻi mamahí, puputuʻú, naʻa mo e ʻitá; pea ke tau ʻiloʻi fakataha ʻoku ʻi ai ʻa e ngaahi meʻa ʻoku ʻikai ke tau ʻilo.
ʻI he taimi ʻoku tau falala ai ki he ʻOtuá mo ʻEne ʻofa kiate kitautolú, ʻe malava ke fengāueʻaki fakataha ʻetau ngaahi loto-mamahi lahi tahá koeʻuhí ko ʻetau leleí, ʻi he ngataʻangá.
ʻOku ou manatuʻi ʻa e ʻaho ne u fanongo ai ne hoko ha fakatuʻutāmaki lahi ʻi ha kā naʻe kau ai ʻa kinautolu ʻoku ou ʻofa aí. ʻI he ngaahi taimi peheé, ʻi he mamahí mo e tuí, te tau lava pē ʻo lea fakataha mo Siope, “Naʻe foaki ʻe [he ʻEikí], pea kuo toʻo atu ʻe [he ʻEikí]; fakafetaʻi pē ki he huafa ʻo [e ʻEikí].”
ʻI he Siasí kotoa ʻi māmani, ʻoku hoko ʻa e ngaahi siteiki mo e ngaahi vahefonua ʻe 3,500 tupú kae pehē ki he ngaahi uooti mo e ngaahi kolo ʻe 30,000 tupú ko ha hūfangaʻanga mo ha maluʻanga. Ka ʻi loto ʻi hotau ngaahi siteikí mo e ngaahi uōtí, ʻoku tokolahi ha ngaahi fāmili mo ha niʻihi fakafoʻituitui faivelenga ʻoku nau fehangahangai mo ha ngaahi pole faingataʻa, ka ʻoku nau ʻiloʻi (neongo ʻoku teʻeki ke nau ʻiloʻi ʻa e foungá) ʻe fengāueʻaki ʻa e ngaahi meʻa kotoa pē ki heʻetau leleí.
ʻI Hatalasifila, ʻIngilani, naʻe sivi ai ʻa Brother Samuela Pilitisitoka ʻo maʻu ʻokú ne fokoutua ʻi he kanisā kalasi faá, kimuʻa siʻi pē pea ui ia ke hoko ko ha palesiteni fakasiteiki foʻoú. Koeʻuhi ko hono fokoutua mātuʻaki fakamamahí, naʻá ne fehuʻi ki hono uaifi ko ʻAná, pe ko e hā ha ʻuhinga ka ne toe ʻalu ai ʻo ʻinitaviú.
Naʻe talaange ʻe Sisitā Pilitisitoka, “Koeʻuhí, ʻoku ʻamanaki ke uiuiʻi koe ko ha palesiteni fakasiteiki.”
Ko e taʻu pē ʻe taha pe ua naʻe pehē ʻe moʻui ai ʻa Palesiteni Pilitisitoká (ʻa ia ʻokú ne ʻi heni ʻi he ʻahó ni), ka kuo aʻu ʻeni ʻo taʻu ʻe fā ʻa ʻene ngāué. ʻOku ʻi ai ha ngaahi ʻaho ʻoku lelei pea faingataʻa ha ngaahi ʻaho ʻe niʻihi kiate ia. ʻOku fakatahataha mai hono siteikí ʻi he tui lahi, ngāue tokoni, mo e angaʻofa. ʻOku ʻikai ke faingofua, ka ʻoku moʻui ʻaki ʻe hono uaifí mo e fāmilí ʻa e tui, loto-houngaʻia, mo e mahino ki he mamahi ʻoku nau falala ʻe hoko ko ha fiefia taʻengata ʻo fakafou ʻi he Fakalelei ʻa Sīsū Kalaisí.
ʻI he taimi ʻoku tau nonga, loto-tauʻatāina, mo loto-ʻapasia aí, te tau ala ongoʻi ʻa e fakaʻofoʻofa, taumuʻa, mo e ʻaʻapa ʻo e kau ki he fuakava ʻoku foaki mei he ʻEikí. ʻI he ngaahi momeniti toputapú, ʻe malava ke Ne fakaʻatā ke tau mamata ki ha moʻoni taʻengata ʻoku lahi angé ʻa ia ko ha konga ʻo ʻetau moʻui fakaʻahó, ʻa ia ʻoku fengāueʻaki fakataha ai ʻa e fanga kiʻi meʻa iiki mo faingofuá, ki he lelei ʻo kinautolu ʻoku foakí mo kinautolu ʻoku nau maʻu e foakí.
Naʻe vahevahe ʻe he ʻofefine ʻo ʻeku fuofua palesiteni fakamisioná, ko Lepeka, ʻa e founga naʻe tali ai ʻe he ʻEikí ʻene lotua ha fakafiemālié, ʻaki ha faingamālie taʻeʻamanekina ke tali ʻaki ha lotu ʻa ha taha kehe.
ʻI ha efiafi ʻe taha kuo fuoloa e poʻulí, ʻi he tangi ʻa Lepeka ʻi he mole kimuí ni mai ʻa ʻene faʻeé, naʻá ne maʻu ha fakakaukau mahino ke ʻalu ʻo ʻutu ʻa e penisini ʻene kaá. ʻI heʻene aʻu ki he pausá, naʻá ne fetaulaki mo ha fefine matuʻotuʻa ʻoku fāinga ke mānava mo ha tangikē ʻosikena lahi. Kimui angé, naʻe lava ke foaki ʻe Lepeka ki he fefiné ʻa e mīsini ʻosikena toʻotoʻo ʻene faʻeé. Naʻe lea loto-houngaʻia ange ʻa e fefine ko ʻení, “Kuó ke toe ʻomi kiate au ʻa ʻeku tauʻatāiná.” ʻOku fengāueʻaki fakataha ʻa e ngaahi meʻa kotoa pē ki he leleí ʻi he taimi ʻoku tau ngāue fakatauhi ai ʻo hangē ko ia naʻe mei fakahoko ʻe Sīsū Kalaisí.
Naʻe fakamatalaʻi ʻe ha tamai naʻe vahe ange ke hoa ngāue fakaetauhi mo hono foha ʻoku ʻi he toʻu akonakí, “Ko e ngāue fakaetauhí ʻa e taimi ʻoku tau mahulu hake ai mei he hoko pē ko ha kaungāʻapi ʻokú ne ʻomi ʻa e fanga kiʻi kūkisí, ʻo hoko ko ha ngaahi kaungāmeʻa falalaʻanga, mo ha kau ʻuluaki tokoni fakalaumālie.” ʻOku hoko ʻa e kau ki he fuakava mo Sīsū Kalaisí, ke fakafiemālie, fakafehokotaki, mo fakatapui.
ʻOku aʻu pē ki he uhouhonga ʻo e ngaahi faingataʻá, ʻoku lava ke fakamanatu mai ʻe he mateuteu fakalaumālié naʻe ʻafioʻi ʻe heʻetau Tamai Hēvani ʻofá ʻa e taimi te tau ongoʻi laveangofua lahi taha mo tuenoa aí. Hangē ko ʻení, ko ha fāmili ne ʻave ha taha ʻo ʻenau fānaú kihe falemahaki, naʻa nau maʻu kimui ha fakafiemālie ʻi heʻenau manatuʻi naʻe tomuʻa fanafana ange ʻa e Laumālie Māʻoniʻoní fekauʻaki mo e meʻa ʻoku ʻamanaki ke hokó.
Ko e taimi ʻe niʻihi, ko e moʻoni taʻengata lahi ange ʻoku tuku ʻe he ʻEikí ke tau ongoʻí, ʻoku kau ai ʻa hotau fāmili ʻi he tafaʻaki ʻe taha ʻo e veilí. Naʻe fiefia ha fefine ʻi he ului ki he ongoongolelei ʻo Sīsū Kalaisi kuo fakafoki maí. Ka naʻe uesiatamaki lahi ʻene moʻuí ʻe ha meʻa fakamamahi ʻe ua—ko ʻene mātā ha fakatuʻutāmaki ne hoko ʻi ha vaka pea mo e mālōlō fakaloloma ʻa ʻene faʻeé, ʻa ia naʻá ne toʻo pē ʻe ia ʻene moʻuí.
Ka naʻe ikunaʻi ʻe he fefine ko ʻení ʻa ʻene ilifia ʻi he tahí, ke ne lava ʻo papitaiso ʻi he fakauku. Pea ʻi ha ʻaho ʻe taha naʻe fakafiefia moʻoni, naʻá ne mamata tonu ai ki hano papitaiso ha taha ʻi he temipalé ko ha fakafofonga ʻo ʻene faʻē kuo pekiá. Naʻe pehē ʻe he fefiné ni, “Naʻe fakamoʻui ʻeku faʻeé ʻe he papitaiso ʻi he temipalé, pea naʻe fakatauʻatāinaʻi ai au. Ko e fuofua taimi ia naʻá ku toki ongoʻi ai e nongá talu mei he mālōlō ʻeku faʻeé.”
ʻOku fakaongo mai ʻe heʻetau hiva toputapú ʻa ʻEne fakapapau mai ʻe fengāueʻaki fakataha ʻa e ngaahi meʻa kotoa pē ki heʻetau leleí.
Ko e Tohi ʻa Molomoná ko ha fakamoʻoni ia ʻoku tau lava ʻo puke ʻi hotau nimá, ko Sīsū ʻa e Kalaisí pea ʻoku fakahoko ʻe he ʻOtuá ʻEne ngaahi kikité. Naʻe tohi ia ʻe ha kau palōfita naʻe ueʻi fakalaumālie ʻa ia ne nau mamata mai ki hotau kuongá, ʻoku kamata ʻa e Tohi ʻa Molomoná ʻaki ha talanoa mālie moʻoni—ko ha fāmili ne nau fefaʻuhi mo ha tōkehekehe lahi. Ka ʻi heʻetau ako mo fakalaulauloto ʻa e 1 Nīfai vahe 1 ʻo aʻu ki he Molonai vahe 10, ʻoku tau ofi ai kia Sīsū Kalaisi mo ha fakamoʻoni mālohi ʻe lava ke faitāpuekina kitautolu ʻi he taimí ni ʻi he kuongá ni, ʻe he meʻa naʻe hoko ʻi he feituʻu mo e kuonga ko iá.
ʻI hono ʻomi ʻe he ʻEikí ʻa Hono ngaahi falé ke ofi ange ʻi ha ngaahi feituʻu lahi angé ʻo fakafou ʻi Heʻene palōfita moʻuí, ʻoku fengāueʻaki fakataha ʻa e ngaahi tāpuaki ʻo e temipalé ki heʻetau leleí. ʻOku tau fehokotaki mo e ʻOtua ko ʻetau Tamaí mo Sīsū Kalaisi ʻo fakafou ʻi he fuakavá mo e ouaú, pea ʻoku tau maʻu ai ha fakakaukau ʻoku taʻengatá ʻi he moʻui fakamatelié. ʻOku tau foaki taha taha, ʻi he foʻi hingoa ki he foʻi hingoa, ki he kau mēmipa ʻofeina ʻo e fāmilí—ngaahi kuí—ʻa e ngaahi ouau fakamoʻui mo e ngaahi tāpuaki ʻo e fuakavá ʻi he sīpinga ʻa e ʻEikí ʻo e kau faifakamoʻui ʻi he Moʻunga ko Saioné.
ʻI he fakaʻau ke ofi mai ange ʻa e ngaahi temipalé kiate kitautolu ʻi ha ngaahi feituʻu lahi, ko ha feilaulau fakatemipale te tau lava ʻo fakahokó ko e fekumi tuʻo lahi ange ki he māʻoniʻoní ʻi he fale ʻo e ʻEikí. Kuo taʻu lahi ʻetau fakahaofi ha paʻanga, palani, mo feilaulau ke ō ki he temipalé. Ko e taimí ni, kapau ʻe lava ʻi homou tūkungá, kātaki ʻo omi tuʻo lahi ange ki he ʻEikí ʻi Hono fale māʻoniʻoní. Tuku ke tāpuekina, maluʻi mo ueʻi fakalaumālie ʻe hoʻo moihū mo e ngāue maʻu pē ʻi he temipalé, ʻa koe mo hoʻo fāmilí—ʻa e fāmili ʻokú ke maʻú pea mo e fāmili te ke maʻu ha ʻahó.
ʻIkai ngata aí, kapau ʻe fakaʻatā ʻe homou tūkungá, kātaki ʻo fakakaukau ki he tāpuaki ʻo hono maʻu hamou vala temipale pē ʻamoutolú. Naʻe pehē ʻe ha kui fefine mei ha fāmili loto-fakatōkilalo, ko e meʻa ʻokú ne fiemaʻu lahi taha ʻi he māmaní, ke maʻu hano vala temipale pē ʻoʻona. Naʻe pehē ʻe hono mokopuna tangatá, “Naʻe fanafana mai ʻa Kulenimā, ‘Te u ngāue ʻi hoku vala temipale pē ʻoʻokú, pea ʻi heʻeku maté, ʻe tanu pē au ai.’” Pea naʻe hoko pē ia ʻi he taimi naʻá ne mālōlō aí.
Hangē ko hono akoʻi mai ʻe Palesiteni Lāsolo M. Nalesoní, “Ko e meʻa kotoa pē ʻoku tau tui ki aí mo e talaʻofa kotoa pē kuo fai ʻe he ʻOtuá ki Heʻene kakai fuakavá ʻoku fakatahaʻi ia ʻi he temipalé.”
Ko e taumuʻa ʻo e Fakatupú pea mo e natula ʻo e ʻOtuá Tonu ʻi he moʻuí ni pea mo e moʻui taʻengatá, ke fakatahatahaʻi ʻa e ngaahi meʻa kotoa pē ki heʻetau leleí.
Ko e taumuʻa taʻengata ʻeni ʻa e ʻEikí. Ko ʻEne fakakaukau taʻengatá ia. Ko ʻEne talaʻofa taʻengatá ia.
ʻI he taimi ʻoku ongoʻi lōmekina ai ʻa e moʻuí pea ʻikai mahino ʻa e taumuʻá, ʻi he taimi ʻokú ke loto ai ke lelei ange hoʻo moʻuí ka ʻoku ʻikai ʻilo ʻa e foungá, kātaki ʻo haʻu ki he ʻOtua ko ʻetau Tamaí mo Sīsū Kalaisi. Falala ʻokú Na moʻui, ʻofeina koe, mo finangalo ʻa e ngaahi meʻa kotoa pē koeʻuhi ko hoʻo leleí. ʻOku ou fakamoʻoni ko Hona finangalo taʻengatá ia, ʻi he huafa toputapu mo māʻoniʻoni ʻo Sīsū Kalaisí, ʻēmeni.