“ʻEletā David L. Buckner,” Liahona, Mē 2024.
ʻEletā David L. Buckner
Fitungofulu Taki Māʻolunga
Naʻe fāʻeleʻi ʻa ʻEletā Tēvita L. Pakinā ʻi he ʻaho 27 ʻo Sepitema 1963, ʻi ʻOkiteni, ʻIutā, USA, ka naʻá ne “fakamatuʻotuʻa” lolotonga ʻene nofo taʻu ʻe tolu ʻi Sakalameno, Kalefōnia, USA.
Ko Tēvitá ko e siʻisiʻi taha ia ʻi he fānau ʻe toko nima ʻa Mepa mo E. Lamā Pakinaá, naʻá ne hiki mo hono fāmilí ʻi hono taʻu 11 ki Kalefōnia ʻi he taimi naʻe uiuiʻi ai ʻene tamaí ke ne tokangaʻi e misiona ʻo e Siasí ʻi Sakalamenó. ʻI heʻene mamaʻo mei he ngaahi kaungāmeʻa lelei ʻi ʻIutaá, naʻá ne ako e founga ke feohi ai mo ha ngaahi kaungāmeʻa foʻoú pea naʻá ne maʻu ha “ngaahi taʻokete mo e tuofāfine lalahi ʻe toko 300” ʻi he kau faifekau taimi kakató.
Kae hiliō aí, naʻe loloto ʻene fakamoʻoni ki he ongoongolelei ʻo Sīsū Kalaisí. Naʻá ne pehē, “Naʻe liliu ʻe he aʻusia ko ia ʻi he misioná ʻa e meʻa kotoa pē kiate au.”
Naʻá ne ngāue fakafaifekau kimui ange ʻi he Misiona ʻEkuatoa Kuaiakilí. Hili pē ha māhina ʻe tolu ʻo ʻene ngāue fakafaifekaú, lolotonga ʻene hoko ko ha palesiteni fakakolo ʻi he kolo ko Sipisapá, naʻá ne tengihia fakataha mo e kāingalotu ʻo e koló mo ha niʻihi kehe ʻa e melemo ʻa ha kiʻi tamasiʻi taʻu 11 lolotonga ʻenau kau atu ki ha ʻekitivitī ʻa e Siasí.
ʻI heʻene tautapa ki he Tamai Hēvaní ʻi he ngaahi uike mo e māhina hoko mai aí, naʻá ne maʻu ai ha fakamoʻoni taʻeueʻia ki he palani ʻo e fakamoʻuí. Naʻá ne mātātonu foki e manavaʻofa ʻa e ʻEikí ʻi hono tali ʻe he niʻihi ʻi he tukui koló ʻa e ongoongoleleí. Naʻe mahino kiate kinautolu ʻa e natula toputapu ʻo e moʻuí pea mo e mālohi ʻo e ʻaloʻofa ʻa e ʻEikí.
Hili ʻa e ngāue fakafaifekau ʻa ʻEletā Pakinaá, naʻá ne ako ʻi he ʻUnivēsiti Pilikihami ʻIongí, ʻa ia naʻá ne fetaulaki ai mo Senifā Lomenī Siakisoni. Naʻá na mali ʻi he ʻaho 30 ʻo ʻAokosi 1990, ʻi he Temipale Salt Lake. Naʻe tupu hake ʻa Sisitā Pakinā ʻi Niu ʻIoke, USA, ʻa ia naʻá na hiki ki ai hili ʻena malí. Naʻá na ohi hake ʻena fānau ʻe toko nimá ʻi Manihātani, ʻa ia naʻe fakafofongaʻi ai ʻe ʻEletā Pakinā ʻa e Siasí ʻi he Komisoni ʻiloa ʻa e Kau Taki Fakalotú.
Naʻe maʻu ʻe ʻEletā Pakinā ha mataʻitohi BA ʻi he ngāue fakapaʻangá mei BYU ʻi he 1988 mo ha mataʻitohi MA ʻi hono puleʻi ʻo e pisinisí mei he ʻUnivēsiti Tōhamí ʻi he 1991. Naʻá ne maʻu foki mo ha mataʻitohi MA ʻi he fengāueʻaki fakavahaʻapuleʻangá mei BYU ʻi he 1995 mo ha mataʻitohi toketā ʻi he laó (juris doctorate) mei BYU ʻi he 1996. Kuó ne hoko ko ha palōfesa ʻi he ʻunivēsití, pea talu mei he 1999, kuó ne hoko ko e palesiteni ʻo e Bottom Line Training and Consulting Inc. Kuo hoko ʻa ʻEletā Pakinā ko ha Fitungofulu Fakaʻēlia, palesiteni fakasiteiki, aleaʻanga māʻolunga, mo ha pīsope.