ʻEletā Sergio R. Vargas

Fitungofulu Taki Māʻolunga

ʻI he taimi naʻe feʻofaʻaki ai ʻa ʻEletā Seasio R. Vākasi mo ʻAnitulia Senisesí, naʻá ne fakakaukau ko ʻene founga faingofua ke fakaleleiʻi ʻaki ʻena faikehekehe ʻi he tui fakalotú: te na mali ʻi hono siasí maʻa hono fāmilí pea mo ha mali ʻe taha ʻi he siasi ʻo e fefiné maʻá e fāmili ʻo e fefiné.

Ka neongo iá, naʻe vave pē ʻene ʻiloʻi he ʻikai faingofua ke fakahoko ia. Naʻe hoko ʻa ʻAnitulia ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea naʻá ne loto ke mali he temipalé. Ko ia naʻá ne fakaafeʻi ai [ʻa ʻEletā Vākasi] ke ako lahi ange fekauʻaki mo ʻene tui fakalotú mei he ongo faifekaú.

Naʻe tali ʻe ʻEletā Vākasi ʻa e fakaafé, ʻa ia naʻe liliu ai ʻene moʻuí.

Naʻá ne manatu ki heʻene ngāue ʻi ha kautaha toutai salamoni ʻi he taimi ko iá, ʻo tokoni ki hono fetuku ʻo e ika moʻuí ʻi tahí. Lolotonga ha folau vaka houa ʻe 25, naʻá ne ʻilo ha kiʻi feituʻu lilo ke lau ai ʻa e Tohi ʻa Molomoná peá ne fehuʻi ai ki he Tamai Hēvaní fekauʻaki mo e ongoongoleleí. Naʻe hoko ia ko ha liliuʻanga fakalaumālie.

Naʻe fāʻeleʻi ʻa ʻEletā Vākasi ʻi he ʻaho 2 ʻo Nōvema 1976, ʻi Pueto Velasi, Silei, ʻa ia naʻe ohi hake ai ia mo hono ongo tehiná. Naʻe tokangaʻi heʻene faʻē ko Kelētisi Paulí ʻa e ʻapí lolotonga iá naʻe tauhi ʻe heʻene tamai ko Lenato Vākasí, ʻa e melinó ʻi heʻene hoko ko ha ʻōfisa polisí. Neongo naʻá ne faʻa fetaulaki mo e kau faifekaú ʻi heʻene kei talavoú, ka naʻá ne saiʻia ange he vaʻinga pasiketipoló ʻi haʻane ako ki he ongoongoleleí.

Naʻe pehē ʻe ʻEletā Vākasi naʻá ne fetaulaki mo Sisitā Vākasi peá ne toki mateuteu leva ke fanongo ki he ongo faifekaú ʻaki ha ʻatamai mo e loto talangofua. Naʻá na mali ʻi he ʻaho 26 ʻo Siulai 2003, peá na sila kimui ange ʻi he Temipale Santiago Chile. ʻOkú na maʻu ha fānau ʻe toko tolu.

ʻI hono uiuiʻi ʻo ʻEletā Vākasi ko ha Fitungofulu Taki Māʻolungá, naʻá ne lolotonga hoko ko ha Fitungofulu Fakaʻēlia ʻi he ʻĒlia Saute ʻAmelika Tongá. ʻOku kau ʻi hono ngaahi uiuiʻi kimuʻa ʻi he Siasí ʻa e aleaʻanga māʻolunga, palesiteni fakakolo, mo e palesiteni fakasiteiki.

Naʻe fakakakato ʻe ʻEletā Vākasi hono mataʻitohi BA ʻi he maliní mei he ʻUnivēsiti Losi Lākosí ʻi he 1999 peá ne maʻu mo ha tipiloma ʻi he pule fakapisinisí mei he ʻUnivēsiti ʻAosituliá ʻi he 2002. Kimuí ni maí, naʻá ne ngāue ko ha pule ki hono fakalele e ngāué ʻi he Ventisqueros, ko ha mēmipa ʻo e German Schörghuber Corporate Group.