Fakatonulea ki he Lea Fakafonuá ʻi he Konifelenisi Lahí

ʻI ha houa ʻe taha kimuʻa ʻi he fakatahaʻanga takitaha ʻo e konifelenisi lahí, ʻoku fakatahataha mai ha kau mataotao ʻe laungeau ʻi he lea fakafonuá ki ha loki lahi ke fakaleleiʻi fakaʻosi ʻa e ngaahi lea ʻo e konifelenisí ʻa ia kuo ʻosi liliú pea ʻe fakatonulea ki ha taha ʻo e ngaahi lea fakafonua ʻe 103.

ʻI he kamata pē ʻa e konifelenisí, ʻoku nau maʻu ha faingamālie pē ʻe taha. Kuo pau ke lelei ia, pea kuo pau ke lelei ia ʻi he fuofua taimí pē. ʻOku fiemaʻu ke tonu e taimí, mita e leá, mahino e puʻaki leá, pea taukei ʻi he lea fakafonuá, lolotonga hono fakahaaʻi ʻa e ongo mo e taumuʻa ʻa e tokotaha lea ʻi he tuʻunga malangá ʻi he laumālie tatau naʻe faʻu ʻaki ʻa e pōpoakí.

Naʻe laka hake ʻi he kau lea mo e kau ʻosi ngāue fakafaifekau ʻe 800 naʻa nau fakatonulea ʻa e ngaahi konga ʻo e konifelenisi lahi ko ʻení. Meimei ko e vaeua ʻo e kau fakatonuleá naʻa nau fakahoko ʻa e ngaahi pōpoakí mei Sōleki Siti, ʻIutā, USA, kae fakahoko ʻe he vaeua ʻe tahá ʻenau fakatonuleá mei honau ngaahi fonua tupuʻangá. Naʻe kau foki mo ha niʻihi ʻi hono liliu ʻo e ngaahi lea ʻo e konifelenisí ʻi he ngaahi uike kimuʻa he konifelenisi lahí.

Lolotonga e fakamafolá, ʻoku lau ʻe he kau fakatonuleá, ʻa ia ʻoku meimei ke nau ngāue ʻi ha timi ʻoku tautau toko fā ki he toko ono ki he fakatahaʻanga ʻe taha, ʻa e pōpoaki takitaha ʻi ha kiʻi loki ʻoku ʻikai longoaʻa ʻi he ʻŌfisi ʻo e Siasí pe ʻi ha feituʻu pau ʻi he funga ʻo e māmaní. ʻOku tui ʻe he kau fakatonuleá ha ngaahi meʻa-fanongo ke fanongo ki he ngaahi fakatahá ʻi he lea faka-Pilitāniá, ʻoku nau siofi leva ha monitoa ke taimi ʻenau fakatonuleá mo e tokotaha leá. Kuo pau ke fakakaukau ʻa e kau fakatonuleá ki ha fepōtalanoaʻaki ʻe ua—ʻi ha ongo lea fakafonua kehekehe—ʻi he taimi tatau pē.

ʻOku pehē ʻe he tokotaha fakatonulea ko Sōnasi Palasati ʻoku vēkeveke ʻa e kāingalotu lea faka-Hinitī ʻi Fisí ke fanongo ki he kau palōfitá ʻi heʻenau lea fakafonuá. Naʻá ne fakamatalaʻi ha fefine ʻe taha ʻo pehē, “ʻI ha ngaahi taʻu lahi, naʻá ne lava ke mamata mo fanongo ʻi he ngaahi fakatahaʻanga ʻa e Siasí ʻi he lea faka-Pilitāniá pē. Neongo naʻe ʻikai mahino kiate ia ʻa e lea faka-Pilitāniá, ka naʻá ne haʻu pē ʻo tangutu fakalongolongo ke ne ongoʻi ʻa e Laumālié. ʻI he taimi ní, ʻokú ne fiefia ʻaupito ke fanongo ki he ongoongoleleí ʻi heʻene lea fakafonuá.”