ʻEletā Steven D. Shumway

Fitungofulu Taki Māʻolunga

Hili ha taʻu ʻe ua ʻo e ngāue ʻa ʻEletā Sitīveni D. Samuei ʻi he Exxon Chemical Co. ʻi Hiusitoni, Tekisisi, USA, naʻá ne ʻilo ai kuo uiuiʻi ʻene ongomātuʻá ke na tokangaʻi ha misiona ʻi Polivia pea naʻá na fiemaʻu tokoni ʻi he pisinisi ʻa e fāmilí ʻi ʻAlesoná.

Naʻe talaange ʻe heʻene tamaí, “ʻOku ʻikai ke u loto ke fakamālohiʻi koe ke ke foki mai. Ka ʻo kapau he ʻikai ke ke foki mai, ʻoku ou hohaʻa ki he meʻa ʻe hoko ki he pisinisí.”

Naʻe pehē ʻe ʻEletā Samuei ko ha fili faingataʻa ia ke fakahoko.

Naʻá ne fononga mo hono uaifí ʻi ha houa ʻe nima ki he Temipale Dallas Texas peá na nofo ʻaho kakato ai kae ʻikai pē maʻu ha tali. Hili iá, naʻá na ʻaʻahi ki ha fale tohi peá na fakatokangaʻi ai ʻa e piokālafi ʻo Palesiteni Kōtoni B. Hingikelī (1910–2008), Laka Atu ʻi he Tui.

Naʻe pehē ʻe ʻEletā Samuei, “Naʻá ma fakatou ongoʻi ʻa e folofola ʻa e ʻEikí, ʻʻOku fiemaʻu ke ke laka atu ki muʻa ʻi he tui ʻi hoku halá, kae ʻikai ʻi ho halá.’ Pea ko ia ne ma hiki leva ki ʻAlesona, pea naʻe hoko ia ko e taha ʻo e ngaahi liliu mahuʻinga mo fakaʻofoʻofa taha ʻi heʻema moʻuí.”

Naʻe pehē ʻe ʻEletā Samuei, ko e taha ʻo e ngaahi meʻa lelei taha kuó na ako ʻi heʻena nofo-malí, ko e “taimi ʻokú ke tali ai ʻa e fakaafe [ʻa e ʻEikí], ʻokú ke tuʻumālie. ʻOkú ke fakalakalaka. ʻOku lelei ange ʻa e ngaahi meʻá ʻo laka ange ia ʻi haʻo feinga ke fakahoko hoʻo foungá.”

Naʻe fāʻeleʻi ʻa Sitīveni D. Samuei ʻi he ʻaho 30 ʻo Sune 1970, ʻi Sipilingavila, ʻAlesona, USA, kia Uilifooti Takilesi mo Tisi ʻAna Samuei, pea naʻá ne tupu hake ʻi ʻIkia, ʻAlesona. Naʻá ne mali mo Heiti ʻOpalaieni ʻi he Temipale Salt Lake ʻi he ʻaho 29 ʻo Tīsema 1994. ʻOkú na hoko ko ha ongomātuʻa ki ha fānau ʻe toko fā pea ʻoku nau nofo ʻi Painitopi, ʻAlesona.

Naʻe maʻu ʻe ʻEletā Samuei ha mataʻitohi ʻi he ʻenisinia kemikalé mei he ʻUnivēsiti Pilikihami ʻIongí ʻi he 1996, ngāue ʻi he Exxon Chemical Co. mei he 1996 ki he 1998, pea kuó ne hoko ko e palesiteni mo e CEO ʻo e Whiting Brothers Investment Co. talu mei he 1998.

ʻI he taimi naʻe uiuiʻi ai iá, naʻá ne lolotonga hoko ko ha Fitungofulu Fakaʻēlia Māʻolunga. Kuó ne hoko ko e palesiteni ʻo e Misiona Illinois Chicago, palesiteni fakasiteiki, pīsope, palesiteni ʻo e kōlomu ʻo e kaumātuʻá, faiako teuteu ngāue fakafaifekau ʻi he siteikí, mo ha faifekau taimi kakato ʻi he Misiona Pennsylvania Philadelphia.