“ʻEletā Sandino Roman,” Liahona, Mē 2024.
ʻEletā Sandino Roman
Fitungofulu Taki Māʻolunga
Naʻe fakafeʻiloaki ʻa ʻEletā Sanitino Lōmani ki he ongoongolelei ʻo Sīsū Kalaisí ʻi heʻene kei siʻí. Naʻe ʻave ia mo hono tuofefiné ʻe ha kaungāmeʻa ʻo ʻene faʻeé ʻi he Sāpate kotoa pē ke nau fakataha mo e kāingalotu ʻe toko 15 kehe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha kiʻi falelotu ʻi Mekisikou.
Naʻe lotu ʻa e kiʻi tamasiʻi taʻu nimá he ʻaho kotoa pē ke ului hono fāmilí ki he ongoongoleleí. Hili pē ha taʻu ʻe ua mei ai, naʻe papitaiso ʻene faʻeé mo ʻene tamaí. Hili ha taʻu ʻe taha mei ai, naʻe papitaiso ia ʻe heʻene tamaí. Naʻe pehē ʻe ʻEletā Lōmani, “Koeʻuhí ko e meʻa ko iá, ʻoku ou ʻiloʻi ʻoku fanongo ʻa e ʻEikí ki he ngaahi lotu ʻa e fānaú.”
Kuo hoko hono tali ʻo e ongoongoleleí mo e ngāue ʻi he Siasí ke hoko ai ha liliu lahi ʻi hono fāmilí. Naʻe pehē ʻe ʻEletā Lōmani, “Kuó u mātā ʻa e ikuʻanga ʻoku ʻomi ʻe he ongoongoleleí ki he kakaí. ʻOku ou ʻilo ʻokú ne ʻomi ʻa e fiefiá mo e ʻamanaki leleí.”
Naʻe fāʻeleʻi ʻa Sanitino Lōmani ʻi he ʻaho 7 ʻo ʻAokosi 1973, kia Litia Kalo mo Polometio Lōmani ʻi ʻIkuala, Kualelo, Mekisikou. Lolotonga ʻa e vaʻinga ʻa Lōmani ʻi he timi volipolo ʻa e akoʻanga ʻa e Siasí ko e ako māʻolunga ko Penemelito ti lasi ʻAmelikasí, naʻá ne fetaulaki ai mo Kuatalupe Vilanueva Lohasi. Naʻá na sila ʻi he Temipale Mexico City Mexico ʻi he ʻaho 19 ʻo Tīsema 1998. ʻOkú na maʻu ha fānau ʻe toko fā.
Naʻe maʻu ʻe ʻEletā Lōmani ha mataʻitohi BA ʻi he polokalama fakakomipiutá mei he ITESM (the Monterrey Institute of Technology and Higher Education) ʻi he 2000 mo ha MA ʻi he puleʻi pisinisí mei he ʻUnivēsiti Pilikihami ʻIongí ʻi he 2006. Kuó ne ngāue ko ha pule fakamāketi maʻá e Johnson & Johnson pea maʻá e Siasí ko e pule ʻo e ʻŌfisi Tokoni ʻa e ʻĒlia Mekisikoú.
ʻI he taimi naʻe uiuiʻi ai iá, naʻá ne hoko mo hono uaifí ko e ongo taki ʻo e Misiona Ecuador Quito North. Kuo hoko foki ʻa ʻEletā Lōmani ko ha Fitungofulu Fakaʻēlia, tokoni palesiteni fakasiteiki, pīsope, aleaʻanga māʻolunga, mo e palesiteni ʻo e kōlomu ʻo e kaumātuʻá.
Naʻe pehē ʻe ʻEletā Lōmani ko ʻene tefitoʻi taumuʻa ʻi he moʻuí, ke ngāue ke falala mai ʻa e ʻEikí kiate ia, ʻi ha feituʻu pē te ne ngāue ai. Naʻá ne pehē, “ʻOku ou loto ke Ne ʻafioʻi te Ne lava ʻo falala mai kiate au ke u fai ʻa e ngāué ni.”