“Brother Gabriel W. Reid,” Liahona, Mē 2024.
Brother Gabriel W. Reid
Tokoni Ua ʻi he Kau Palesitenisī Lahi ʻo e Lautohi Faka-Sāpaté
Ko e taha ʻo e ngaahi konga fakafiefia taha ʻo e hoko ʻa Kepaleli W. Liti ko ha taki fakamisioná ko ʻene mamata ki he kau faifekaú ʻoku nau “keinanga ʻi he ngaahi folofola ʻa Kalaisí,” fakatupulaki ha ʻofa ʻi he folofolá, pea holi ke hoko ʻo tatau ange mo e Fakamoʻuí.
Naʻe pehē ʻe Brother Liti, ʻa ia ʻoku ʻosi ʻene ngāue ko e palesiteni ʻo e Misiona Australia Sydney ʻi Siulai, “Kapau ʻokú ke ʻiloʻi moʻoni ʻa e founga ke ʻai ai hoʻo ako e ongoongoleleí ke ʻmelie’ kiate koe, ʻo hangē ko ia ʻoku lave ki ai ʻi he folofolá [vakai, ʻAlamā 32:28], ko e taimi ia ʻoku liliu ai hoʻo moʻuí.”
Naʻe fāʻeleʻi ʻa Brother Liti ʻi Pango Pango, Haʻamoa ʻAmelika. ʻOkú ne lea faka-Haʻamoa, faka-Sipeini, mo e faka-Pilitānia. Naʻá ne pehē, ʻi he lea faka-Haʻamoá ʻoku liliu e foʻi lea keinanga ʻi he Tohi ʻa Molomoná ko e “taumamafa fiafia” pea ʻi he lea faka-Sipeiní ko e “deleitar.” Naʻá ne pehē ʻoku fakatou fakahaaʻi ʻe he ongo foʻi leá ʻa e fiefia.
ʻI heʻene hoko ko ha tokoni ʻi he Kau Palesitenisī Lahi foʻou ʻo e Lautohi Faka-Sāpaté, naʻá ne pehē ai, “ʻOku ou fiefia ke tokoni ki he niʻihi kehé ke nau ʻiloʻi ʻa e lahi ʻo e fiefia ʻoku maʻu ʻi hono ako fakaʻauliliki ʻo e folofolá.”
Naʻe fāʻeleʻi ʻa Kepaleli “Keipi” Uolotā Poʻu Liti ʻi he ʻaho 28 ʻo Mē 1977, kia ʻIusini mo Tupu Liti pea ohi hake ia ʻi he kolo ko Leone ʻi Haʻamoa ʻAmelika. Naʻe kamata kei siʻi pē ʻene ʻofa ki he ʻOtuá mo ʻene fakaʻamu ke fakamuʻomuʻa Iá pea naʻe fakalotolahiʻi ai ia ʻi heʻene vaʻinga ʻakapulu ʻi he ʻUnivēsiti Pilikihami ʻIongí mei he 1999 ki he 2002 pea hoko atu ʻene ngāue ʻi he National Football League (Liiki ʻAkapulu Fakafonuá) mei he 2003 ki he 2006.
Lolotonga e taimi ko ia ʻo ʻene moʻuí, naʻá ne ako ai ha lēsoni mahuʻinga: “Ko e taimi ʻoku talaatu ai ʻe he ʻEikí ha meʻá, kuo pau ke ke ʻʻosikiavelenga ai.’”
Naʻe mali ʻa Brother Liti mo Heta Lini Sase ʻi he Temipale Bountiful Utah ʻi he ʻaho 24 ʻo Sune 2000. ʻOkú na maʻu ha fānau ʻe toko fā. Naʻá ne ʻosi mei BYU ʻi he 2002 mo ha mataʻitohi BA ʻi he fengāueʻaki fakavahaʻapuleʻangá. ʻI he ʻaho ní, ʻoku ʻi ai ʻene kautaha ki hono puleʻi e langá.
Makehe mei hono tokangaʻi ʻe Brother Liti ʻa e Misiona Australia Sydney, kuó ne hoko ko ha tokoni palesiteni fakasiteiki, aleaʻanga māʻolunga, pīsope, palesiteni ʻo e Kau Talavou ʻi he uōtí, tokotaha ngāue ouau he temipalé, mo ha faifekau taimi kakato ʻi he Misiona Chile Santiago South mei he 1996 ki he 1998.